مەملەكەت باسشىسى قاسىم-جومارت توقاەۆ «قازاقستان رەسپۋبليكاسى ۆيتسە-پرەزيدەنتىنىڭ وكىلەتتىكتەرى تۋرالى» جارلىققا قول قويدى، دەپ حابارلايدى “ادىرنا” ءتىلشىسى.
قۇجاتقا سايكەس، قازاقستان رەسپۋبليكاسىنىڭ ۆيتسە-پرەزيدەنتى مەملەكەتتىڭ ىشكى جانە سىرتقى ساياساتى سالاسىنداعى ستراتەگيالىق سيپاتتاعى باستامالاردى ازىرلەۋدى قامتاماسىز ەتىپ، ولاردى پرەزيدەنتكە ۇسىنادى.
سونداي-اق پرەزيدەنتتىڭ تاپسىرماسى بويىنشا قۇرىلتايمەن، ۇكىمەتپەن، مەملەكەتتىك ورگاندارمەن، ساياسي پارتيالارمەن، قوعامدىق بىرلەستىكتەرمەن جانە حالىقارالىق ۇيىمدارمەن ءوزارا ءىس-قيمىل كەزىندە پرەزيدەنت اتىنان وكىلدىك ەتەدى. حالىقارالىق ءىس-شارالارعا قاتىسادى.
ۆيتسە-پرەزيدەنت الەمدىك جانە ءداستۇرلى دىندەر ليدەرلەرى سەزىنىڭ حاتشىلىعىن باسقارادى. سونىمەن قاتار پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ قىزمەتىنە جەتەكشىلىك ەتەدى.
بۇدان بولەك، ۆيتسە-پرەزيدەنت مەملەكەتتىك ناگرادالار جونىندەگى كوميسسيا، ازاماتتىق ماسەلەلەرى جونىندەگى كوميسسيا، جاستار ساياساتى جونىندەگى كەڭەس جانە مەملەكەتتىك سىيلىقتاردى بەرۋ جونىندەگى كوميسسيالاردى قوسا العاندا، بىرقاتار كوميسسيالار مەن كەڭەستەردىڭ قىزمەتىن قامتاماسىز ەتەدى.
جارلىقتا ۆيتسە-پرەزيدەنتتىڭ ءوز قۇزىرەتى شەگىندە وكىم شىعارۋعا، ورتالىق جانە جەرگىلىكتى اتقارۋشى ورگاندارعا تاپسىرما بەرۋگە، مەملەكەتتىك ورگانداردان قاجەتتى اقپارات پەن قۇجاتتاردى سۇراتۋعا جانە ۆەدومستۆوارالىق جۇمىس توپتارىن قۇرۋعا قۇقىلى ەكەنى كورسەتىلگەن.
ۆيتسە-پرەزيدەنتتىڭ قىزمەتىن ۇيىمدىق-قۇقىقتىق، اقپاراتتىق-تالدامالىق جانە وزگە دە باعىتتار بويىنشا قازاقستان رەسپۋبليكاسى پرەزيدەنتىنىڭ اكىمشىلىگى قامتاماسىز ەتەدى.
قۇجاتقا سايكەس، ۇكىمەتكە، پرەزيدەنت اكىمشىلىگىنە جانە پرەزيدەنت ءىس باسقارماسىنا جارلىقتان تۋىندايتىن ءتيىستى شارالاردى قابىلداۋ تاپسىرىلدى.
جارلىق قول قويىلعان كۇنىنەن باستاپ قولدانىسقا ەنگىزىلدى.
ەسكە سالايىق، 31 تامىزدا پرەزيدەنت قاسىم-جومارت توقاەۆ ەرلان كاريندى پرەزيدەنت اكىمشىلىگى باسشىسىنىڭ ورىنباسارى قىزمەتىنەن بوساتقان. كەيىن قازاقستان رەسپۋبليكاسىنىڭ ۆيتسە-پرەزيدەنتى ەتىپ تاعايىنداعان ەدى.
