شىمكەنت قالاسىنىڭ ەڭبەكشى اۋدانىندا ينجەنەرلىك ينفراقۇرىلىمدى جاڭعىرتۋ، جولداردىڭ ساپاسىن جاقسارتۋ، تۇرعىن ءۇي اۋلالارىن اباتتاندىرۋ جانە الەۋمەتتىك نىسانداردى دامىتۋ باعىتىندا جۇيەلى جۇمىستار جۇرگىزىلۋدە. جىل باسىنان بەرى بىرقاتار ەلدى مەكەندە ەلەكتر جەلىلەرى جاڭارتىلىپ، جولدار جوندەلدى، اياقجولدار مەن بالالار ويىن الاڭشالارى سالىنىپ، جاڭا قوعامدىق كەڭىستىكتەر پايدالانۋعا بەرىلدى.
اۋداندا اتقارىلعان جۇمىستار مەن الداعى جوسپارلار تۋرالى وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن بريفينگتە اۋدان اكىمى دوسبول ەسىلبەك باياندادى.
جالپى اۋماعى 22,8 مىڭ گەكتاردى قۇرايتىن ەڭبەكشى اۋدانىندا 230 مىڭنان استام تۇرعىن تۇرادى. اۋدان قۇرامىنا 18 تۇرعىن الابى مەن 11 شاعىناۋدان كىرەدى. بۇگىندە ينجەنەرلىك ينفراقۇرىلىمدى دامىتۋ جۇمىستارى كەزەڭ-كەزەڭىمەن جۇزەگە اسىرىلىپ، اۋىز سۋمەن جانە تابيعي گازبەن قامتۋ دەڭگەيى 97 پايىزعا، ەلەكترمەن قامتۋ 99,8 پايىزعا جەتكەن.
ينجەنەرلىك جەلىلەردى جاڭعىرتۋ اياسىندا 2026 جىلى 6,29 شاقىرىم ەلەكتر جەلىسى مەن 4 ترانسفورماتور جاڭارتىلدى. قاراباستاۋ جانە جۇلدىز تۇرعىن الاپتارىندا قوسىمشا 4 شاقىرىم ەلەكتر جەلىسى تارتىلدى. سونداي-اق بازارقاقپا تۇرعىن الابىنداعى قوسالقى ستانتسيانىڭ قۋاتى 10 مىڭ كۆت ترانسفورماتورى 25 مىڭ كۆت جاڭا قۇرىلعىعا اۋىستىرىلدى.
كارىز جۇيەسىن دامىتۋ باعىتىندا دا ماڭىزدى جوبالار ىسكە اسىرىلۋدا. بازارقاقپا تۇرعىن الابىنداعى دوستىق كوشەسىندە 20 كوپقاباتتى تۇرعىن ءۇيدىڭ 275 پاتەرى مەن جەكە سەكتورداعى 400 ابونەنتتى قامتيتىن كارىز جۇيەسىنىڭ قۇرىلىسى جۇرگىزىلۋدە. ۇلاعات شاعىناۋدانىندا جۇيەنى ىسكە قوسۋ جانە ابونەنتتەردى قوسۋ جۇمىستارى اتقارىلۋدا.
جول-كولىك ينفراقۇرىلىمىن جاقسارتۋ ماقساتىندا بيىل 29 كوشەنىڭ تۇيىقتارىن اسفالتتاۋ جوسپارلانىپ، ونىڭ 24-ىندە جۇمىس اياقتالدى. سونىمەن قاتار 17 كوشەدەگى 19,5 شاقىرىم جول جابىنى جاڭارتىلدى. جاياۋ جۇرگىنشىلەرگە قولايلى جاعداي جاساۋ ءۇشىن 16 كوشەدە 8 شاقىرىم اياقجول توسەلدى.
سۋ باسۋ قاۋپىنىڭ الدىن الۋ ماقساتىندا يرريگاتسيالىق جۇيەلەردى دامىتۋعا باسىمدىق بەرىلگەن. 2026 جىلى جوسپارلانعان 20 مەكەنجايداعى 6,3 شاقىرىم ارىق جۇيەسىنىڭ 12 مەكەنجايداعى قۇرىلىسى تولىق اياقتالدى. قالعان ۋچاسكەلەردە جۇمىستار جالعاسۋدا.
اۋدان كوشەلەرىن جارىقتاندىرۋ بويىنشا دا ناتيجەلەر بار. 2025 جىلى جوسپارلانعان 367 كوشەگە جارىقشامدار ورناتىلىپ، پايدالانۋعا بەرىلدى. بيىل جارىقتاندىرۋ جۇيەسىن جاڭارتۋ كوزدەلگەن 8 كوشەنىڭ 6-ىندا جۇمىس اياقتالدى.
تۇرعىندارعا قولايلى قوعامدىق ورتا قالىپتاستىرۋ اياسىندا «حالىق قاتىساتىن بيۋدجەت» جوباسى جۇزەگە اسىرىلۋدا. 2026 جىلى جوسپارلانعان 46 جوبانىڭ باسىم بولىگى ورىندالدى. اتاپ ايتقاندا، 34 بالالار ويىن الاڭى، 5 گۇلزار جانە 2 اياقجول جوباسى اياقتالدى. سونىمەن قاتار اۋداندا جوسپارلانعان 12 سپورت الاڭىنىڭ 11-ءى پايدالانۋعا بەرىلدى. قازىرگى ۋاقىتتا جاڭا گۇلزارلار مەن بادام وزەنىنىڭ جاعاسىن اباتتاندىرۋ جۇمىستارى جۇرگىزىلۋدە.
الەۋمەتتىك جانە كولىك ينفراقۇرىلىمىن دامىتۋعا باعىتتالعان ماڭىزدى جوبالار دا جۇزەگە اسىرىلۋدا. مومىنوۆ جانە تلەنشين كوشەلەرىندەگى تەمىرجول وتكەلدەرىنىڭ قۇرىلىسى اياقتالىپ، پايدالانۋعا بەرىلدى. قاراتوبە تۇرعىن الابىنداعى م. اۋەزوۆ اتىنداعى №96 مەكتەپكە كۇردەلى جوندەۋ جۇرگىزىلىپ، جاڭا وقۋ جىلىندا وقۋشىلاردى قابىلدادى.
بۇدان بولەك، ەلتاي تۇرعىن الابىنداعى كانالدىڭ 910 مەتر بولىگى بەتونمەن قاپتالىپ، 1 700 مەتر سۋ اعار ناۋا ورناتىلدى. بازارقاقپا جانە تۇردىابات تۇرعىن الاپتارىن بايلانىستىراتىن يسرايلوۆ كوشەسىندە ۇزىندىعى 4,76 شاقىرىم ءتورت جولاقتى جولدىڭ قۇرىلىسى جۇرگىزىلۋدە. جوبا اياسىندا اياقجولدار، يرريگاتسيالىق ارىقتار مەن جارىقتاندىرۋ جۇيەسى قاراستىرىلعان. قازىرگى ۋاقىتتا جۇمىستىڭ 65 پايىزى ورىندالعان.
سونىمەن قاتار بەردىقوجا باتىر كوشەسىندە سايرامسۋ وزەنى ارقىلى وتەتىن ۇزىندىعى 78 مەترلىك كولىك كوپىرىنىڭ قۇرىلىسى جۇرگىزىلۋدە. دەمەۋشىلەردىڭ قولداۋىمەن ەكى جەردە جاياۋ جۇرگىنشىلەر كوپىرى دە سالىندى.
ەڭبەكشى اۋدانىندا جۇزەگە اسىرىلىپ جاتقان جوبالار تۇرعىنداردىڭ ينجەنەرلىك ينفراقۇرىلىمعا قولجەتىمدىلىگىن ارتتىرۋعا، كولىك قوزعالىسى مەن قاۋىپسىزدىگىن جاقسارتۋعا جانە قوعامدىق كەڭىستىكتەردى كوبەيتۋگە باعىتتالعان. بۇل جۇمىستار الداعى ۋاقىتتا دا جالعاسىپ، اۋداننىڭ ءاربىر ەلدى مەكەنىندە قولايلى ءومىر ءسۇرۋ ورتاسىن قالىپتاستىرۋعا نەگىز بولادى.
