شىمكەنتتە كورىسۋ كۇنىندە ۇرپاقتار ساباقتاستىعى ۇلىقتالدى

2306
Adyrna.kz Telegram

بۇگىن شىمكەنتتىكتەر ءاز ناۋرىزدىڭ العاشقى مەرەكەسى - كورىسۋ كۇنىن اتاپ وتۋدە. تاڭەرتەڭ استانا الاڭىنان باستاۋ العان مەرەكە قالانىڭ بىرقاتار كورىكتى ورىندارىندا، Shymqala ەتنواۋىلىندا جالعاستى. قىستان كوكوراي كوكتەمگە امان جەتكەن جۇرتشىلىق كورىسۋ كۇنىنىنىڭ يگى ءداستۇرىن جالعاپ، ءبىر-بىرىنەن ساۋلىق سۇراسىپ، ءتوس قاعىستىردى.

بۇل كۇنى قالا اكىمى مۇرات ايتەنوۆ شىمكەنتتىكتەردى كورىسۋ كۇنىمەن قۇتتىقتاپ، ۇلىستىڭ ۇلى كۇنى قارساڭىندا ۇرپاقتار ساباقتاستىعىن جالعاستىرۋ ماقساتىندا قالا جاستارىمەن كورىسىپ، «بەلسەندى ۇزاق ءومىر ورتالىعىنداعى» قاريالاردىڭ اماندىعىن سۇراپ، باتاسىن الدى. ۇلتتىق كيىم كيىپ، دومبىراسىن اسىنعان ونەرپازدار ءان-جىردان شاشۋ شاشىپ، كورىسۋ مەرەكەسىنىڭ كوركىن قىزدىردى. ابىز اقساقالدار مەن اجەلەردىڭ جاس بۋىنمەن جارقىن جۇزدەسۋى ۇلت بولاشاعى، جاستار تاربيەسى، ۇلتتىق قۇندىلىقتار تۋراسىنداعى تاعلىمدى سۇقباتقا ۇلاستى.

كۇن سايىن مۇندا 700-دەن استام تۇرعىن 30 شاقتى قىزمەت ءتۇرىن الادى. زامانا تالابىنا ساي جابدىقتالعان ورتالىق بۇگىندە قاريالاردىڭ باسىن قوساتىن الاڭعا اينالىپ وتىر.

كورىسۋ – جۇرتشىلىقتىڭ ءبىر-بىرىنە امانداسىپ، جاقسىلىق تىلەيتىن قاۋىشۋ مەرەكەسى عانا ەمەس، جاسى ۇلكەندەرگە ىزەت كورسەتىپ، ءىلتيپات بىلدىرەتىن ىزگى امال. بۇل كۇننىڭ وسكەلەڭ ۇرپاقتى ىزەتتىلىك پەن مەيىرىمدىلىككە، تاتۋلىق پەن باۋىرمالدىققا شاقىراتىن تاعىلىمى مول.

"ادىرنا" ۇلتتىق پورتالى

پىكىرلەر