بۇگىن شىمكەنت قالاسىندا تاۋەلسىز مەملەكەتتەر دوستاستىعىنا (تمد) مۇشە ەلدەردىڭ توتەنشە جاعدايلار جونىندەگى مەملەكەتارالىق كەڭەسىنىڭ XXXVIII وتىرىسى ءوتتى.
قازاقستان سوڭعى 11 جىلدا العاش رەت حالىقارالىق دەڭگەيدەگى اتالعان ءىس-شارانى ۇيىمداستىردى. جيىنعا دوستاستىق ەلدەرىنىڭ قۇتقارۋ قىزمەتتەرى مەن توتەنشە جاعدايلار ۆەدومستۆولارىنىڭ باسشىلارى جانە وكىلدەرى قاتىستى. ولاردىڭ قاتارىندا وزبەكستان، بەلارۋس، قىرعىزستان، تاجىكستان جانە رەسەيدىڭ توتەنشە جاعدايلار مينيسترلەرى بار.
قر توتەنشە جاعدايلار ءمينيسترى مۇرات مۇحانوۆ ارىپتەستەرىنە كليماتتىق جانە تەحنوگەندىك سيپاتتاعى توتەنشە جاعدايلاردى بولجاۋ جونىندەگى وڭىرلىك ورتالىق قۇرۋ يدەياسىن تانىستىردى. اتاپ ايتقاندا، قازاقستاندا ورمان ورتتەرىن ەرتە انىقتاۋ ءۇشىن جاساندى ينتەللەكت تەحنولوگيالارى قالاي قولدانىلاتىنى، كومىر شاحتالارىندا جۇمىسشىلاردى ىزدەۋ جانە گازدانۋ دەڭگەيىن باقىلاۋ جۇيەلەرى قالاي ەنگىزىلىپ جاتقانى تۋرالى باياندادى. سونداي-اق ۇشقىشسىز ۇشۋ اپپاراتتارى جەتۋى قيىن اۋماقتاردى تەكسەرىپ، ادامداردى ىزدەۋگە كومەكتەسەدى.
مۇرات مۇحانوۆ قۇتقارۋ اۆياتسياسى مەن مامانداندىرىلعان بولىمشەلەردىڭ دامۋى، اۋىلدىق جەرلەردەگى قۇتقارۋ بولىمشەلەرى جەلىسىنىڭ كەڭەيۋى جونىندە دە مالىمەت بەردى. ماسەلەن، «اۋىل قۇتقارۋشىلارى» باعدارلاماسى اياسىندا 311 ەرىكتى ورتكە قارسى توپتار قۇرىلعان. ولار 975-تەن استام ەلدى مەكەننىڭ قاۋىپسىزدىگىن قامتاماسىز ەتەدى.
رەسەي توتەنشە جاعدايلار مينيسترلىگىنىڭ باسشىسى الەكساندر كۋرەنكوۆ ۆەدومستۆو 2027 جىلدىڭ جازىندا اركتيكالىق ايماقتا، بولجام بويىنشا ياكۋتيادا، تاجىريبەلىك-زەرتتەۋ جاتتىعۋلارى مەن ەكسپەديتسيا وتكىزۋدى جوسپارلاپ وتىرعانىن حابارلادى. ونىڭ ماقساتى – توتەنشە جاعدايلارعا دەن قويۋ كەزىندە ۆەدومستۆوارالىق ءوزارا ءىس-قيمىلدى پىسىقتاۋ، سونداي-اق تۋندرا مەن باتپاقتى جەرلەر سياقتى كۇردەلى تابيعي جاعدايلاردا ءورت ءسوندىرۋ جانە قۇتقارۋ تەحنيكاسى مەن جابدىقتارىنىڭ ۇلگىلەرىن سالىستىرمالى سىناقتان وتكىزۋ.
وتىرىس اياسىندا قازاقستاندىق وندىرىستەن شىققان ارنايى تەحنيكا، اۆاريالىق-قۇتقارۋ جابدىقتارى مەن قۇتقارۋشىلاردىڭ ارنايى كيىم-كەشەكتەرى قويىلعان كورمە ۇيىمداستىرىلدى. شەتەلدىك دەلەگاتسيا وكىلدەرى ۇسىنىلعان جابدىقتاردىڭ مۇمكىندىكتەرىمەن، تەحنيكالىق سيپاتتامالارىمەن جانە ءىس جۇزىندە قولدانىلۋ ەرەكشەلىكتەرىمەن تانىستى.
