Şymkent qalasynyŋ Eŋbekşı audanynda injenerlık infraqūrylymdy jaŋǧyrtu, joldardyŋ sapasyn jaqsartu, tūrǧyn üi aulalaryn abattandyru jäne äleumettık nysandardy damytu baǧytynda jüielı jūmystar jürgızılude. Jyl basynan berı bırqatar eldı mekende elektr jelılerı jaŋartylyp, joldar jöndeldı, aiaqjoldar men balalar oiyn alaŋşalary salynyp, jaŋa qoǧamdyq keŋıstıkter paidalanuǧa berıldı.
Audanda atqarylǧan jūmystar men aldaǧy josparlar turaly Öŋırlık kommunikasiialar qyzmetınıŋ aqparat alaŋynda ötken brifingte audan äkımı Dosbol Esılbek baiandady.
Jalpy aumaǧy 22,8 myŋ gektardy qūraityn Eŋbekşı audanynda 230 myŋnan astam tūrǧyn tūrady. Audan qūramyna 18 tūrǧyn alaby men 11 şaǧynaudan kıredı. Bügınde injenerlık infraqūrylymdy damytu jūmystary kezeŋ-kezeŋımen jüzege asyrylyp, auyz sumen jäne tabiǧi gazben qamtu deŋgeiı 97 paiyzǧa, elektrmen qamtu 99,8 paiyzǧa jetken.
İnjenerlık jelılerdı jaŋǧyrtu aiasynda 2026 jyly 6,29 şaqyrym elektr jelısı men 4 transformator jaŋartyldy. Qarabastau jäne Jūldyz tūrǧyn alaptarynda qosymşa 4 şaqyrym elektr jelısı tartyldy. Sondai-aq Bazarqaqpa tūrǧyn alabyndaǧy qosalqy stansiianyŋ quaty 10 myŋ kVt transformatory 25 myŋ kVt jaŋa qūrylǧyǧa auystyryldy.
Kärız jüiesın damytu baǧytynda da maŋyzdy jobalar ıske asyryluda. Bazarqaqpa tūrǧyn alabyndaǧy Dostyq köşesınde 20 köpqabatty tūrǧyn üidıŋ 275 päterı men jeke sektordaǧy 400 abonenttı qamtityn kärız jüiesınıŋ qūrylysy jürgızılude. Ūlaǧat şaǧynaudanynda jüienı ıske qosu jäne abonentterdı qosu jūmystary atqaryluda.
Jol-kölık infraqūrylymyn jaqsartu maqsatynda biyl 29 köşenıŋ tūiyqtaryn asfalttau josparlanyp, onyŋ 24-ınde jūmys aiaqtaldy. Sonymen qatar 17 köşedegı 19,5 şaqyrym jol jabyny jaŋartyldy. Jaiau jürgınşılerge qolaily jaǧdai jasau üşın 16 köşede 8 şaqyrym aiaqjol töseldı.
Su basu qaupınıŋ aldyn alu maqsatynda irrigasiialyq jüielerdı damytuǧa basymdyq berılgen. 2026 jyly josparlanǧan 20 mekenjaidaǧy 6,3 şaqyrym aryq jüiesınıŋ 12 mekenjaidaǧy qūrylysy tolyq aiaqtaldy. Qalǧan uchaskelerde jūmystar jalǧasuda.
Audan köşelerın jaryqtandyru boiynşa da nätijeler bar. 2025 jyly josparlanǧan 367 köşege jaryqşamdar ornatylyp, paidalanuǧa berıldı. Biyl jaryqtandyru jüiesın jaŋartu közdelgen 8 köşenıŋ 6-ynda jūmys aiaqtaldy.
Tūrǧyndarǧa qolaily qoǧamdyq orta qalyptastyru aiasynda «Halyq qatysatyn biudjet» jobasy jüzege asyryluda. 2026 jyly josparlanǧan 46 jobanyŋ basym bölıgı oryndaldy. Atap aitqanda, 34 balalar oiyn alaŋy, 5 gülzar jäne 2 aiaqjol jobasy aiaqtaldy. Sonymen qatar audanda josparlanǧan 12 sport alaŋynyŋ 11-ı paidalanuǧa berıldı. Qazırgı uaqytta jaŋa gülzarlar men Badam özenınıŋ jaǧasyn abattandyru jūmystary jürgızılude.
Äleumettık jäne kölık infraqūrylymyn damytuǧa baǧyttalǧan maŋyzdy jobalar da jüzege asyryluda. Momynov jäne Tlenşin köşelerındegı temırjol ötkelderınıŋ qūrylysy aiaqtalyp, paidalanuǧa berıldı. Qaratöbe tūrǧyn alabyndaǧy M. Äuezov atyndaǧy №96 mektepke kürdelı jöndeu jürgızılıp, jaŋa oqu jylynda oquşylardy qabyldady.
Būdan bölek, Eltai tūrǧyn alabyndaǧy kanaldyŋ 910 metr bölıgı betonmen qaptalyp, 1 700 metr su aǧar naua ornatyldy. Bazarqaqpa jäne Tūrdyabat tūrǧyn alaptaryn bailanystyratyn İsrailov köşesınde ūzyndyǧy 4,76 şaqyrym tört jolaqty joldyŋ qūrylysy jürgızılude. Joba aiasynda aiaqjoldar, irrigasiialyq aryqtar men jaryqtandyru jüiesı qarastyrylǧan. Qazırgı uaqytta jūmystyŋ 65 paiyzy oryndalǧan.
Sonymen qatar Berdıqoja batyr köşesınde Sairamsu özenı arqyly ötetın ūzyndyǧy 78 metrlık kölık köpırınıŋ qūrylysy jürgızılude. Demeuşılerdıŋ qoldauymen ekı jerde jaiau jürgınşıler köpırı de salyndy.
Eŋbekşı audanynda jüzege asyrylyp jatqan jobalar tūrǧyndardyŋ injenerlık infraqūrylymǧa qoljetımdılıgın arttyruǧa, kölık qozǧalysy men qauıpsızdıgın jaqsartuǧa jäne qoǧamdyq keŋıstıkterdı köbeituge baǧyttalǧan. Būl jūmystar aldaǧy uaqytta da jalǧasyp, audannyŋ ärbır eldı mekenınde qolaily ömır süru ortasyn qalyptastyruǧa negız bolady.
