شىمكەنت قالاسىنىڭ تۇران اۋدانىندا ينجەنەرلىك ينفراقۇرىلىمدى جاڭعىرتۋ، جول ساپاسىن جاقسارتۋ جانە تۇرعىندارعا قولايلى ورتا قالىپتاستىرۋ باعىتىندا كەشەندى جۇمىستار جۇرگىزىلۋدە. اۋدان اكىمى ب. ازىمبەرديەۆتىڭ مالىمەتىنشە، 2026 جىلى اۋىز سۋ، ەلەكتر ەنەرگياسى، گاز، كارىز جۇيەسى جانە اباتتاندىرۋ سالالارىندا بىرقاتار جوبا جۇزەگە اسىرىلعان.
قازىرگى تاڭدا تۇران اۋدانىنىڭ اۋماعى 36 300 گەكتاردى قۇرايدى. مۇندا 22 شاعىن اۋدان، 39 357 جەكە تۇرعىن ءۇي مەن 548 كوپقاباتتى ءۇي ورنالاسقان. جالپى تۇرعىندار سانى – 232 708 ادام. اۋدان اۋماعىندا 1 229 كوشە مەن 293 الەۋمەتتىك نىسان بار.
ينجەنەرلىك ينفراقۇرىلىم بويىنشا بارلىق 22 شاعىن اۋدان ساپالى اۋىز سۋمەن جانە ەلەكتر ەنەرگياسىمەن تولىق قامتىلعان. قۇرساي شاعىن اۋدانىندا سۋ جۇيەسىن تارتۋ جۇمىستارى كەزەڭ-كەزەڭىمەن جۇرگىزىلۋدە. ءبىرىنشى كەزەڭ اياقتالىپ، پايدالانۋعا بەرىلسە، ەكىنشى كەزەڭدى جىل سوڭىنا دەيىن اياقتاۋ جوسپارلانعان. سونىمەن قاتار بيىل اۋداندا 12 جاڭا ترانسفورماتورلىق ستانتسيا ورناتىلدى.
تابيعي گازبەن قامتۋ دەڭگەيى 85,7 پايىزدى قۇراپ، 19 شاعىن اۋدان كوگىلدىر وتىن پايدالانىپ وتىر. قۇرساي مەن جاڭاتالاپتىڭ جەكەلەگەن اۋماقتارىن گازداندىرۋ 2026–2027 جىلدارعا جوسپارلانعان. ال ايكول شاعىن اۋدانىندا جوبالىق قۇجاتتاما ازىرلەۋ جۇمىستارى كەلەسى جىلى جۇرگىزىلەدى. كارىز جۇيەسىمەن 13 شاعىن اۋدان قامتىلعان. قازىرگى ۋاقىتتا ورتالىق اۋماقتاعى جانە قورعاسىن شاعىن اۋدانىنداعى 14 كوشەدە كارىز جەلىلەرىنىڭ قۇرىلىسى باستالدى.
كوشە ينفراقۇرىلىمىن جاقسارتۋ باعىتىندا بيىل 68 كوشەدە جوندەۋ جۇمىستارى جۇرگىزىلدى. ونىڭ 66-سى ورتاشا جوندەۋدەن ءوتىپ، ەكى كوشەگە جاڭا اسفالت توسەلدى. بۇعان دەيىن 2025 جىلى 251 كوشەدە 112,3 شاقىرىم جول جاڭارتىلعان بولاتىن.
تۇرعىنداردىڭ قاۋىپسىز قوزعالىسىن قامتاماسىز ەتۋ ءۇشىن يرريگاتسيالىق جۇيەلەر مەن اياقجولدار سالىنۋدا. بۇگىندە 203 كوشەدە 134,5 شاقىرىم يرريگاتسيالىق جۇيە بار. بيىل 28 كوشەدە 16,1 شاقىرىم سۋ بۇرۋ جۇيەسىنىڭ قۇرىلىسى اياقتالدى. سونداي-اق 36 كوشەدە اياقجول سالۋ جۇمىستارى جۇرگىزىلىپ، پايدالانۋعا بەرىلدى.
اباتتاندىرۋ اياسىندا كوشەلەردى جارىقتاندىرۋ جانە قوعامدىق دەمالىس ورىندارىن كوبەيتۋگە كوڭىل بولىنگەن. قازىرگى ۋاقىتتا «تۇران» كوممۋنالدىق مەكەمەسى 1 098 كوشەگە، ال «Abm-Building 2007» جشس 131 كوشەگە قىزمەت كورسەتەدى. جىل سوڭىنا دەيىن 42 اۋلاداعى كوشەلەر مەن وتكەلدەرگە قوسىمشا 93 جارىقشام ورناتۋ جوسپارلانعان.
سونىمەن قاتار اۋداننىڭ جەتى اۋماعىندا امبەباپ دەمالىس ورىندارى مەن گۇلزارلار سالۋ كوزدەلگەن. بيىل رىسقۇلوۆ پەن ادىربەكوۆ، رىسقۇلوۆ پەن بايتۇرسىنوۆ كوشەلەرىنىڭ قيىلىسىندا سۋبۇرقاقتار ورناتىلدى. اباي جانە مەتاللۋرگ ساياباقتارىندا شاحمات كلۋبتارى اشىلدى.
قوعامدىق قاۋىپسىزدىكتى نىعايتۋ ماقساتىندا تسيفرلىق باقىلاۋ جۇيەلەرى دە جەتىلدىرىلۋدە. 2025 جىلى كوشەلەر مەن اۋلالارعا 282 بەينەباقىلاۋ كامەراسى ورناتىلعان. بيىل قوسىمشا كامەرالار ورناتۋ جۇمىستارى جۇرگىزىلىپ، ءۇش مەكتەپتىڭ اۋماعىنا قۇقىق بۇزۋشىلىقتاردىڭ الدىن الۋعا ارنالعان دروندار قويىلدى.
ەكولوگيالىق احۋالدى جاقسارتۋ باعىتىنداعى ءىرى جوبالاردىڭ ءبىرى – قاتتى قالدىقتاردى وڭدەيتىن زاماناۋي كەشەن قۇرىلىسى. قۇنى 54 ملرد تەڭگەنى قۇرايتىن جوبانى «Shaanxi Construction Engineering Kazakhstan Co.، Ltd.» كومپانياسى 2026–2028 جىلدارى جۇزەگە اسىرۋدى جوسپارلاپ وتىر. جالپى اۋماعى 12 گەكتار بولاتىن كەشەندە جىلىنا 1 000 تونناعا دەيىن قالدىق وڭدەۋ، 24 مۆت-قا دەيىن ەلەكتر ەنەرگياسىن ءوندىرۋ جانە كەمىندە 80 تۇراقتى جۇمىس ورنىن اشۋ كوزدەلگەن.
تۇرعىن ءۇي ينفراقۇرىلىمىن جاقسارتۋ جۇمىستارى دا جالعاسۋدا. اۋدانداعى 548 كوپقاباتتى ءۇيدىڭ 503-ءى ورتالىق جىلۋ جۇيەسىنە قوسىلعان، قالعاندارى اۆتونومدى جىلىتۋ جۇيەسىن پايدالانادى. ورتالىق جىلۋ جۇيەسىنە قوسىلعان بارلىق ءۇي جىلۋ ماۋسىمىنا تولىق دايىن. بيىل ءتورت كوپقاباتتى ۇيگە كۇردەلى جوندەۋ جۇرگىزىلىپ، تاعى ءبىر نىساندا جۇمىستار جالعاسۋدا. سونىمەن قاتار التى مەكەنجايداعى عيماراتتاردىڭ 1 080 شارشى مەتر قاسبەتىنە مۋرال سالۋ اياقتالدى.
بالالار مەن جاستارعا ارنالعان ينفراقۇرىلىم دا كەڭەيىپ كەلەدى. قازىرگى ۋاقىتتا اۋداندا 419 بالالار ويىن الاڭشاسى جانە 121 اشىق سپورت الاڭشاسى بار. بيىل قوسىمشا 19 بالالار ويىن الاڭشاسى مەن 10 كەشەندى سپورت الاڭشاسىنىڭ قۇرىلىسى تولىق اياقتالىپ، پايدالانۋعا بەرىلدى.
جالپى، تۇران اۋدانىندا ينجەنەرلىك جەلىلەردى جاڭارتۋ، جولداردى جوندەۋ، تۇرعىن ءۇي قورىن جاقسارتۋ جانە قوعامدىق كەڭىستىكتەردى دامىتۋ جۇمىستارى جۇيەلى تۇردە جۇزەگە اسىرىلۋدا. بۇل جوبالار تۇرعىنداردىڭ ءومىر ءسۇرۋ ساپاسىن ارتتىرىپ، اۋداننىڭ ينفراقۇرىلىمدىق الەۋەتىن نىعايتۋعا باعىتتالعان.
