ج.تاشەنەۆ اتىنداعى ۋنيۆەرسيتەتتە عالىمدار، زاڭگەرلەر مەن ستۋدەنتتەر باس قوسىپ، مەملەكەت باسشىسىنىڭ «قازاقستاننىڭ جاڭا تاريحي كەزەڭدەگى وزەكتى مىندەتتەرى» اتتى جولداۋىنىڭ نەگىزگى باعىتتارى جونىندە ويلارىن ورتاعا سالدى.
كەزدەسۋدىڭ باستى ماقساتى – پرەزيدەنت باستامالارىنىڭ ەلىمىزدىڭ الەۋمەتتىك-ەكونوميكالىق جانە قوعامدىق-ساياسي ومىرىنە ىقپالىن زەردەلەۋ، سونداي-اق وتاندىق عىلىم مەن جوعارى ءبىلىم بەرۋدى دامىتۋدىڭ جاڭا باعىتتارىن ايقىنداۋ بولدى.
ۋنيۆەرسيتەت رەكتورى، زاڭ عىلىمدارىنىڭ كانديداتى جانار رىسبەكوۆا مەملەكەت باسشىسى كوتەرگەن باستامالار اياسىندا جوعارى ءبىلىم بەرۋدىڭ ستراتەگيالىق باسىمدىقتارى تۋرالى بايانداما جاسادى.
– «پرەزيدەنت جولداۋىنىڭ باستى يدەياسى – قازاقستان جاڭا تەحنولوگيالاردى تۇتىنۋشى عانا ەمەس، ءبىلىم مەن عىلىمنىڭ كومەگىمەن ولاردى ءوزى جاسايتىن ەلگە اينالۋى كەرەك. مەملەكەت باسشىسى بولاشاق ۇرپاققا بىلىمگە نەگىزدەلگەن، قۋاتتى ءارى جوعارى تەحنولوگيالى قازاقستاندى قالدىرۋ قاجەتتىگىن اتاپ ءوتتى. سونداي-اق جاساندى ينتەللەكت نەگىزىندە تسيفرلىق ەكونوميكانى قالىپتاستىرۋدى جالپىۇلتتىق مىندەت رەتىندە بەلگىلەدى.
جولداۋدا عىلىمدى، ءوندىرىستى، لوگيستيكانى جانە تەحنولوگيالىق كاسىپكەرلىكتى بىرىكتىرەتىن وڭىرلىك ەكوجۇيەلەر قۇرۋ قاجەتتىگى ناقتى ايتىلعان. بۇگىندە زەرتحانادا دۇنيەگە كەلگەن عىلىمي يدەيا ەكونوميكاعا ەنگىزىلەتىن دايىن ونىمگە اينالۋى ءتيىس. پرەزيدەنت جولداۋى جوعارى ءبىلىم مەن عىلىم سالاسىنا جاڭا مىندەتتەرمەن قاتار، تىڭ مۇمكىندىكتەر دە ۇسىنىپ وتىر، – دەدى ۋنيۆەرسيتەت رەكتورى.
جيىنعا قاتىسۋشىلار زاڭ ۇستەمدىگىن قامتاماسىز ەتۋ جانە «زاڭ مەن ءتارتىپ» قاعيداتىن ادىلەتتى قوعامنىڭ نەگىزى رەتىندە ءىس جۇزىندە ورنىقتىرۋ ماسەلەلەرىن دە جان-جاقتى تالقىلادى. سونىمەن قاتار، كونستيتۋتسيالىق نەگىزدەردى نىعايتۋ جانە قوعامدىق كەلىسىمدى ساقتاۋ تاقىرىپتارى قوزعالدى.
تالقىلاۋدىڭ ماڭىزدى بولىگى قازاقستان رەسپۋبليكاسى تاۋەلسىزدىگىنىڭ 35 جىلدىعىنا ارنالدى. سپيكەرلەر مەن قوناقتار ەلىمىزدىڭ تاريحي دامۋ جولى، ۇلتتىق قۇندىلىقتاردى ساقتاۋ، ازاماتتىق جاۋاپكەرشىلىك پەن قازىرگى كەزەڭدەگى قوعام بىرلىگىن نىعايتۋ ماسەلەلەرى جونىندە پىكىر الماستى.
ديسكۋسسياعا ۋنيۆەرسيتەت باسشىلىعى، وقىتۋشىلار، ساراپشىلار، زاڭگەرلەر قاۋىمداستىعىنىڭ وكىلدەرى، قوعام بەلسەندىلەرى مەن جۋرناليستەر قاتىستى.
ۇيىمداستىرۋشىلاردىڭ ايتۋىنشا، مۇنداي اشىق پىكىر الماسۋ العا قويىلعان مىندەتتەردىڭ ءمانىن تەرەڭىرەك تۇسىنۋگە، ساراپشىلار مەن قوعام اراسىنداعى ديالوگتى نىعايتۋعا جانە جاستاردىڭ قازاقستاننىڭ قوعامدىق-ساياسي ومىرىنە دەگەن قىزىعۋشىلىعىن ارتتىرۋعا مۇمكىندىك بەردى.
