اسەل جاناسوۆا قازاقستان رەسپۋبليكاسى پرەمەر-ءمينيسترىنىڭ ورىنباسارى – كولىك ءمينيسترى قىزمەتىنە تاعايىندالدى، دەپ حابارلايدى “ادىرنا”.
بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسىنىڭ ءتيىستى جارلىعىنا سايكەس، اسەل جاناسوۆا بۇرىن اتقارعان لاۋازىمىنان بوساتىلدى.
اسەل جاناسوۆا 1987 جىلى الماتى قالاسىندا دۇنيەگە كەلگەن. 2010 جىلى «بولاشاق» حالىقارالىق باعدارلاماسى اياسىندا كەمبريدج ۋنيۆەرسيتەتىندە كومپيۋتەرلىك عىلىمدار باعىتى بويىنشا ءبىلىم العان. 2014 جىلى وسى ۋنيۆەرسيتەتتە ماگيستراتۋرانى اياقتاعان. سونداي-اق ماسكەۋ مەملەكەتتىك ۋنيۆەرسيتەتىندە Executive Management باعدارلاماسى بويىنشا وقىعان.
ەڭبەك جولىن 2010 جىلى لوندون قالاسىنداعى حالىقارالىق كومپانيادا باستاعان. ءار جىلدارى اقپاراتتىق تەحنولوگيالار جونىندەگى مامان، اقپاراتتىق تەحنولوگيالار باسقارماسىنىڭ مەنەدجەرى جانە كيبەرقاۋىپسىزدىك دەپارتامەنتىنىڭ ديرەكتورى قىزمەتتەرىن اتقارعان.
2014–2016 جىلدارى قازاقستان رەسپۋبليكاسى ۇلتتىق بانكىنىڭ تسيفرلىق تەحنولوگيالار دەپارتامەنتى ديرەكتورىنىڭ ورىنباسارى بولدى. 2016–2017 جىلدارى «زەردە» ۇلتتىق باسقارۋشى حولدينگىنىڭ باسقارما توراعاسى قىزمەتىن اتقاردى.
2017–2020 جىلدارى «استانا» حالىقارالىق قارجى ورتالىعىندا ءتۇرلى لاۋازىمداردا جۇمىس ىستەدى. 2020–2022 جىلدارى ساۋدا جانە ينتەگراتسيا ءمينيسترىنىڭ ورىنباسارى بولدى.
2022–2025 جىلدارى «قازپوشتا» اق باسقارما توراعاسى قىزمەتىن اتقاردى. 2025 جىلعى 8 ماۋسىمدا پرەزيدەنتتىڭ كەڭەسشىسى بولىپ تاعايىندالدى. سول جىلدىڭ 10 جەلتوقسانىندا پرەزيدەنت اكىمشىلىگى باسشىسىنىڭ ورىنباسارى قىزمەتىنە كىرىستى.
اسەل جاناسوۆا «قازاقستان رەسپۋبليكاسىنىڭ تاۋەلسىزدىگىنە 30 جىل» مەرەيتويلىق مەدالىمەن جانە 2025 جىلى «قۇرمەت» وردەنىمەن ماراپاتتالعان. سونىمەن قاتار دۇنيەجۇزىلىك ەكونوميكالىق فورۋمنىڭ Young Global Leader 2025 قاۋىمداستىعىنىڭ جانە Global Women Asia Fellow 2024 حالىقارالىق كوشباسشىلىق باعدارلاماسىنىڭ مۇشەسى.
ايتا كەتەيىك، بۇعان دەيىن كولىك ءمينيسترى قىزمەتىن اتقارعان نۇرلان ساۋرانباەۆ لاۋازىمىنان كەتتى.
