PARAQTA جوباسىنىڭ نەگىزىن قالاعان ەرداۋلەت قۇرالمەن جوبا قالاي باستالعانىن، وقىرماندى كىتاپتى سوڭىنا دەيىن وقۋعا نە يتەرمەلەيتىنىن جانە پلاتفورمانىڭ الداعى جوسپارلارىن اڭگىمەلەدىك.
استاناداعى شاعىن وقىرماندار كلۋبىنا ارنالىپ جاسالعان Telegram-بوت ءبىر جىلدان اسا ۋاقىتتا 26 مىڭنان استام ادام تىركەلگەن تسيفرلىق پلاتفورماعا اينالدى. پايدالانۋشىلار وسى ۋاقىتقا دەيىن 1,5 ميلليون بەتتەن استام كىتاپ وقىعان.
كىتاپ وقۋعا ۋاقىت تابۋ، باستاعان كىتاپتى اياقتاۋ، وقۋدى كۇندەلىكتى ادەتكە اينالدىرۋ كوپ ادامعا تانىس قيىندىق. ەندى بۇل پروتسەستى جۇيەلەپ، وقىرماننىڭ ناتيجەسىن كورسەتىپ وتىراتىن تسيفرلىق قۇرالدار كوبەيىپ كەلەدى. سولاردىڭ ءبىرى – وتاندىق PARAQTA پلاتفورماسى. ول وقىرمانعا وقۋعا جۇمساعان ۋاقىتىن ەسەپتەپ، ستاتيستيكاسىن باقىلاۋعا جانە كىتاپ تۋرالى پىكىر الماسۋعا مۇمكىندىك بەرەدى.
جوبا اۆتورى ەرداۋلەت ايانۇلى قۇرىلىس سالاسىندا ءتورت جىلعا جۋىق جۇمىس ىستەگەن. بىراق كىتاپقا دەگەن جەكە قىزىعۋشىلىعى ۋاقىت وتە كەلە جاڭا باستاماعا اينالعان.
ءبىر كلۋبتىڭ قاجەتتىلىگىنەن تۋعان بوت
جوبا ءبىر ادامنىڭ يدەياسىنان ەمەس، بەلگىلى ءبىر توپتىڭ قاجەتتىلىگىنەن باستالعان.
«پلاتفورمانىڭ قۇرىلعانىنا ءبىر جىل ەكى ايداي بولدى. باستاپقىدا استانادا ءوزىمىزدىڭ وقىرماندار كلۋبىمىز بار ەدى. سول ادامداردىڭ وقۋ ستاتيستيكاسىن باقىلاۋعا، تۇراقتى ادەت قالىپتاستىرۋعا كومەكتەسۋ ءۇشىن Telegram-بوت جاسادىق. كەيىن وعان باسقا وقىرماندار دا قىزىعۋشىلىق تانىتتى. سودان بوتتى كوپشىلىككە اشتىق. سول كەزدە بولاشاقتا سايت نەمەسە قوسىمشا جاساۋ كەرەك دەگەن وي تۋدى»، - دەيدى ەرداۋلەت.
العاشىندا جوبانىڭ ناقتى تۇجىرىمداماسى بولماعان. اۆتوردىڭ ويىندا تەك وقىرمانعا وقۋ بارىسىن تىركەيتىن قاراپايىم قۇرال جاساۋ ماقساتى تۇرعان. پايدالانۋشىلار كوبەيىپ، ولاردان جاڭا وتىنىشتەر تۇسكەن سايىن جوبانىڭ مۇمكىندىكتەرىن كەڭەيتۋ قاجەت بولعان.
بانكروتقا ۇشىراعان كوفەحانا بەرگەن ساباق
جوبانىڭ ونلاينعا كوشۋىنە اۆتوردىڭ بۇرىنعى كاسىپكەرلىك تاجىريبەسى دە اسەر ەتتى. ەرداۋلەت ءبىر كەزدەرى كىتاپ دۇكەنى مەن كوفەحانانى بىرىكتىرگەن بيزنەس اشقان، بىراق ول ۇزاققا سوزىلماعان.
«بۇرىن كوفەحانا مەن كىتاپ دۇكەنى بىرىككەن بيزنەسىمىز بولدى. بىراق قارجىلىق ماسەلەلەرگە بايلانىستى جابۋعا ءماجبۇر بولدىق. سودان كەيىن وسى فورماتتى وفلايننان ونلاينعا كوشىرۋ تۋرالى وي كەلدى. PARAQTA جوباسىنا كوبىرەك كوڭىل بولە باستادىق. شامامەن ءۇش-ءتورت ايدان كەيىن سايت جاساۋعا كىرىستىك. ونى ازىرلەۋدە جاساندى ينتەللەكتىنىڭ كومەگىن پايدالاندىق. قازىر سايتتىڭ جۇمىس ىستەپ كەلە جاتقانىنا جارتى جىلداي بولدى»، - دەيدى جوبا اۆتورى.
باستاپقى نۇسقا مەن بۇگىنگى پلاتفورمانىڭ اراسى الشاق. قازىر PARAQTA تەك وقۋ ۋاقىتىن تىركەيتىن قۇرال ەمەس.
تايمەر، جەكە سورە جانە ستاتيستيكا
پلاتفورمانىڭ جۇمىس ءتارتىبى قاراپايىم. وقىرمان كىتاپ اشقاندا تايمەردى قوسادى، وقىپ بولعان سوڭ وقىعان بەت سانىن ەنگىزەدى. قاعاز كىتاپتاردى اتاۋى مەن اۆتورى بويىنشا جەكە سورەسىنە قوسىپ قويۋعا بولادى. ەلەكتروندى كىتاپتاردى پلاتفورمانىڭ وزىندە وقۋعا نەمەسە PDF, EPUB فورماتىندا جۇكتەۋگە بولادى.
«وسى دەرەكتەردىڭ نەگىزىندە ءار پايدالانۋشىنىڭ جەكە ستاتيستيكاسى جاسالادى. ول ايلىق جانە جىلدىق ناتيجەلەرىن سالىستىرىپ، وقۋ قارقىنىن باقىلاي الادى»، - دەيدى ەرداۋلەت.
«سترەيكتى ۇزبەۋ ءۇشىن كۇنىنە بەس بەت بولسا دا وقيدى»
ەرداۋلەتتىڭ ايتۋىنشا، وقىرماننىڭ كۇندەلىكتى بەلسەندىلىگىن ارتتىرۋعا ويىن ەلەمەنتتەرى كوپ كومەكتەسكەن.
«كىتاپتى سوڭىنا دەيىن وقىتۋعا ارنالعان ءتۇرلى مەحانيزمدەر بار. مىسالى، بىرنەشە كۇن قاتارىنان وقىساڭىز، سترەيك جينالادى. ءبىر كۇن وقىماي قالساڭىز، ول ۇزىلەدى. وقىرمان سول كورسەتكىشىن جوعالتپاۋ ءۇشىن كۇنىنە بەس بەت بولسا دا وقۋعا تىرىسادى. مۇنداي جۇيەنى Duolingo سياقتى قوسىمشالاردان بايقادىق. كۇندەلىكتى بەلسەندىلىكتى ساقتاۋعا ارنالعان بۇل ءتاسىل جاقسى جۇمىس ىستەيدى ەكەن. سوندىقتان ونى وزىمىزگە ەنگىزدىك. پلاتفورمادا وقىرمان نەعۇرلىم كوپ كىتاپ وقىسا، سوعۇرلىم جۇلدىزشا جينايدى. جيناعان جۇلدىزشالارىن جەكە پاراقشاسىن بەزەندىرۋگە جۇمساي الادى. وسىلايشا، شاعىن جەتىستىكتەر مەن ماراپاتتار ارقىلى وقىرماننىڭ كىتاپقا دەگەن قىزىعۋشىلىعىن ارتتىرىپ، وقۋعا دەگەن ىنتاسىن وياتۋعا بولادى »، - دەيدى ول.
بۇگىندە اۋىز تولتىرىپ ايتارلىقتاي ناتيجەسى دە جوق ەمەس. پلاتفورمادا 300 كۇننەن استام ۋاقىت بويى كۇن سايىن كىتاپ وقىپ كەلە جاتقان بىرنەشە پايدالانۋشى بار، 100 كۇندىك مەجەدەن اسقاندار دا از ەمەس. جۇيە وقىرمانعا «كىتاپ وقۋدى ۇمىتپاڭىز»، «شامىڭىزدى سوندىرمەڭىز» دەگەن ەسكە سالعىش حابارلامالاردى دا اۆتوماتتى تۇردە جىبەرىپ وتىرادى.
اۆتور ءۇشىن بۇل كورسەتكىشتەر پلاتفورمانىڭ دۇرىس باعىتتا ەكەنىن كورسەتەدى. باستاپقىدا تەك وقىلعان بەتتى تىركەيتىن بوت ەندى ادامنىڭ وقۋ ءتارتىبىن قالىپتاستىرۋعا كومەكتەسەتىن قۇرالعا اينالدى.
«جالعىز وقىعاننان بىرگە وقىعان قىزىعىراق»
PARAQTA-دا جەكە ستاتيستيكادان بولەك، بىرگە وقۋ مۇمكىندىگى دە بار. پايدالانۋشى دوستارىن نەمەسە تانىستارىن جيناپ، ءوز وقىرماندار كلۋبىن اشا الادى. كلۋب ىشىندە ءار قاتىسۋشىنىڭ ناتيجەسى كورىنىپ، ىشكى رەيتينگ جاسالادى.
«وقىرمان كلۋبتارى جاقسى كومەكتەسىپ جاتىر. ءار ادام ءوز جاقىندارىن تارتىپ، كىتاپتى بىرگە وقۋ ءۇشىن كلۋب اشادى. ولاردىڭ اراسىندا ىشكى رەيتينگ بار، بۇل تۇراقتىلىققا دا اسەر ەتەدى. جالعىز وقىعاننان گورى بىرنەشە اداممەن بىرگە وقۋ قىزىعىراق. ءبىر-ءبىرىڭنىڭ ناتيجەلەرىڭدى كورەسىڭ، سول ارقىلى ءوزىڭ دە وقۋعا ىنتالاناسىڭ»، - دەيدى ەرداۋلەت.
قازىر پلاتفورمادا 180-نەن استام وقىرماندار كلۋبى قۇرىلعان. «دوستار» فۋنكتسياسىن 600-دەن استام ادام پايدالانادى. پايدالانۋشى جاڭا كىتاپ باستاسا، دوستارىنا حابارلاما بارادى. ءبىر-بىرىنە كۇنىنە ءبىر رەت كىتاپ وقۋدى ەسكە سالىپ قويۋعا دا بولادى.
جاقىندا پلاتفورمادا «پاراقتاۋ» ءبولىمى ىسكە قوسىلعان. وندا باسقا وقىرمانداردىڭ كىتاپتارعا جازعان پىكىرلەرى ءبىر لەنتاعا جينالادى. پايدالانۋشى وزگەلەردىڭ ويىن وقىپ، كەلەسى كىتابىن تاڭداعاندا سونى ەسكەرە الادى.
جوبا اۆتورىنىڭ ايتۋىنشا، بۇگىندە PARAQTA-دا 26 مىڭنان استام پايدالانۋشى تىركەلگەن، ال ولار ەنگىزگەن وقۋ ناتيجەلەرىنىڭ جيىنتىعى 1,5 ميلليون بەتتەن اسقان. بۇل دەرەكتەر پلاتفورمانىڭ ىشكى ستاتيستيكاسىنا نەگىزدەلگەن.
قور تاپشىلىعى
اۋديتوريا وسكەن سايىن شەشىلۋى ءتيىس ماسەلەلەر دە كوبەيەدى. سونىڭ ەڭ باستىسى – ەلەكتروندى كىتاپتاردىڭ ازدىعى. قازىر پلاتفورما كىتاپحاناسىنا 148 شىعارما جۇكتەلگەن. ولاردىڭ قاتارىندا قازاق حالىق ەرتەگىلەرى، ابايدىڭ قارا سوزدەرى، ورىس جانە اعىلشىن تىلىندەگى كىتاپتار، سونداي-اق اۋدارما تۋىندىلار بار. وقىرماندار ءوز كىتاپتارىن PDF نەمەسە EPUB فورماتىندا جۇكتەي الادى. بىراق ورتاق كىتاپحانانى تولىقتىرۋ ءۇشىن اۆتورلىق قۇقىق تالاپتارىن ساقتاۋ كەرەك.
«قازىر كىتاپحانادا قوعام يگىلىگىنە بەرىلگەن 148 كىتاپ قانا بار. كىتاپ قورىن كوبەيتۋ كەرەك، اسىرەسە قازاق تىلىندەگى شىعارمالار بويىنشا جۇمىس ىستەۋىمىز قاجەت. بىراق اۆتورلىق قۇقىقتى دا ەسكەرۋىمىز كەرەك. كەز كەلگەن كىتاپتى رۇقساتسىز ورنالاستىرا المايمىز»، - دەيدى ەرداۋلەت.

مينيسترمەن كەزدەسۋ: قانداي قولداۋ ۋادە ەتىلدى؟
وسى ماسەلەنى شەشۋ جانە جوبانى كەڭىنەن تانىستىرۋ ءۇشىن كوماندا مادەنيەت جانە اقپارات ءمينيسترى ارمان قىرىقباەۆپەن كەزدەسكەن. جۇزدەسۋدە كىتاپ قورىن تولىقتىرۋ، جوبانى اقپاراتتىق تۇرعىدان قولداۋ جانە تانىستىرىلىم وتكىزۋ ماسەلەلەرى تالقىلانعان.
«مينيستر ارمان ورازبايۇلىمەن كەزدەسىپ، جوبامىزداعى ماسەلەلەردى ايتتىق. ول كىسى قولداۋ كورسەتۋگە ۋادە بەردى. ناقتىراق ايتساق، كىتاپ قورى بويىنشا قيىندىقتارىمىز بار ەكەنىن جەتكىزدىك. استانا مەن الماتىدا وفلاين پرەزەنتاتسيا وتكىزۋگە كومەكتەسەتىندەرىن ايتتى. قازىر اقپاراتتىق قولداۋ دا كورسەتىلىپ جاتىر»، – دەيدى جوبا اۆتورى.
ديانا اسان
«ادىرنا» ۇلتتىق پورتالى
