كولىك ءمينيسترى مارات قاراباەۆ كولىك جۇرگىزۋشىلەردىڭ جەتپەي جاتقانىن ايتتى، دەپ حابارلايدى "ادىرنا" ءتىلشىسى.
مينيستر قوناەۆ قالاسىندا تۇرعىندارىمەن كەزدەستى.
جيىن بارىسىندا جولاۋشىلار تاسىمالىمەن اينالىساتىن وڭىرلىك كاسىپورىنداردىڭ وكىلدەرى دە بىرقاتار ساۋالداردى جولدادى. سونىڭ ءبىرى - اۆتوبۋس جۇرگىزۋشىلەرى ءۇشىن قاجەتتى جۇمىس ءوتىلىن ازايتۋدى جانە D ساناتىنداعى جۇرگىزۋشى كۋالىگىن الۋ ءۇشىن جاس كورسەتكىشىن تومەندەتۋ. ياعني، اۆتوبۋس جۇرگىزۋشىسى ماماندىعى بويىنشا وقيتىنداردىڭ سانى 20 ەسەگە ازايعان.
مينيستر قاراباەۆ بۇل ماسەلەلەرگە قاتىستى 2024 جىلدىڭ ءبىرىنشى جارتى جىلدىعىندا شەشىم قابىلداۋ جوسپارلانعانى تۋرالى ايتىپ بەردى. الايدا ماجىلىستەگىلەر ءمينيستردىڭ باستاماسىن قولداماعان بولىپ شىقتى.
ءبىز ءبىرىنشى جارتىجىلدىقتا ءماجىلىس بۇل وزگەرتۋلەرگە قولداۋ كورسەتسە، تامىز ايىنا دەيىن ماسەلە تۇبەگەيلى شەشىلەدى دەپ ۇمىتتەنەمىز. اتاپ ايتقاندا، جاس كورسەتكىشى 23 جاسقا دەيىن ازايىپ، D1 ساناتى ءۇشىن جۇرگىزۋشى وتىلىنە قويىلاتىن تالاپ 3 جىلدان 1 جىلعا دەيىن تومەندەيدى. البەتتە، مۇنىمەن ماسەلە تولىقتاي شەشىلمەيدى، دەگەنمەن العىشارتتارى بار. تالداۋ جۇمىستارى كورسەتىپ وتىرعانداي، 2014 جىلعا دەيىن D ساناتى بويىنشا 3 جىل كولەمىندە 84 مىڭ ادام وقىعان. تالاپتار قاتاڭداتىلعاننان كەيىن اۆتوبۋس جۇرگىزۋشىسى بىلىكتىلىگى بويىنشا وقيتىنداردىڭ سانى 4 مىڭ ادامعا دەيىن قىسقارتىلعان. بۇل وتە از. اتالعان كورسەتكىشتەردى كورسەتكەن كەزدە حالىق قالاۋلىلارى دا تۇسىنىستىك تانىتىپ، قولداۋ كورسەتتى، - دەپ جاۋاپ بەردى مينيستر.
