يراننىڭ جوعارعى كوشباسشىسى مودجتابا حامەنەي ەلگە قارسىلاستار تاراپىنان ءتونۋى مۇمكىن كەز كەلگەن قاۋىپكە ونىڭ سيپاتى مەن گەوگرافيالىق ورنالاسۋىنا قاراماستان، دەرەۋ ءارى ءتيىمدى جاۋاپ بەرۋدى تاپسىردى. بۇل تۋرالى ول يران قارۋلى كۇشتەرىنىڭ جوعارى قولباسشىلىق قۇرامىمەن كەزدەسۋدە مالىمدەدى، دەپ حابارلايدى «ادىرنا» ءتىلشىسى Tasnim-گە سىلتەمە جاساپ.
حامەنەي اۋقىمدى قارسىلاسۋعا دايىن بولۋدى قارسىلاستى بارىنشا تەجەۋدىڭ نەگىزگى شارتتارىنىڭ ءبىرى دەپ اتادى. ونىڭ ايتۋىنشا، اسكەري نەمەسە تەرروريستىك شابۋىلدار قايتا باستالعان جاعدايدا، قاقتىعىستىڭ قاشان جانە قانداي شارتتارمەن اياقتالاتىنىن يران مەن ونىڭ قارۋلى كۇشتەرى ايقىندايدى.
سونداي-اق كوشباسشى الەۋەتتى نىساندار ءتىزىمىن جاڭارتۋدى تاپسىردى. بۇل يران اسكەرىنە ءوزى «امەريكالىق-سيونيستىك جاۋ» دەپ اتاعان قارسىلاستارىنىڭ ماتەريالدىق جانە ماتەريالدىق ەمەس اكتيۆتەرىنە سوققى بەرۋگە مۇمكىندىك بەرۋى ءتيىس.
حامەنەيدىڭ ايتۋىنشا، اسكەري بارلاۋ جۇيەسىن جەتىلدىرۋ، وتاندىق قورعانىس تەحنولوگيالارىن دامىتۋ، تاكتيكا مەن اسكەري دوكترينانى جاڭارتۋ، سونداي-اق زاماناۋي تەحنولوگيالاردى پايدالانۋ ارقىلى بارلاۋ جانە جاۋىنگەرلىك مۇمكىندىكتەردى نىعايتۋ دا باسىم باعىتتاردىڭ قاتارىندا.
كەزدەسۋ بارىسىندا يران قارۋلى كۇشتەرى باس شتابىنىڭ باستىعى ءالي ابدوللاحي، ارميا قولباسشىسى ءامىر حاتامي جانە يسلام رەۆوليۋتسياسى ساقشىلار كورپۋسىنىڭ باسشىسى احماد ۆاحيدي اسكەردىڭ پارسى شىعاناعى جاعالاۋىندا، ورمۇز بۇعازى مەن ومان شىعاناعى ماڭىندا، سونداي-اق ەلدىڭ سولتۇستىك-باتىس جانە وڭتۇستىك-شىعىس شەكارالارىندا جاۋىنگەرلىك دايىندىقتا تۇرعانى تۋرالى باياندادى. ولاردىڭ مالىمەتىنشە، وق-دارىلەردىڭ، بارلاۋ قۇرالدارىنىڭ، قوسالقى جانە جاۋىنگەرلىك قارۋ-جاراقتىڭ ءارتۇرلى تۇرلەرىن ءوندىرۋ كولەمى بىرنەشە ەسە ارتقان.
حامەنەي اسكەري قىزمەتكەرلەرگە، پوليتسياعا، «باسيدج» كۇشتەرىنە جانە قورعانىس مينيسترلىگىنىڭ قىزمەتكەرلەرىنە اتقارعان جۇمىسى ءۇشىن العىس ءبىلدىردى. سونىمەن قاتار ول يران مەن ايماقتاعى وداقتاس كۇشتەر اراسىنداعى ۇيلەستىرۋدىڭ ستراتەگيالىق ماڭىزىن اتاپ ءوتتى. ونىڭ سوزىنشە، ءتۇرلى باعىتتاعى ءوزارا ءىس-قيمىل باتىس ازياداعى جاڭا ساياسي جانە قاۋىپسىزدىك ءتارتىبىنىڭ قالىپتاسۋىنا ىقپال ەتەدى.
كاسپي تەڭىزى جاعالاۋىنداعى قازاقستان، ازەربايجان جانە تۇركىمەنستان ءتارىزدى ەلدەردە يران وزىنە قارسىلاس كورەتىن امەريكانىڭ كومپانيالارى جۇمىس ىستەيدى. ولاردىڭ دەنى - مۇناي-گاز سالاسىنداعى تانىمال كومپانيالار.
