ەرتەڭ، 6 اقپاندا اقش پەن يران وماندا يادرولىق باعدارلاما بويىنشا كەلىسسوز وتكىزەدى. بۇل تۋرالى يسنا اگەنتتىگى جازدى، دەپ حابارلايدى «ادىرنا» ءتىلشىسى.
«كەڭەسۋلەر ناتيجەسىندە كەلىسسوزدەر وماندا وتەدى دەپ شەشىلدى. كەلىسىمگە سايكەس، كەزدەسۋلەر جۇما كۇنى ۇيىمداستىرىلادى»،-دەلىنگەن حابارلامادا.
كەلىسسوزدەردىڭ فورماتى الدىڭعى راۋندتارداعىداي بولماق. يران دەلەگاتسياسىن ەلدىڭ سىرتقى ىستەر ءمينيسترى ابباس اراكچي باسقارادى، وعان جوعارى لاۋازىمدى ديپلوماندار قوسىلادى. اقش تاراپىنان كەزدەسۋگە پرەزيدەنتتىڭ ارنايى وكىلى ستيۆ ۋيتكوفف قاتىسپاق. سونىمەن قاتار يران دەلەگاتسياسىندا اقش پرەزيدەنتىنىڭ قۇداسى دجارەد كۋشنەردىڭ دە بولۋ مۇمكىن.
«كەلىسسوزدەردىڭ نەگىزگى تاقىرىپتارى رەتىندە بالليستيكالىق راكەتالاردىڭ قاشىقتىعى، يراننىڭ تاياۋ شىعىستاعى تەرروريستىك ۇيىمداردى قولداۋى، يادرولىق باعدارلاما جانە يران بيلىگىنىڭ ءوز حالقى الدىنداعى قاتىناسى قاراستىرىلماق»،-دەلىنگەن حابارلامادا.
بۇعان دەيىن اقش مەملەكەتتىك حاتشىسى ماركو رۋبيو باستاپقىدا كەلىسسوزدەردى تۇركيادا بىرنەشە سەرىكتەس ەلدىڭ قاتىسۋىمەن وتكىزۋدى جوسپارلاعاندارىن جەتكىزگەن ەدى، بىراق كەيىن يران تاراپى قارسىلىق تانىتقان.
ەسكە سالايىق، وتكەن جىلى ۋيتكوفف پەن اراكچي وماندا بىرنەشە راۋند جاناما كەلىسسوزدەر وتكىزگەن، الايدا يرانعا قارسى يزرايل مەن اقش-تىڭ اسكەري وپەراتسياسىنان كەيىن كەزدەسۋلەر توقتاتىلعان.
