اقش مەملەكەتتىك دەپارتامەنتى يراننىڭ جاڭا جوعارعى كوشباسشىسى مودجتابا حامەنەي جانە يسلام رەسپۋبليكاسىنىڭ باسقا دا باسشىلىعى تۋرالى اقپارات بەرگەندەرگە 10 ميلليون دوللارعا دەيىن سىياقى بەرەتىندەرىن مالىمدەدى، دەپ حابارلايدى «ادىرنا» ءتىلشىسى.
«ادىلەت ءۇشىن سىياقى» باعدارلاماسى يسلام رەۆوليۋتسياسى ساقشىلارى كورپۋسىنىڭ نەگىزگى جەتەكشىلەرى جانە ونىڭ بىرقاتار بولىمشەسى تۋرالى اقپارات ءۇشىن 10 ميلليون دوللارعا دەيىنسىياقى ۇسىنادى»، – دەلىنگەن حابارلامادا.
اقش ۆەدومستۆوسى بۇل بولىمشەلەردىڭ دۇنيەجۇزىندە تەرروريستىك ارەكەتتەردى جوسپارلاپ، ۇيىمداستىرىپ جانە جۇزەگە اسىراتىنىن مالىمدەدى. مەملەكەتتىك دەپارتامەنتتە بەرىلگەن مالىمەتتەر ءۇشىن اقشالاي سىياقى الۋعا, سونداي-اق قاۋىپسىزدىك ماقساتىندا باسقا جەرگە قونىس اۋدارۋ مۇمكىندىگىنە يە بولۋعا بولاتىنى ايتىلدى.
جالپى العاندا تىزىمدە 10 ادام كورسەتىلگەن. ولاردىڭ قاتارىندا يران ۇلتتىق قاۋىپسىزدىك كەڭەسىنىڭ حاتشىسى ءالي لاريدجاني، جوعارعى كوشباسشى اكىمشىلىگى باسشىسىنىڭ قاۋىپسىزدىك جونىندەگى ورىنباسارى ءالي اسگار حەدجازي، اسكەري كەڭەسشى ياحيا راحيم سافاۆي، ىشكى ىستەر ءمينيسترى ەسكاندار مومەني مەن بارلاۋ ءمينيسترى يسمايل حاتيب بار.
The New York Times باسىلىمىنىڭ جازۋىنشا، اقش مەملەكەتتىك دەپارتامەنتى يراندىق باسشىلار تۋرالى ناقتى قانداي اقپارات ءۇشىن سىياقى تولەۋگە دايىن ەكەنىن ناقتىلاماعان.
ەسكە سالايىق، 28 اقپاندا اقش پەن يزرايل يران اۋماعىنداعى نىساندارعا، ونىڭ ىشىندە تەگەران قالاسىنا سوققى جاساعان ەدى.
