اقمولا وبلىسىنداعى بەستوبە كەنتى "التىن الماس" كومپانياسىندا داۋ تۋدى. ونىڭ 1200 قىزمەتكەرى جۇمىستان شىعارىلعان، دەپ حابارلايدى “ادىرنا” ۇلتتىق پورتالى.
ينفورمبيۋرو جاڭالىقتارىنىڭ مالىمەتىنشە، كەن ورنى جۇمىسىن 2021 جىلدىڭ شىلدەسىندە توقتاتقان. ول كەزدە كومپانيا وڭدەلگەن ءونىمدى ساقتايتىن قويما جوق، شاحتانىڭ ءىشىن سۋ الدى دەپ سىلتاۋراتقان كورىنەدى
كومپانيا تۇرعىنداردى التىندى اشىق ادىسپەن وندىرۋگە كوندىرگىسى كەلگەن. الايدا جارىلىس سالدارىنان تۇرعىن ۇيلەر قيرايدى دەپ حالىق كەلىسپەگەنىن ايتادى.
ءسويتىپ كەن ورنى 29 ناۋرىزدا مىڭنان استام ادامعا ءبىر ايدىڭ ىشىندە تولىعىمەن قىسقارتىلاتىنى تۋرالى حابارلاما جىبەرىپ، بەستوبە كەنتىندەگى جۇمىستىڭ اياقتالاتىنىن جەتكىزگەن.
“بىزدەر "قازاقالتىنمەن" جۇمىس ىستەگەندە ءبارى جاقسى بولدى. ايعاي دا، شۋ دا بولعان جوق. “التىن الماس” كەلگەلى باستالدى. 2 جىل جۇمىسسىز وتىردىق. اقشاسىن تولەدى. ەندى كەلىپ ءاربىر ادامدى قىسقارتۋعا جىبەرىپ وتىر. سول سەبەپتى ايقاي-شۋ باستاپ جاتىرمىز”، - دەيدى بەستوبە كەن ورنىنىڭ جۇمىسشىسى مايدان احمەتوۆ.
كەنشىلەر نارازىلىقتارىن ايتۋ ءۇشىن وبلىس اكىمىنىڭ كەلۋىن تالاپ ەتكەن. الايدا، كەشە ولارمەن ستەپنوگورسك قالاسىنىڭ اكىمى الپىسباي قايىرجانوۆ پەن وبلىس اكىمىنىڭ ورىنباسارى ەلدوس رامازانوۆ، "قازاقالتىنتىڭ" باس ديرەكتورى رۋستەم قاراكەسوۆ جانە استانالىق ينۆەستور كەزدەستى. جۇمىسشى حالىق بيلىكتەگىلەرگە بىرنەشە تالاپتارىن ايتتى.
“جۇمىس ورنىنىڭ ساقتالۋىن تالاپ ەتەمىز. ەكىنشىسى، شاحتادان سۋدىڭ سىرتقا شىعارىلۋىن تالاپ ەتەمىز. جاڭا ينۆەستورعا رۋدنيك وتكەنگە دەيىن ورتاشا جالاقى بەرىپ تۇرۋىن تالاپ ەتەمىز. بەستوبە كەنتىنە اۋديت جۇرگىزۋ ءۇشىن پوتەنتسيالدى ينۆەستورلاردى جىبەرۋ كەرەك”، – دەيدى بەستوبە كەن ورنىنىڭ كەنشىسى ەربول شايموۆ.
ال "التىن الماس" كومپانياسىنا قاراستى "قازاقالتىن" سەرىكتەستىگىنىڭ باس ديرەكتورى جۇمىسشىلاردى قىسقارتۋ جونىندە قاڭتار ايىندا ەسكەرتكەنبىز دەيدى. ءارى جۇمىسسىز قالعان كەنشىلەردى كومپانيانىڭ وزگە دە كەن ورىندارىنا جۇمىسقا شاقىرعان.
“30 قاڭتاردا جۇمىسشىلاردى قىسقارتاتىنىمىز جايىندا الدىن الا حات جىبەرىلدى. سىزدەردىڭ كاسىپوداق وكىلدەرىڭىز ەكى اي بۇرىن بۇل حاتتى الدى. اتالعان حاتقا قاتىستى بارلىق ەسكەرتۋلەر 5 كۇن ىشىندە جىبەرىلۋى كەرەك ەدى. 5 كۇننىڭ ىشىندە سىزدەردىڭ تاراپتان ەشقانداي حات، جاۋاپ كەلمەدى”، – دەيدى "قازاقالتىن" جشس باس ديرەكتورى رۇستەم قاراكەسوۆ.
دەگەنمەن، ءبىر توقتامعا كەلە الماعان كەنشىلەر پرەمەر-ءمينيستردىڭ ءبىرىنشى ورىنباسارى رومان سكلياردىڭ كەلۋىن تالاپ ەتتى. جۇمىسشىلارمەن كەزدەسىپ، ماسەلەنىڭ نۇكتەسىن قويۋعا يندۋستريا جانە ينفراقۇرىلىم ۆيتسە-ءمينيسترى يران شاحران كەلگەن. ۆەدومستۆو وكىلى كەن ءوندىرۋ كومپانياسىمەن كەلىسىمگە كەلىپ، جۇمىستان قىسقارتۋ مەرزىمىن ماۋسىمعا دەيىن شەگەردى. وسى ۋاقىت ارالىعىندا جول كارتاسى دايىندالىپ، كەن ورنى جاڭا ينۆەستورعا نەمەسە ۇكىمەتكە وتەتىن ايتتى.
