بريتاندىق ازىلكەش ساشا بارون كوەن ءوزىنىڭ بورات كەيىپكەرى ءۇشىن قازاقستاندىقتاردان كەشىرىم سۇرادى. بۇل تۋرالى ول Happy Sad Confused پودكاستىندا ايتتى، دەپ حابارلايدى «ادىرنا» ءتىلشىسى.
ول باستاپقىدا بورات كەيىپكەرى البانيادان شىققان بولۋى كەرەك ەكەنىن جەتكىزدى. العاشىندا BBC ارناسىنا ارناپ ازىرلەنگەن كەيىپكەر كەيىن جوبا HBO ارناسىنا اۋىسقان سوڭ وزگەرتىلگەن. سول كەزدە كوميككە امەريكالىق كورەرمەندەر از بىلەتىن باسقا ەلدى تاڭداۋ قاجەت بولعان. وسىلايشا، ونىڭ تاڭداۋى قازاقستانعا تۇسكەن.
«مەن العاش رەت قازاقستان حالقىنان كەشىرىم سۇراعىم كەلەدى. ويتكەنى بوراتتىڭ قازاقستانعا ەشقانداي قاتىسى جوق. سوندىقتان، قازاقستاندىقتار، ارالارىڭىزدا ارنايى تاپسىرما الىپ، بەلگىلى ءبىر ماقساتپەن وسىندا كەلگەندەر بولسا، سول ميسسيادان باس تارتۋلارىڭىزدى سۇرايمىن. مەن ەشكىمگە زيان كەلتىرگىم كەلگەن جوق. مەن سىزدەردىڭ حالقىڭىز بەن مادەنيەتتەرىڭىزدى قۇرمەتتەيمىن. وتىنەمىن، مۇنى جەكە قابىلداماڭىزدار»، – دەدى كوەن كورەرمەندەر الدىندا.
كوەن بورات كەيىپكەرىنە قاتىستى قازاقستان ەلشىلىگىنىڭ رەاكتسياسىن دا ەسكە الدى. ونىڭ ايتۋىنشا، ەل وكىلدەرى كەيىپكەردىڭ مۇرتىنا نازار اۋدارىپ، قازاقستاندىقتاردىڭ سىرت كەلبەتى بوراتقا ۇقسامايتىنىن ايتقان.
«كەشىرىم سۇرايمىن. مەن سىزدەردىڭ اكتسەنتتەرىڭىزدى سالا المايمىن، ويتكەنى قالاي سويلەيتىندەرىڭىزدى بىلمەيمىن. سىزدەر بوراتقا مۇلدە ۇقسامايسىزدار. قازاقستان موڭعولياعا جاقىن ورنالاسقان، بىراق سىزدەر مۇلدە باسقا حالىقسىزدار»، – دەدى اكتەر.
كوەننىڭ سوزىنشە، بورات تۋرالى ازىلدەر قازاقستاننىڭ وزىنە ەمەس، ادامداردىڭ بۇل ەل تۋرالى از بىلۋىنە بايلانىستى بولعان. ول قازاقستان جونىندە ماردىمدى اقپاراتى جوق ادامدارعا ەل تۋرالى ويدان شىعارىلعان وقيعالاردى ايتىپ بەرگەن.
ايتا كەتەيىك، «بورات» ءفيلمى 2006 جىلى جارىققا شىعىپ، وندا قازاقستان مەن ونىڭ تۇرعىندارىنىڭ بەينەلەنۋىنە بايلانىستى ەلدە سىنعا ۇشىرادى. ءفيلمنىڭ باستى كەيىپكەرى — اقش-قا ساپار شەگىپ، ءتۇرلى ابسۋردتى جاعدايلارعا تاپ بولاتىن ويدان شىعارىلعان قازاقستاندىق جۋرناليست.
