پرەمەر-مينيستر جۇمىس ساپارىمەن قىرعىزستانعا باردى، دەپ حابارلايدى "ادىرنا" ءتىلشىسى ۇكىمەتتىڭ ءباسپاسوز قىزمەتىنە سىلتەپ.
مەملەكەت باسشىسىنىڭ تاپسىرماسىمەن ۇكىمەت باسشىسى ولجاس بەكتەنوۆ قىسقا مەرزىمدى جۇمىس ساپارىمەن قىرعىز رەسپۋبليكاسىنا باردى. بىشكەكتە بەكتەنوۆتى قىرعىزستان پرەزيدەنتى سادىر جاپاروۆ قابىلدادى.
ول پرەزيدەنت قاسىم-جومارت توقاەۆتىڭ سالەمىن جەتكىزىپ، قازاقستان ۇكىمەتى ەكىجاقتى ساۋدا-ەكونوميكالىق ىنتىماقتاستىقتى ودان ءارى دامىتۋ ءۇشىن بار كۇش-جىگەردى جۇمساۋعا دايىن ەكەنىن ءبىلدىردى.
قوس تاراپ ءوزارا تاۋار اينالىمىن $2 ملرد-قا دەيىن ۇلعايتۋ جونىندەگى بىرلەسكەن شارالاردى تالقىلادى.
ودان بولەك قازاقستان $260 ملن سوماسىنا 195 تاۋار پوزيتسياسى بويىنشا ەكسپورتتى ۇلعايتۋعا دايىن. ازىق-تۇلىك، ونەركاسىپ، مۇناي-حيميا، قۇرىلىس، فارماتسەۆتيكا جانە باسقا دا سالالاردىڭ الەۋەتى زور ەكەنى ايتىلدى.
پرەمەر بەكتەنوۆ 2024 جىلعى ۆەگەتاتسيالىق كەزەڭدە مەملەكەتارالىق پايدالانۋداعى سۋ شارۋاشىلىعى وبەكتىلەرىنىڭ جۇمىس رەجيمدەرىن بەكىتۋدىڭ ماڭىزىن اتاپ ءوتتى.
كەزدەسۋ بارىسىندا تاراپتار ءبىلىم، مادەنيەت جانە تۋريزم سالالارىنداعى ءوزارا ءىس-قيمىل ماسەلەلەرىن دە تالقىلادى.
ەسكە سالا كەتەيىك، قازاقستاننىڭ جامبىل وبلىسىمەن شەكتەسەتىن قىرعىزستاننىڭ كيروۆ سۋ قويماسى 81%-عا تولعانى تۋرالى جازعان بولاتىنبىز.
