جازدىڭ ءۇش ايىندا «بۋراباي» ۇلتتىق پاركىنە ميلليونعا جۋىق تۋريست كەلگەن. بۇل رەتتە اۋماققا كەلۋشىلەردىڭ ەكولوگيالىق نەگىزدەلگەن نورماسى 890 مىڭ ادامدى قۇرايدى. 2026 جىلعى تۋريستىك ماۋسىمنىڭ قورىتىندىسى تۋرالى بريفينگتە اقمولا وبلىسىنىڭ تۋريزم باسقارماسىنىڭ باسشىسى اندرەي پودگۋرسكي مالىمدەدى.
جالپى وڭىردەگى تۋريستىك اعىن ءوسىپ كەلەدى. ءبىرىنشى جارتىجىلدىقتا رەسمي ورنالاستىرۋ ورىندارىندا 350 مىڭنان استام ادام قابىلداندى. بۇل وتكەن جىلدىڭ سايكەس كەزەڭىمەن سالىستىرعاندا 23 پايىزعا كوپ. دەمالۋشىلاردىڭ شامامەن 99 پايىزىن قازاقستان تۇرعىندارى قۇرادى. جىل قورىتىندىسى بويىنشا وبلىسقا ەكى ميلليوننان استام تۋريست كەلەدى دەپ كۇتىلۋدە.
«جاز مەزگىلى ءداستۇرلى تۇردە ءوڭىرىمىز ءۇشىن باستى سىناق بولدى. بيىل اپتاپ ىستىققا بايلانىستى ۇلتتىق پاركتەرگە تۇسەتىن جۇكتەمە بارىنشا جوعارى بولدى. سوعان قاراماستان، ينفراقۇرىلىم ءوز مىندەتىن اتقاردى. تۋريستەر اعىنى قازاقستانداعى ىشكى ءتۋريزمنىڭ تۇراقتى ءوسىپ كەلە جاتقانىن كورسەتتى»، – دەدى اندرەي پودگۋرسكي.
باسقارما مالىمەتىنشە، بيىلعى ماۋسىمدا ششۋچينسك-بۋراباي كۋرورتتىق ايماعىندا تۋريستىك ينفراقۇرىلىمدى دامىتۋ جۇمىستارى جالعاستى. مۇندا 200-دەن استام رەسمي ورنالاستىرۋ نىسانى جانە 29 جابدىقتالعان جاعاجاي جۇمىس ىستەيدى. ماۋسىم ايىندا بۋراباي كولىنىڭ جاعاسىندا جاڭا مۋنيتسيپالدىق جاعاجاي اشىلىپ، كولدە ەلەكترلى وزەن ترامۆايلارى ىسكە قوسىلدى. ال زەرەندىگە جاز ايلارىندا شامامەن 100 مىڭ ادام كەلگەن.
سونىمەن قاتار دەمالۋشىلاردىڭ كوپ بولۋى تابيعي اۋماقتارعا تۇسەتىن جۇكتەمەنى دە ارتتىرادى. جازدىڭ ءۇش ايىندا «بۋرابايدان» شامامەن 500 توننا قوقىس شىعارىلدى. تاعى 200 تونناعا جۋىق قالدىق «كوكشەتاۋ» مۇتپ اۋماعىندا، ونىڭ ىشىندە زەرەندى اۋدانىندا جينالدى. جىل سوڭىنا دەيىن بۋراباي جانە زەرەندى اۋداندارىندا ورگانيكالىق قالدىقتاردى كومپوستتاۋ كەشەندەرىن ىسكە قوسۋ جوسپارلانىپ وتىر.
