وڭىردەگى تۇرعىندار مەن جەر ۋچاسكەلەرىنىڭ يەلەرى 2025 جىل ءۇشىن مۇلىك سالىعىن 1 قازانعا دەيىن تولەۋى قاجەت. تولەم مەرزىمى جانە بەرەشەگى بار ازاماتتارعا قولدانىلاتىن شارالار تۋرالى بريفينگتە اقمولا وبلىسى بويىنشا مەملەكەتتىك كىرىستەر دەپارتامەنتى باسقارماسى باسشىسىنىڭ مىندەتىن اتقارۋشى ماحامبەت نۇرلان ايتتى.
مۇلىك سالىعىن جەكە مەنشىگىندە تۇرعىن ءۇيى، ساياجاي قۇرىلىستارى، گاراجى، اۆتوتۇراعى جانە باسقا دا جىلجىمايتىن مۇلىك نىساندارى، سونداي-اق جەر ۋچاسكەلەرى بار جەكە تۇلعالار تولەيدى.
سالىق سوماسى سالىق كودەكسىندە بەلگىلەنگەن فورمۋلالارعا سايكەس سالىق بازاسى نەگىزىندە ەسەپتەلەدى.
«بيىل قازان ايىنىڭ باسىندا جەكە تۇلعالاردىڭ مەنشىگىندەگى جىلجىمايتىن مۇلىك پەن جەر ۋچاسكەلەرى ءۇشىن 2025 جىلعا ەسەپتەلگەن مۇلىك سالىعىن تولەۋ مەرزىمى اياقتالادى»، – دەدى ماحامبەت نۇرلان.
سالىقتى جىلجىمايتىن مۇلىك ورنالاسقان جەر بويىنشا تولەۋ قاجەت. بەلگىلەنگەن مەرزىمدە بەرەشەك وتەلمەگەن جاعدايدا، 2 قازاننان باستاپ زاڭدا كوزدەلگەن شارالار قولدانىلادى. كەشىكتىرىلگەن ءار كۇن ءۇشىن ءوسىمپۇل ەسەپتەلەدى. سونداي-اق بەرەشەگى بار ازاماتتاردىڭ كەيبىر بانك وپەراتسيالارىنا شەكتەۋ قويىلۋى مۇمكىن.
ەگەر بەرەشەك مولشەرى 1 اەك-تەن اسسا، بەلگىلەنگەن مەرزىم اياقتالعاننان كەيىن سالىق ورگانى سالىق بۇيرىعىن شىعارادى. قارىز بەس جۇمىس كۇنى ىشىندە وتەلمەگەن جاعدايدا، قۇجات جەكە سوت ورىنداۋشىسىنا بەرىلەدى. بۇدان كەيىن بانكتەگى شوتتار مەن مۇلىككە تىيىم سالىنۋى، سونداي-اق قازاقستان اۋماعىنان شىعۋعا شەكتەۋ قويىلۋى مۇمكىن. سونىمەن قاتار بورىشكەر جەكە سوت ورىنداۋشىسىنىڭ قىزمەت اقىسىن تولەۋگە مىندەتتى.
