Kökşetauda Respublika künıne arnalǧan saltanatty jiynda öŋırdıŋ äleumettık-ekonomikalyq damuyna jäne türlı salalardyŋ örkendeuıne üles qosqan azamattarǧa memlekettık nagradalar tabystaldy. Is-şara barysynda bırqatar azamat «Aqmola oblysynyŋ qūrmettı azamaty» ataǧyna ie boldy.
Merekelık köŋıl küi öŋırdıŋ qol jetkızgen eleulı jetıstıkterımen de aişyqtaldy. Oblys äkımı Marat Ahmetjanov qūttyqtau sözınde aimaqtyŋ damu körsetkışterıne toqtaldy. Aqmola oblysy elımızdıŋ jetekşı agrarlyq-industriialyq ortalyqtarynyŋ bırı retındegı ornyn nyǧaityp keledı. Soŋǧy üş jylda öŋırge 2,2 trillion teŋge investisiia tartylyp, onyŋ 1,5 trillion teŋgesı jeke investisiialarǧa tiesılı boldy.
Auyl şaruaşylyǧy mausymyndaǧy aua raiynyŋ qūbylmalylyǧyna qaramastan, jergılıktı diqandar 6,1 million tonna astyq jinady. Onyŋ şamamen 90 paiyzy üşınşı synypqa jatady, al 70 paiyzy ışkı jäne älemdık naryqta joǧary sūranysqa ie Hi-Pro joǧary aquyzdy sanatyna säikes keledı. Oblys äkımı öŋır ekonomikasyn ärtaraptandyru baǧytynda atqarylyp jatqan jūmystardy da atap öttı. Maily daqyldar egıletın alqaptar tört eseden astam ūlǧaiyp, 838 myŋ gektarǧa jettı. Jaŋa süt-tauar fermalary aşylyp, zamanaui käsıporyndar ıske qosyluda. Tau-ken öndıru jäne metallurgiia salalarynda da jaŋa öndırıs oryndary damyp keledı.
Aqmolalyqtardyŋ kündelıktı ömırındegı oŋ özgerıster de aiqyn baiqalady. Oblysta gazdandyru jūmystary qarqyndy jürgızılıp, kögıldır otyn 28 eldı mekenge jetkızıldı. Sonyŋ nätijesınde 220 myŋnan astam tūrǧyndy gazben qamtuǧa mümkındık tudy. Aldaǧy jyldary «soltüstık tarmaq» arqyly jüzdegen auyl men qalaǧa gaz jetkızu josparlanyp otyr.
Sonymen qatar öŋırde 16 temırjol vokzaly jaŋǧyrtylyp, būl körsetkış respublika boiynşa rekordtyq nätijege ainaldy. Tūraqty äue reisterın damytu maqsatynda Kökşetau äuejaiy oblystyŋ menşıgıne berıldı. Aimaqta tozyǧy jetken ǧimarattardyŋ ornyna zamanaui tūrǧyn üi keşenderın saluǧa mümkındık beretın renovasiia baǧdarlamasy da jüzege asyrylyp jatyr. Jaŋa auruhanalar, zamanaui ülgıdegı mektepter men sport keşenderı salynuda. Öŋır sportşylary halyqaralyq jarystarda Qazaqstannyŋ abyroiyn asqaqtatyp keledı.
Oblys äkımı atap ötkendei, Aqmola oblysy men tūtas elımızdıŋ jetıstıkterın bır ǧana sözge syiǧyzu mümkın emes.
«Qazaqstan 35 jyl ışınde ekonomikany nyǧaitu, öŋırlerdı damytu jäne azamattardyŋ ömır süru sapasyn arttyru baǧytynda eleulı nätijelerge qol jetkızdı. Jalpyūlttyq maqsattardy jüzege asyruǧa Aqmola oblysy da öz ülesın qosyp keledı. Öŋır elımızdıŋ jetekşı agrarlyq-industriialyq ortalyqtarynyŋ bırı retındegı ūstanymyn däiektı türde nyǧaityp otyr», – dedı Marat Ahmetjanov.
Saltanatty jiynnyŋ şaryqtau sätı öŋırdıŋ üzdık azamattaryn marapattau räsımı boldy. Memlekettık nagradalarǧa Aqmolanyŋ 50 azamaty ie bolyp, öŋırdıŋ bırqatar körnektı ökılıne «Aqmola oblysynyŋ qūrmettı azamaty» ataǧy berıldı. Jinalǧandar aldynda söz söilegen oblys äkımı Marat Ahmetjanov ärbır jetıstıktıŋ artynda öŋır tūrǧyndarynyŋ kündelıktı adal eŋbegı men jasampazdyqqa ūmtylysy tūrǧanyn atap öttı.
Atalǧan ataqqa ie bolǧan Aqan serı atyndaǧy joǧary mädeniet kolledjınıŋ oqytuşysy Qūralai Ydyrysova būl marapat – köp jylǧy eŋbegıne berılgen joǧary baǧa ekenın atap öttı. Ol merekege orai jerlesterın qūttyqtap, öŋırde jüzege asyrylyp jatqan özgerısterge toqtaldy.
«Bügın barşa qazaqstandyqtardy, jerlesterımdı, kökşetaulyqtardy jäne Aqmola oblysynyŋ tūrǧyndaryn ūlttyq mereke – Respublika künımen şyn jürekten qūttyqtaǧym keledı! Qalamyzdy qazır tanu qiyn: ol ünemı özgerıp keledı. Jaŋa nysandar salynyp, abattandyru jūmystary jürgızılıp jatyr. Kökşetaudyŋ damyp kele jatqanyna, mädeniet pen sportqa köŋıl bölınıp jatqanyna quanamyn », – dedı ol.
Saltanatty jiynda auyl şaruaşylyǧy salasynyŋ ökılı, «Zaporoje Agro» JŞS-nıŋ Jaqsy audanyndaǧy bas agronomy Svetlana Petrenko da marapattaldy. Ol şirek ǧasyrdan berı tuǧan jerınde eŋbek etıp keledı. Mamandyǧyn taŋdauǧa äkesınıŋ yqpaly bolǧanyn aitqan ol bügınde otbasylyq eŋbek dästürın jalǧastyryp jür.
«Jerge degen süiıspenşılıktı maǧan äkem darytty. Ol da bas agronom bolǧan, men äkemnıŋ jolyn jalǧastyryp kelemın. Jerde eŋbek etıp jürgenıme 25 jyl boldy. Osyndai ūly memlekettık mereke qarsaŋynda köp jylǧy eŋbegımnıŋ baǧalanuy men üşın öte quanyşty. Eŋbegıme joǧary baǧa berıp, memlekettık nagradamen marapattaǧany üşın Qazaqstan Prezidentıne alǧysymdy bıldıremın», – dedı Svetlana Petrenko.
Merekelık jiyn oblystyŋ üzdık ärtısterı men şyǧarmaşylyq ūjymdary öner körsetken ülken konserttık baǧdarlamamen aiaqtaldy. Önerpazdar körermenderge jarqyn muzykalyq nömırler ūsynyp, merekelık köŋıl küi syilady.
