19 قازان – قۇتقارۋشىلار كۇنى. وسىدان 31 جىل بۇرىن ءدال وسى كۇنى توتەنشە جاعدايلار جونىندەگى مەملەكەتتىك كوميتەت قۇرىلىپ، كەيىن بۇل داتا قۇتقارۋشىلاردىڭ كاسىبي مەرەكەسىنە اينالعان بولاتىن. ادام ءومىرىنىڭ قاۋىپسىزدىگىن قامتاماسىز ەتۋدى مۇرات تۇتقان قىزمەت وكىلدەرى ءۇشىن بۇل - ەڭبەكتىڭ باعالاناتىن، قىزمەتتىك بورىشقا ادالدىقتىڭ ۇلىقتالاتىن كۇنى.
وسىنداي اتاۋلى كۇندە سوڭعى كەزەكشىلىگىنەن ورالماعان ازاماتتاردىڭ ەسىمى دە ەرەكشە قۇرمەتپەن اتالادى. ولاردىڭ ءومىر جولىن ەسكە الۋ – ماماندىقتىڭ جاۋاپكەرشىلىگىن سەزىنۋ، ادام ءومىرىن قورعاۋ جولىنداعى ەڭبەكتىڭ قادىرىن ءتۇسىنۋ. قازاقستاننىڭ ورتكە قارسى قىزمەتى تاريحىندا قىزمەتتىك بورىشىنا ادال بولىپ، جالىنمەن ارپالىسىپ جان قيعان ازاماتتار از ەمەس.
1989 ج. الماتى. 1989 جىلعى 20 مامىر الماتىنىڭ ورتكە قارسى قىزمەتى تاريحىندا اۋىر كۇن بولىپ قالدى. الماتى-2 تەمىرجول ستانساسىنىڭ كىرمە جولدارىندا بولعان اپاتتان گاز تسيستەرناسى زاقىمدانىپ، ءورت شىقتى. ءورتتى ءسوندىرۋ بارىسىندا بولعان جارىلىس وقيعا ورنىندا جۇمىس ىستەپ جاتقان ءورت سوندىرۋشىلەرگە اۋىر سوققى بولدى. ەركىن يسقاقوۆ سول جەردە قازا تاپتى، باسقا قىزمەتكەرلەر اۋىر كۇيىك الدى. وسى اپات سالدارىنان توعىز ءورت ءسوندىرۋشى ومىردەن ءوتتى. ولار – فاريد شاريپوۆ، قۇرالحان اققۇلوۆ، يلشات سافارگاليەۆ، ۆلاديمير نيكۋلەنكو، يسلام ابدرانوۆ، راسۋل كاسىموۆ، ميحايل ماليكوۆ، سەءيىلءالءىمتاەۆ جانە ەركىن يسقاقوۆ. ءورت سوندىرۋشىلەردىڭ ءىس-قيمىلى قالعان گاز تسيستەرنالارىنىڭ جارىلۋىنا جانە ءورتتىڭ تۇرعىن اۋماققا تارالۋىنا جول بەرمەۋگە مۇمكىندىك بەردى. ولاردىڭ ارقايسىسى قايتىس بولعاننان كەيىن «قىزىل جۇلدىز» وردەنىمەن ناگرادتالدى.
1990 ج. الماتى. الماتى گارنيزونى تاعى ءبىر قىزمەتكەرىنەن ايىرىلدى. 1990 جىلعى 3 قاڭتاردا قالاداعى قۇرىلىس الاڭدارىنىڭ بىرىندە مۇنارالى كراننىڭ كابيناسى ورتەندى. كابينادا قوسۋلى قالعان ەلەكتر جىلىتقىشتان ءورت شىققان. وقيعا ورنىنا كەلگەن №6 ءورت ءسوندىرۋ ءبولىمىنىڭ قىزمەتكەرلەرى اۆتوساتىنى پايدالانۋعا كىرىستى. ىشكى قىزمەت سەرجانتى بالابەك احمەدوۆ ساتىعا كوتەرىلىپ، ءورت ءسوندىرۋ وقپانىمەن جالىندى باسقان. ءورت از ۋاقىت ىشىندە ءسوندىرىلدى. الايدا وسى كەزدە ول تۇرعان ساتى قۇلاپ، بالابەك 29 مەتر بيىكتىكتەن قازانشۇڭقىرعا قۇلاپ، قىزمەتتىك مىندەتىن ورىنداۋ كەزىندە ءورت ءسوندىرۋشى قازا تاپتى. ونىڭ قۇرمەتىنە ءوزى قىزمەت ەتكەن بولىمدە مەموريالدىق تاقتا ورناتىلىپ، ەسىمىن ەسكە الۋعا ارنالعان سپورت جارىستارى ۇيىمداستىرىلىپ تۇرادى.
1993 ج. سەمەي. 1993 جىلعى 4 جەلتوقساندا سەمەيدەگى تسەمەنت زاۋىتىندا بولعان ءورت ۆالەري بەلونوجكو مەن راحيمعالي يكەنوۆتىڭ ءومىرىن قيدى. ءورتتى بارلاۋ جانە ءسوندىرۋ جۇمىستارى كەزىندە عيماراتتىڭ تەمىربەتون جابىنى وپىرىلىپ، ەكى قىزمەتكەر ءۇيىندى استىندا قالدى. ەكەۋى دە ىشكى قىزمەت پراپورششيگى، بولىمشە كومانديرى بولعان.ولاردىڭ ەرلىگى مەن جانقيارلىعى مەملەكەتتىك دەڭگەيدە باعالانىپ، قايتىس بولعاننان كەيىن «ەرلىگى ءۇشىن» مەدالىمەن ماراپاتتالدى. سەمەيدە ەكى كوشەگە ولاردىڭ ەسىمى بەرىلدى، قىزمەت ەتكەن ءبولىم عيماراتىنا مەموريالدىق تاقتا ورناتىلدى. ارىپتەستەرى ولاردى تاجىريبەلى، قىزمەتىن جاۋاپكەرشىلىكپەن اتقارعان ماماندار رەتىندە ەسكە الادى.
2005 ج. قوستاناي. 2005 جىلعى 17 جەلتوقساندا پاركەت وندىرەتىن اعاش وڭدەۋ تسەحىنىڭ كەپتىرۋ بوىلىگىندە بولعان ءورت ىشكى قىزمەت سەرجانتتارى رينات اشۋباەۆ پەن ءسابيتنۇرباەۆتىڭ ءومىرىن جالمادى. ولار قوستاناي وبلىسى ءورت ءسوندىرۋ قىزمەتىنىڭ №2 مامانداندىرىلعان ءورت ءسوندىرۋ بولىمىندە ءورت ءسوندىرۋشى-قۇتقارۋشى بولىپ قىزمەت اتقارعان. ءورتتى ءسوندىرۋ بارىسىندا شاڭ-اۋا قوسپاسى جارىلىپ، جالىن تسەحتىڭ بۇكىل اۋماعىنا ءبىر مەزەتتە تاراعان. اۋىر جاراقات العان قۇتقارۋشىلار وقيعا ورنىندا قازا تاپتى. قۇتقارۋشىلار قايتىس بولعاننان كەيىن ءىىى دارەجەلى «ايبىن» وردەنىمەن ناگرادتالدى.
2007 ج. قاراعاندى. 2007 جىلعى 26 شىلدەدە قاراعاندى قالاسىنداعى توعىز قاباتتى تۇرعىن ۇيدە بولعان ءورتتە ىشكى قىزمەت سەرجانتى ارتەم نوۆيكوۆ قازا تاپتى. ول قاراعاندى وبلىسى ءورت ءسوندىرۋ قىزمەتىنىڭ مامانداندىرىلعان جاساعىندا اعا ءورت ءسوندىرۋشى-قۇتقارۋشى بولىپ قىزمەت اتقارعان.
وقيعا كەزىندە ارتەم قاۋىپسىزدىك بەكەتىندە بەكەتشى بولعان. وسى ساتتە ءبىر ايەل جانىپ جاتقان پاتەردە ۇلىنىڭ قالعانىن ايتىپ، ونى قۇتقارۋدى ءوتىنگەن. ارتەم بىردەن بالانى ىزدەۋگە كىرىسكەن. الايدا پاتەر ىشىنە جىلدام ءارى قارقىندى تارالعان جالىن ونىڭ كەرى قايتار جولىن بوگەپ قالعان. جوعارى تەمپەراتۋرانىڭ اسەرىنەن جاراقات العان ءورت ءسوندىرۋشى وقيعا ورنىندا جان تاپسىردى. قىزمەتتىك بورىشىن اتقارۋ كەزىندە كورسەتكەن ەرلىگى ءۇشىن ارتەم نوۆيكوۆ قايتىس بولعاننان كەيىن ءىىى دارەجەلى «ايبىن» وردەنىمەن ناگرادتالدى.
2010 ج. استانا. 2010 جىلعى 17 اقپاندا استانا قالاسىنداعى جەراستى قورعانىش قۇرىلىسىندا بولعان ءورت ءۇش قىزمەتكەردىڭ ءومىرىن قيدى. ولار - ەلوردالىق توتەنشە جاعدايلار دەپارتامەنتى باستىعىنىڭ ورىنباسارى، ورتكە قارسى قىزمەت پولكوۆنيگى ۆالەري زايتسەۆ، №3 مامانداندىرىلعان ءورت ءسوندىرۋ ءبولىمى باستىعىنىڭ ورىنباسارى، ورتكە قارسى قىزمەت اعا لەيتەنانتى سايات ابەەۆ جانە №6 ءورت ءسوندىرۋ ءبولىمىنىڭ باستىعى، ورتكە قارسى قىزمەت مايورى رۋسلان كاكىشەۆ.
ءورت بارىسىندا رۋسلان كاكىشەۆ جوعالىپ كەتكەن. ۆالەري زايتسەۆ گاز-تۇتىننەن قورعاۋ قىزمەتى بۋىنىنىڭ قۇرامىنداارىپتەسىن ىزدەۋگە اتتانىپ, قايتا ورالماعان. وسى ءورتتىءسوندىرۋ كەزىندە سايات ابەەۆ تە قازا تاپتى.
كەيىن ۆالەري زايتسەۆ، سايات ابەەۆ جانە رۋسلان كاكىشەۆ ءىى دارەجەلى «ايبىن» وردەنىمەن ناگرادتالدى. ولاردىڭەسىمدەرىن ماڭگى ەستە قالدىرۋ ماقساتىندا استانا قالاسىتجد ءورت ءسوندىرۋ قىزمەتىنىڭ №2 مامانداندىرىلعان ءورتءسوندىرۋ ءبولىمى اۋماعىندا مەموريالدىق تاقتالارورناتىلىپ, اللەيا اشىلدى.
2012 ج. تەمىرتاۋ. 2012 جىلعى 15 مامىردا تەمىرتاۋ قالاسىنداعى «ارسەلورميتتال تەميرتاۋ» اكتسيونەرلىك قوعامىنىڭ اگلومەراتسيالىق تسەحىندا بولعان ءورت 2 ءورت ءسوندىرۋشىنىڭ ءومىرىن قيدى. قىزمەتتىك مىندەتىن اتقارۋ بارىسىندا قاراعاندى وبلىسى ء«ورت ءسوندىرۋشى» اق فيليالىنىڭ №1 جاساعىنا قاراستى №14 ءورت ءسوندىرۋ ءبولىمىنىڭ قاراۋىل باستىعى رومان بالاباشين مەن ءورت ءسوندىرۋشى تۇياق ۇپباەۆ قازا تاپتى. وندىرىستىك تسەحتاعى جالىنمەن كۇرەس ولاردىڭ سوڭعى قىزمەتءى بولدى. ەكەۋىنىڭ دە ارتىندا جۇبايلارى مەن ەكى-ەكىدەن بالاسى قالدى. رومان بالاباشين مەن تۇياق ۇپباەۆ «ەرلىگى ءۇشىن» مەدالىمەن ناگرادتالدى. ولاردىڭ ەسىمدەرىن ماڭگى ەستە قالدىرۋ ماقساتىندا وزدەرى قىزمەت ەتكەن №1 جاساق اۋماعىندا ەسكەرتكىش ورناتىلدى.
2018 ج. ريددەر.2018 جىلعى 22 ساۋىردە ريددەر قالاسىندا قۇرعاق ءشوپ ورتىنە بارا جاتقان ءورت ءسوندىرۋ ءاۆتوموبيلى اۋدارىلدى. اپات سالدارىنان شىعىس قازاقستان وبلىسى تج دەپارتامەنتىنىڭ ريددەر قالاسىنداعى №1 مامانداندىرىلعان ءورت ءسوندىرۋ ءبولىمىنىڭ بولىمشە كومانديرى، ازاماتتىق قورعاۋ پراپورششيگى ۆلاديمير سينەلنيكوۆ قازا تاپتى.
2020 ج. باتىس قازاقستان وبلىسى. 2020 جىلعى 18 قىركۇيەكتە باتىس قازاقستان وبلىسى تج دەپارتامەنتىنىڭ №6 ءورت ءسوندىرۋ ءبولىمىنىڭ جۇرگىزۋشى-قىزمەتكەرى، ازاماتتىق قورعاۋ ستارشيناسى جانگەلدى سيسەناليەۆ مەرت بولدى. ءورت ءسوندىرۋ كولىگىمەن جولدا كەلە جاتقاندا الدىڭعى دوڭگەلەك جارىلىپ، جول-كولىك وقيعاسى بولعان.
2021 ج. اقسۋ. ارىستانبەك ماشراپ ءورت ءسوندىرۋ قىزمەتىنە 2018 جىلى كەلگەن. پاۆلوداردا تۋعان جاس مامان بولىمشە كومانديرىنە دەيىن ءوسكەن. ول جاستايىنان گرەك-ريم كۇرەسىمەن اينالىسىپ، وبلىستىق جانە حالىقارالىق جارىستارعا قاتىسقان. سپورتتاعى دايىندىعىن، جيناقىلىعىن جاۋاپكەرشىلىگى مول ماماندىقپەن ۇشتاستىرعان ازاماتتىڭ قىزمەت جولى ۇزاققا سوزىلمادى.
2021 جىلعى 25 اقپاندا تاڭعى ساعات 7:46-دا اقسۋ قالاسىنىڭ اقسۋ شاعىن اۋدانىنداعى تۇرعىن ۇيدە ءورت شىققانى تۋرالى حابار ءتۇسكەن. ءتورت بولمەلى ۇيدەگى ءورت 80 شارشى مەتر اۋماقتى قامتىعان. وقيعا ورنىندا جۇمىس ىستەپ جاتقاندا №12 ءورت ءسوندىرۋ بەكەتىنىڭ بولىمشە كومانديرى، ازاماتتىق قورعاۋ سەرجانتى ارىستانبەك ماشراپتىڭ جاعدايى ناشارلاعان. ول مەديتسينالىق مەكەمەگە ەس-ءتۇسسىز جەتكىزىلىپ، كەيىن دارىگەرلەر ونىڭ قايتىس بولعانىن حابارلادى. 1997 جىلى تۋعان ارىستانبەكتىڭ ارتىندا جۇبايى مەن ۇلى قالدى. ول قازاسىنان كەيىن ءىىى دارەجەلى «ايبىن» وردەنىمەن ماراپاتتالدى. قىزمەت ەتكەن بەكەتىندە مەموريالدىق تاقتا ورناتىلدى.
2021 ج. جامبىل وبلىسى. 2021 جىلعى 26 تامىزدا جامبىل وبلىسىنىڭ بايزاق اۋدانىنداعى اسكەري ءبولىمنىڭ وق-دارىلەر قويماسىندا ءورت شىقتى. ساعات 18:47-دە 101 پۋلتىنە قويماداعى ءتۇتىن تۋرالى حابار تۇسكەن. وقيعا ورنىنا ءورت ءسوندىرۋ بولىمشەلەرى جىبەرىلىپ، ءورتتى سوندىرۋمەن قاتار ماڭايداعى ەلدى مەكەندەردىڭ تۇرعىندارىن قاۋىپسىز جەرگە كوشىرۋ جۇمىستارى جۇرگىزىلدى. تجم-ءنىڭ سول كەزدەگى جەدەل مالىمەتىندە 710 تۇرعىننىڭ ەۆاكۋاتسيالانعانى كورسەتىلگەن.
ءورت پەن جارىلىس ازاماتتىق قورعاۋ جۇيەسىنە اۋىر قازا اكەلدى. وسى وقيعا سالدارىنان مەيىرجان ايمانوۆ، الەكساندر ميكروپۋلو، سەرگەي زايكين، تاڭىربەرگەن تورەبەكوۆ، عافان قۋاتبەك، ارنۇر تەمىربولاتوۆ، ەلدوس ساندىباەۆ، ادىلەت ادىلبەك، ءالىبي كەڭەس جانە جانىبەك تۇرمانوۆ ومىردەن ءوتتى. ولاردىڭ اراسىندا ءورت سوندىرۋگە باسشىلىق جاساعان وفيتسەرلەر، قاراۋىل باستىعى، ءورت ءسوندىرۋشى-قۇتقارۋشىلار مەن جۇرگىزۋشى بولدى.
ازاماتتىق قورعاۋ پولكوۆنيگى مەيىرجان ايمانوۆ جامبىل وبلىسى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى باستىعىنىڭ ورىنباسارى ەدى. قىزمەتتىك بورىشىن اتقارۋدا كورسەتكەن ەرجۇرەكتىگى مەن جانقيارلىعى وعان «حالىق قاھارمانى» اتاعى بەرىلدى.
2022 ج. استانا. 2022 جىلعى 16 قاراشادا استاناداعى باۋىرجان مومىشۇلى داڭعىلىندا ورنالاسقان «قاھارمان» تۇرعىن ءۇي كەشەنىندە ءورت شىقتى. ساعات 10:43-تە تۇسكەن شاقىرتۋدان كەيىن جەتكەن ءورت سوندىرۋشىلەر 11-قاباتتاعى پاتەردىڭ جانىپ جاتقانىن انىقتادى. قويۋ ءتۇتىن تۇرعىنداردىڭ وزدىگىنەن سىرتقا شىعۋىن قيىنداتقان. ءورت سوندىرۋشىلەر ادامداردى قۇتقارۋعا كىرىسكەن.
اسقار زابيكۋلين 12-قاباتتاعى پاتەردىڭ تەرەزەسىنەن قۇتقارۋ ارقانىمەن تومەن ءتۇسىپ، ورتەنىپ جاتقان 11-قاباتتاعى پاتەرگە كىرگەن. ىشتەن ەكى ادامدى تاۋىپ، ارىپتەستەرى بۇزىپ اشقان ەسىك ارقىلى الىپ شىققان. بۇدان كەيىن كورشى پاتەرگە كىرىپ، ءتۇتىن اراسىنداعى بالكوننان وزدىگىنەن شىعا الماي تۇرعان ون جاستاعى بالانى تاپقان. وسى قۇتقارۋ ارەكەتتەرىنىڭ ناتيجەسىندە ول ءۇش ادامنىڭ ءومىرىن ساقتاپ قالدى.
ادامداردى قۇتقارۋ كەزىندە اسقاردىڭ دەنەسىنىڭ شامامەن 80 پايىزىن كۇيىك شالعان. بىرنەشە كۇنگە سوزىلعان ەمگە قاراماستان، ول 2022 جىلعى 20 قاراشادا ومىردەن وزدى. كورسەتكەن ەرلىگى ءۇشىن ءى دارەجەلى «ايبىن» وردەنىمەن ناگرادتالدى. كەيىن استاناداعى №6 مامانداندىرىلعان ءورت ءسوندىرۋ بولىمىنە ونىڭ ەسىمى بەرىلىپ، ەسكەرتكىشى ورناتىلدى.
2023 ج. الماتى. 2023 جىلعى 8 مامىردا الماتىداعى ىلە الاتاۋى مەملەكەتتىك ۇلتتىق تابيعي پاركىنىڭ اۋماعىندا ءورت ءسوندىرۋ كەزىندە ازاماتتىق قورعاۋ سەرجانتى ارسلان قۇرمانبەكوۆ قازا تاپتى. ول الماتى قالاسى توتەنشە جاعدايلار دەپارتامەنتىنىڭ №7 ءورت ءسوندىرۋ بولىمىندە اعا ءورت ءسوندىرۋشى-قۇتقارۋشى بولىپ قىزمەت اتقارعان.قىزمەتتىك بورىشىن اتقارۋدا كورسەتكەن باتىلدىعى مەن جانقيارلىعى ءۇشىن ول ءىىى دارەجەلى «ايبىن» وردەنىمەن ناگرادتالدى.
2023 جىلدىڭ ماۋسىمىندا اباي وبلىسىنىڭ باتپاەۆ ورمان شارۋاشىلىعى «سەمەي ورمانى» مەملەكەتتىك ورمان تابيعي رەزەرۆاتىندا» ورمان ورتەنگەن ەدى. ءورت سالدارىنان 60 مىڭ گەكتار ورمان قورى جويىلعان. «سەمەي-ورمانى» رەزەرۆاتى نوۆوشۋلبينسك فيليالىنىڭ 15 قىزمەتكەرى قازا بولدى.
2024 ج. قۇلسارى. 2024 جىلعى 29 مامىردا قۇلسارى قالاسىندا سۋ سورۋ بويىنشا اۆاريالىق-قۇتقارۋ جۇمىستارىن جۇرگىزۋ كەزىندە ازاماتتىق قورعاۋ سەرجانتى بەيبارىس راقىم مەرت بولدى. ول اتىراۋ وبلىسى توتەنشە جاعدايلار دەپارتامەنتىنىڭ №1 مامانداندىرىلعان ءورت ءسوندىرۋ بولىمىندە بولىمشە كومانديرى بولىپ قىزمەت اتقارعان.
2001 جىلى تۋعان جاس قىزمەتكەر سۋ تاسقىنىنا قارسى جۇمىستارعا قاتىسقان. قۇتقارۋشى ماحامبەت، قىزىلقوعا جانە جىلىوي اۋداندارىندا بوگەتتەردءى نىعايتۋعا اتسالىسقان. قۇلسارىداعى «باسشى اتا» زيراتىندا جينالعان سۋدى سورىپ شىعارۋ كەزىندە جوعارى كەرنەۋلى ەلەكتر توگىنا ءتۇسىپ، قازا تاپقان. بەيبارىس قايتىس بولعاننان كەيىن راحىمجان قوشقارباەۆ اتىنداعى ءىىى دارەجەلى «ايبىن» وردەنىمەن ماراپاتتالدى.
2024 ج. قارقارالى. 2024 جىلعى 6 قازاندا قاراعاندى وبلىسى قارقارالى اۋدانىنىڭ اقىن قىستاعى ماڭىنداعى دالا ءورتىن ءسوندىرۋ كەزىندە اعا ءورت ءسوندىرۋشى-قۇتقارۋشى حالي حايرات قازا تاپتى. ول وبلىستىق توتەنشە جاعدايلار دەپارتامەنتىنىڭ №24 ءورت ءسوندىرۋ بولىمىندە قىزمەت اتقارعان.
2026 ج. اباي وبلىسى. 2026 جىلعى تامىزدا اباي وبلىسىندا ەكى ءورت ءسوندىرۋ قىزمەتكەرىنىڭ جول اپاتىنان قازا تاپقانى تۋرالى حابار تارادى. سەمەي–كۋرچاتوۆ تاسجولىندا بولعان كولىك سوقتىعىسى ەرمەك سىدىقوۆ پەن ارنۇر ادىكەنوۆتىڭ ءومىرىن قيعان.
2026 ج. باتىس قازاقستان. 2026 جىلعى 3 قىركۇيەكتە باتىس قازاقستان وبلىسى جانىبەك اۋدانىنداعى «تاتران» قىستاعى ماڭىندا قۇرعاق ءشوپ ءورتىن ءسوندىرۋ كەزىندە ميرشات مارسۇلى حاليۋللين اۋىر جاراقات الدى. ءورت ءسوندىرۋ ءبولىمىنىڭ ۆزۆود كومانديرى قىزمەتىن اتقارعان ازامات قىزمەتتىك مىندەتىن ورىنداۋ كەزىندە قازا تاپقان. ول «ەرلىگى ءۇشىن» مەدالىمەن ماراپاتتالدى.
بۇل قىزمەتتىك بورىشىن اتقارۋ كەزىندە قازا تاپقان قۇتقارۋشىلاردىڭ تۇتاس ءتىزىمءى ەمەس. ەل قاۋىپسىزدىگى مەن ادام ءومىرىن قورعاۋ جولىندا جانىن قيعان ءاربىر قىزمەتكەردىڭ ەسىمى قۇرمەتكە، ەرلىگى ۇرپاق جادىندا ساقتالۋعا لايىق. جالىنمەن ارپالىسىپ جان قيعانداردىڭ عۇمىرى ۇزىلگەنىمەن، ولاردىڭ اتقارعان ءىسى حالىق جادىندا قالادى. امان قالعان ادامدار، قورعالعان ۇيلەر، اپاتتان ساقتالعان ەلدى مەكەندەر – سول ەڭبەكتىڭ جەمىسى.
ديانا اسان
«ادىرنا» ۇلتتىق پورتالى
