2026 جىلعى 6 ناۋرىزىندا حالىقارالىق ايەلدەر كۇنى قارساڭىندا قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسى وتاندىق ايەل-عالىمدارعا ارنالعان اكادەميك ن.بازانوۆا اتىنداعى ماراپاتتى سالتاناتتى تۇردە تابىستاۋ ءراسىمىن وتكىزدى.
اتاۋلى ءىس-شاراعا وتاندىق عىلىمدى دامىتۋعا ايرىقشا ۇلەس قوسقان جەتەكشى ايەل-عالىمدار، عىلىمي قىزمەتكەرلەر، وقىتۋشىلار، سونداي-اق جوعارى وقۋ ورىندارى مەن عىلىمي ۇيىمداردىڭ باسشىلارى قاتىسىپ، جالپى سانى شامامەن 400-گە جۋىق ادام جينالدى.
اكادەميك بازانوۆا نايليا ورازعۇلقىزى – قازاقستاندىق كورنەكتى عالىم، فيزيولوگ. قازاقستان مەن ورتالىق ازياداعى العاشقى ايەل-اكادەميك، بيولوگيا عىلىمىنىڭ جاڭا سالاسى - اۋىل شارۋاشىلىعى جانۋارلارىنىڭ فيزيولوگياسىنىڭ نەگىزىن قالاۋشى. ول قازاق ايەلدەرى اراسىنان شىققان تۇڭعىش بيولوگيا عىلىمىنىڭ دوكتورى، پروفەسسور، قازاق كسر عىلىم اكادەمياسىنىڭ اكادەميگى.
اكادەميك ن.بازانوۆا اتىنداعى ماراپات – قازاقستان عىلىمىنىڭ دامۋىنا ەلەۋلى ۇلەس قوسقان، جوعارى عىلىمي جەتىستىكتەرگە جەتكەن، جاڭالىقتار اشقان نەمەسە قولدانبالى زەرتتەۋلەر جۇرگىزگەن عالىم ايەلدەردى ماراپاتتاۋعا ارنالعان قۇرمەت بەلگىسى. بۇل ماراپات وتاندىق عىلىمداعى نازىك جانداردىڭ جەتىستىكتەرىن مويىنداۋ، دارىپتەۋ جانە جاس عالىمداردى ىنتالاندىرۋ ماقساتىندا تاعايىندالعان.
قر ۇلتتىق عىلىم اكادەمياسىنىڭ پرەزيدەنتى ا.كۇرىشباەۆ شارانىڭ اشىلۋىنداعى سويلەگەن سوزىندە نازىك جانداردىڭ عىلىم مەن ءبىلىم سالاسىنىڭ دامۋىنا قوسىپ وتىرعان ۇلەسىنىڭ ەرەكشە ەكەنىن اتاپ ءوتتى. بۇگىندە قازاقستاندا عىلىمي زەرتتەۋلەرمەن اينالىساتىن نازىك جانداردىڭ سانى جىل سايىن ارتىپ، عىلىمي قىزمەتكەرلەردىڭ شامامەن 56 پايىزىن قۇراپ وتىرعانىن (12 893) جەتكىزدى. ولاردىڭ ىشىندە عىلىم دوكتورلارى – 898, عىلىم كانديداتتارى – 2 859, PhD دوكتورلار – 2 229 جانە بەيىنى بويىنشا دوكتورلار – 185. بۇل كورسەتكىشتەر عىلىم سالاسىنداعى جەتىستىكتەردىڭ ەلەۋلى بولىگى ايەل عالىمداردىڭ ەڭبەگىمەن بايلانىستى ەكەنىن اتاپ ءوتتى. سونداي-اق، مەملەكەت باسشىسى قويعان مىندەتتەردى جۇزەگە اسىرۋ ءۇشىن عىلىمدى باسقارۋ تاسىلدەرىن جاڭعىرتۋ، حالىقارالىق عىلىمي ورتالىقتارمەن ىقپالداستىقتى كۇشەيتۋ جانە ايەل عالىمداردى جان-جاقتى قولداۋ قاجەتتىگىمەن ءبولىستى. وسى باعىتتاعى ماڭىزدى قادام رەتىندە ۇلتتىق عىلىم اكادەمياسى العاش رەت كورنەكتى عالىم، العاشقى ايەل-اكادەميك نايليا بازانوۆا اتىنداعى ماراپاتتى تاعايىنداعانىن اتاپ ءوتىپ، بيىل ەكىنشى رەت ەلىمىزدىڭ ۇزدىك ايەل عالىمدارى ماراپاتتالاتىنىن سوزگە تيەك ەتتى.
ا.كۇرىشباەۆ ءسوزىنىڭ سوڭىندا: «مەملەكەت باسشىسى ق.ك. توقاەۆتىڭ باستاماسىمەن ءبىز «ادىلەتتى قوعام» قۇرۋدى الدىمىزعا ماقسات ەتىپ قويىپ وتىرمىز. وسى كەشەندى جوسپاردىڭ ىشىندە ايەلدەردىڭ عىلىم سالاسىن دامىتۋداعى الار ورنى ەرەكشە بولماق. ەندەشە الدىمىزدا جاۋاپتى مىندەتتەر تۇر. ولاردى ابىرويلى دەڭگەيدە جۇزەگە اسىرۋعا بارلىعىمىز بىرىگىپ ات سالىسۋىمىز ءتيىس. وسى تاريحي ماڭىزى بار ىستەردە عىلىم سالاسىندا ەڭبەك ەتىپ جۇرگەن سىزدەرگە، بارلىق نازىك جاندارعا تابىس تىلەيمىن. سىزدەرگە زور دەنساۋلىق، وتباسىلارىڭىزعا اماندىق، جاندارىڭىزعا رۋحاني سۇلۋلىق، زامانىمىزعا تىنىشتىق تىلەيمىن! جۇزدەرىڭىزدەن ارقاشان دا كوكتەمنىڭ كۇنىندەي كۇلكىسى كەتپەسىن» - دەپ ىستىق ىقىلاسىن ءبىلدىردى.
سالتاناتتى جيىن باعدارلاماسىنا ساي الماتى قالاسى اكىمىنىڭ قۇتتىقتاۋىن باسقارما باسشىسى كاجدەنبەك ازيز ورالبەكۇلى جەتكىزىپ، قر پرەزيدەنتىنىڭ جانىنداعى ۇلتتىق عىلىم اكادەمياسىنىڭ اكادەميگى، س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ءبىرىنشى پرورەكتورى كايداروۆا ديليارا راديكقىزى، قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى – رەكتورى بەيبىتكۇل سارسەمحانقىزى كاريموۆا، نازارباەۆ ۋنيۆەرسيتەتىنىڭ ۆيتسە-پروۆوستى ايدا قىستاۋبايقىزى ساگينتاەۆا، سونداي-اق قر پرەزيدەنتىنىڭ جانىنداعى ۇعا جاس عالىمدار كەڭەسىنىڭ مۇشەسى،جاڭگىر حان اتىنداعى بقاتۋ عىلىم دەپارتامەنتىنىڭ ديرەكتورى ينديرا سالتانقىزى بەيشوۆا ءسوز سويلەپ، وتاندىق عىلىمدى دامىتۋداعى ايەل-عالىمداردىڭ رولىنە توقتالدى.
ءىس-شارا اياسىندا ءداستۇرلى تۇردە ۇيىمداستىرىلعان اكادەميك ن.بازانوۆا اتىنداعى ماراپات تابىستاۋ ءراسىمى ءوتتى. اتالعان ماراپاتپەن وتاندىق عىلىمنىڭ دامۋىنا ايرىقشا ۇلەس قوسىپ جۇرگەن، عىلىمي الەۋەتى جوعارى ءارى عىلىمنىڭ ءتۇرلى باعىتتارىندا ەلەۋلى ناتيجەلەرگە قول جەتكىزگەن 66 جەتەكشى ايەل-عالىمدار مەن عىلىمي قىزمەتكەرلەر سالتاناتتى تۇردە ماراپاتتالدى.
بۇل ماراپات ەلىمىزدىڭ عىلىمي قاۋىمداستىعىندا تابىستى ەڭبەك ەتىپ جۇرگەن ايەل عالىمداردىڭ جەتىستىكتەرىن مويىنداۋدىڭ جانە ولاردىڭ عىلىمدى دامىتۋداعى ءرولىن ايقىنداۋدىڭ ماڭىزدى كورىنىسى بولدى. اكادەميك ن.بازانوۆانىڭ عىلىمي مۇراسى جاس زەرتتەۋشىلەر ءۇشىن ۇلگى بولىپ، ولاردىڭ بولاشاقتا ۇلكەن جەتىستىكتەرگە جەتۋىنە جول اشادى دەپ سەنەمىز!
