قازاقستان پرەزيدەنتى قاسىم-جومارت توقاەۆ رەسەيلىك عالىم الاش پارتياسى جەتەكشىلەرىنىڭ ءبىرى - ۆيكتور كوزودويعا ءاليحان بوكەيحان تۋرالى كىتابى ءۇشىن “دوستىق” وردەنىن بەردى.
27 قازاندا ماسكەۋدە قازاقستان ەلشىلىگىندە «ءاليحان بوكەيحانوۆ: ادام – ءداۋىر» كىتابىنىڭ تۇساۋكەسەرى ءوتتى. اۆتور ءوز جۇمىسىندا بۇرىن عىلىمي اينالىمدا پايدالانىلماعان دەرەككوزدەردى، ماتەريالدار مەن فاكتىلەردى: مۇراعات قۇجاتتارىن، ەستەلىكتەردى، سول جىلدارداعى گازەت-جۋرنالداعى جاريالانىمداردى پايدالانعان.
بۇعان دەيىن قازاقستاننىڭ بەس قالاسىندا (استانا، الماتى، پاۆلودار، سەمەي، قاراعاندى) كىتاپتىڭ تۇساۋكەسەرى ءساتتى وتكەنى اتاپ ءوتىلدى. سودان كەيىن ماسكەۋدە العاش رەت رەسەيدىڭ بەلگىلى عالىمدارى مەن ساراپشىلارىنىڭ قاتىسۋىمەن كىتاپتىڭ تۇساۋكەسەرى ءوتتى.
“بۇگىن بىزگە «دوستىق» وردەنىنەن بولەك، قازاقستان پرەزيدەنتى قاسىم-جومارت توقاەۆ مىرزانىڭ «كىتابىمدى زور ىقىلاسپەن وقىعانى» تۋرالى جەكە العىس حاتى دا كەلدى. قازىر مەنىڭ كىتاپتارىمدى تەك تاريح جاناشىرلارى مەن عالىمدارى عانا ەمەس، ەگەمەن، تاۋەلسىز مەملەكەتتەردىڭ باسشىلارى دا وقيدى دەپ ايتۋعا تولىق دالەلىم بار”،- دەيدى پروفەسسور كوزودوي.
بۇل ونىڭ تۇڭعىش جانە جالعىز مەملەكەتتىك ناگراداسى ەكەنىن، ول ءۇشىن عالىم توقاەۆقا شىن جۇرەكتەن العىسىن بىلدىرەتىنىن اتاپ ءوتتى.
“بۇل مەنىڭ قازاقستان مەن رەسەي اراسىنداعى ەكىجاقتى قارىم-قاتىناستاردى نىعايتۋعا جانە دامىتۋعا قوسقان قاراپايىم ۇلەسىم بولسىن”، – دەپ قوستى عالىم.
ايتپاقشى، ساراپشىلار ءاليحان بوكەيحانوۆ تۋرالى كىتاپتى ونىڭ تۇلعاسى تۋرالى العاشقى تەرەڭ جانە تۇتاس عىلىمي زەرتتەۋ دەپ اتادى. دەگەنمەن تاريحي ادىلەتتىلىكتى قالپىنا كەلتىرۋ اياسىندا الاش قوزعالىسى قىزمەتىنىڭ كوپتەگەن قىرلارى ءالى اشىلعان جوق دەگەن پىكىر بار.
