بۇگىن - قۇتقارۋشىلار كۇنى. قۇتقارۋشى – ماماندىق قانا ەمەس، بۇل بىرقاتار كاسىبىنە بەرىلگەن ازاماتتار ءۇشىن كادىمگى ءومىر ءسۇرۋ سالتىنا اينالعان. سونىڭ ءبىرى ساتباەۆ قالاسىنداعى №2 ءورت ءسوندىرۋ بولىمشەسىندە قاراۋىل باستىعى بولىپ قىزمەت ىستەيتىن باعلان الشىنباەۆپەن ەگەمەن قازاقستان ءتىلشىسى سۇحباتتاستى، دەپ حابارلايدى «ادىرنا» ۇلتتىق پورتالى.
– ءبىزدىڭ قىزمەتىمىز – ادامداردى قۇتقارۋ. مەن 2009 جىلدان بەرى وسى سالادامىن. قاتارداعى ءورت ءسوندىرۋشى بولىپ كىرگەن ەدىم، كەيىن بولىمشە كومانديرى بولدىم. بىلتىردان بەرى قاراۋىلعا باسشىلىق جاسايمىن. قىزمەتىمىزدى ورىنداعانىمىز ءۇشىن حالىق العىسىن جاۋدىرىپ جاتادى. بىراق العىس ورنىنا ايقاي ەستىگەن كەزىمىز دە بولعان، – دەپ باستادى اڭگىمەسىن باعلان.
ورتەنىپ جاتقان ءۇيدىڭ ءبىر بولمەسىندە تۇتىنگە تۇنشىعىپ ءولىم حالىندە جاتقان، اۋزىنان اراقتىڭ ءيسى مۇڭكىپ تۇرعان جىگىت اعاسىن قۇتقارۋشىلار سىرتقا شىعارىپ، جاردەم كورسەتىپ، امان الىپ قالادى. سول ساتتە ءۇيدىڭ ورتەنىپ جاتقانىن ەستىگەن الگى كىسىنىڭ ايەلى جۇمىسىنان سۇرانىپ كەلەدى دە، كۇيەۋىنىڭ ءولىم اۋزىنان امان قالعانىن ەستيدى. سوسىن قۋانۋدىڭ ورنىنا اشۋعا بەرىلىپ، قۇتقارۋشىلارعا «بۇل پالەنى نەمەنەگە قۇتقاردىڭدار؟ ءولمەسە نەگە ومىرەم قالمادى؟» دەپ كادىمگىدەي ۇرسىپ-ۇرسىپ تاستايدى.
– مۇندايدى ءبىرىنشى رەت كورۋىمىز عوي. ءبارىمىز ءبىرتۇرلى بولىپ قالدىق. سويتسەك، ءبىز قۇتقارعان ادام ايەلىنىڭ تاپقان-تايانعانىن اراققا سالىپ، جانجال شىعارعاننان باسقا ەشتەڭەمەن شارۋاسى جوق، ابدەن جۇيكەسىنە تيگەن جان بولىپ شىقتى، - دەيدى باعلان.
قۇتقارۋشى ومىرىندە سان ءتۇرلى جاعدايلار كەزدەسەدى. ارينە، ادامعا اراشا ءتۇسىپ، اجالدان، مايىپ بولۋدان قۇتقارىپ قالۋ – قاستەرلى مىندەت. سول ءۇشىن دە ەل العىسىنا بولەنەسىڭ. باعلان ايتقانداي، «ايقاي» ەستىپ قالاتىن كەزدەر دە بولادى ەكەن. قۇتقارۋشىلار ءومىرى سونىسىمەن دە قىزىق شىعار، بالكىم؟
«ادىرنا» ۇلتتىق پورتالى
