سەۋلدە قازاقستان پرەزيدەنتى قاسىم-جومارت توقاەۆ كورەيا ازاماتتارىن ماراپاتتادى. سالتاناتتى راسىمدە مەملەكەت باسشىسى ەكى ەل اراسىنداعى دوستىق پەن ستراتەگيالىق سەرىكتەستىكتىڭ ماڭىزىن اتاپ ءوتتى. ماراپاتتالعاندار اراسىندا پروفەسسور، زەرتتەۋشىلەر، قوعام جانە مەملەكەت قايراتكەرلەرى بار، دەپ حابارلايدى "ادىرنا" رەسمي مالىمەتكە سۇيەنىپ.
پرەزيدەنت قازاق جانە كورەي حالىقتارىنىڭ ءوزارا قۇرمەتى مەن دوستىق قارىم-قاتىناسى بەرىك ەكەنىن ايتتى. ونىڭ سوزىنشە، گەوگرافيالىق قاشىقتىققا قاراماستان، قازاقستان مەن كورەيانى ورتاق مۇددە مەن ءوزارا سەنىم بايلانىستىرادى.
"ەكى ەلدىڭ اراسى الشاق بولعانىمەن، ءبىزدى ءوزارا قۇرمەت پەن ورتاق مۇددە جاقىنداستاردى. كورەيا ەكونوميكاسى اينالاسىنداعى باسەكەلەستىك پەن سىن-قاتەرلەرگە قاراماستان ويداعىداي دامۋدا. بۇل – حالىقتىڭ ەڭبەكقورلىعى مەن ءىرى كاسىپكەرلەردىڭ ارقاسى. قازاق حالقى مەن بيلىك وكىلدەرى دوستاس كورەيا ەلىنە شىنايى سىيلاستىقپەن قارايدى. كورەيا رەسپۋبليكاسى – قازاقستاننىڭ ستراتەگيالىق سەرىكتەسى. ءبىز كورەيانى حالىقارالىق ابىروي-بەدەلى زور مەملەكەت رەتىندە بىلەمىز. بۇگىندە مەملەكەتتەرىمىزدىڭ سان قىرلى ىنتىماقتاستىعى جىل ساناپ نىعايىپ كەلەدى. وسىدان بەس جىل بۇرىن كەڭەيتىلگەن ستراتەگيالىق سەرىكتەستىك تۋرالى مالىمدەمە قابىلداعان ەدىك", – دەدى قاسىم-جومارت توقاەۆ.
پرەزيدەنت ەكى ەل اراسىنداعى مادەني-گۋمانيتارلىق بايلانىستىڭ دا ەرەكشە ماڭىزعا يە ەكەنىن ايتتى. قازاقستانداعى كورەي دياسپوراسىنىڭ قازاق-كورەي قارىم-قاتىناسىن دامىتۋعا قوسىپ وتىرعان ۇلەسى جوعارى ەكەنىن اتاپ ءوتتى.
بۇگىندە قازاقستاندا ءجۇز مىڭنان استام ەتنيكالىق كورەي تۇرادى. كوريو-سارام قاۋىمداستىعى ەلدىڭ قوعامدىق جانە ەكونوميكالىق ومىرىنە بەلسەندى ارالاسىپ، قوعامدىق كەلىسىم مەن تۇراقتىلىقتى نىعايتۋعا ۇلەس قوسىپ كەلەدى. قازاقستاندا كورەي مادەني ورتالىقتارى جۇمىس ىستەيدى، الماتىداعى اكادەميالىق كورەي تەاترى ونەر كورسەتەدى. سونىمەن قاتار كورەي تىلىندە گازەت پەن راديوحابارلار شىعارىلادى.
قاسىم-جومارت توقاەۆ ماراپات يەلەرىنە العىسىن ءبىلدىرىپ، ولاردىڭ ەكى ەل اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسىن جوعارى باعالادى.
«دوستىق» وردەنى كورەيا رەسپۋبليكاسى ۇلتتىق جينالىسىنىڭ 22-شاقىرىلىم دەپۋتاتتارى مەن سون گيۋ مەن لي چجە-كانعا، سەۋل كيبەرۋنيۆەرسيتەتىنىڭ پرەزيدەنتى لي سان گيۋنگە تابىستالدى.
سونداي-اق حانگۋك شەت تىلدەرى ۋنيۆەرسيتەتىنىڭ پروفەسسورى، ورتالىق ازيانى زەرتتەۋ ينستيتۋتىنىڭ ديرەكتورى سون يون حۋن ماراپاتتالدى. ول 20 جىلدان بەرى قازاق تىلىنەن ساباق بەرىپ، قازاقستاننىڭ تاريحى مەن مادەنيەتىن كورەيادا ناسيحاتتاپ كەلەدى.
بۇدان بولەك، Hyundae General Hospital كوپبەيىندى كلينيكاسىنىڭ ديرەكتورى كيم بۋ سوپ II دارەجەلى «دوستىق» وردەنىنە يە بولدى.
پرەزيدەنتتىڭ ايتۋىنشا، بۇل ماراپاتتار كورەيانىڭ كورنەكتى تۇلعالارىنا قازاقستان حالقىنىڭ شىنايى قۇرمەتى مەن ريزاشىلىعىنىڭ بەلگىسى. مەملەكەت باسشىسى ماراپات يەلەرى الداعى ۋاقىتتا دا قازاق-كورەي بايلانىستارىن دامىتۋعا ۇلەس قوسارىنا سەنىم ءبىلدىردى.
