قازاقستاندىق «KÖLEÑKE» (18+) انيماتسيالىق جوباسى اقش-تىڭ پورتلەند قالاسىندا وتكەن Portland Festival of Cinema, Animation & Technology حالىقارالىق فەستيۆالىندە ارنايى جۇلدەگە يە بولدى، دەپ حابارلايدى "ادىرنا" ءتىلشىسى Bugin.kz-كە سىلتەپ.
«قازاقانيماتسيا» شىعارماشىلىق بىرلەستىگى شىعارعان جوبا حوررور-انيماتسيا باعىتىندا قازىلار القاسىنىڭ The DarkCat Award ارنايى جۇلدەسىنە لايىق دەپ تانىلدى. ماراپات تۋىندىنىڭ حوررور جانرىنداعى كوركەمدىك شەشىمى مەن شىعارماشىلىق شەبەرلىگى ءۇشىن بەرىلگەن. «KÖLEÑKE» جوباسىنىڭ ستسەناريىن ەرنار تىلەۋباەۆ جازعان. رەجيسسەرى – ماقسات اياپوۆ، سۋرەتشى-قويۋشىسى – دايىر جيەنقۇلوۆ، اتقارۋشى پروديۋسەرى – نۇرجيگيت سۇلتانبەردى.
فەستيۆالدىڭ نەگىزگى باعدارلاماسىنا «قازاقانيماتسيانىڭ» تاعى ەكى جۇمىسى – «Su perisi» فولك-حوررورى مەن «Shańyraq» دراماسى دا ەندى.
