ءانشىنى «ماناس» حالىقارالىق اۋەجايىندا رەسمي تۇلعالار، كونتسەرت ۇيىمداستىرۋشىلارى جانە جانكۇيەرلەرى قارسى الدى. ولاردىڭ قاتارىندا قىرعىزستان پرەزيدەنتى اكىمشىلىگىنىڭ اقپاراتتىق ساياسات قىزمەتىنىڭ جەتەكشىسى دايىربەك ورۋنبەكوۆ پەن پرەزيدەنت ءىس باسقارماسى باسشىسىنىڭ ءبىرىنشى ورىنباسارى بووبەك ساليمجانوۆ بولدى.
شاكيرانىڭ كونتسەرتى بۇگىن ساعات 19:00-دە بىشكەكتەگى «بىشكەك ارەنا» ستاديونىندا باستالادى. استانا ۋاقىتىمەن بۇل – 18:00. ۇيىمداستىرۋشىلاردىڭ مالىمەتىنشە، بۇل ءانشىنىڭ ورتالىق ازياداعى العاشقى كونتسەرتى بولماق. بۇعان دەيىن قىرعىزستان پرەزيدەنتىنىڭ ءىس باسقارماسى شاراعا الەمنىڭ 33 ەلىنەن كورەرمەن كەلەتىنىن حابارلاعان.
بىشكەككە تابان تىرەگەن ءانشى Instagram پاراقشاسىندا «سالام، كىرگىزستان!» دەگەن جازبامەن سۋرەت جاريالاپ، جەرگىلىكتى جانكۇيەرلەرىنە سالەم جولدادى.
كونتسەرت ءارتىستىڭ Las Mujeres Ya No Lloran World Tour اتتى الەمدىك تۋرنەسى اياسىندا ۇيىمداستىرىلىپ وتىر. كورەرمەندەر كەش بارىسىندا Hips Don't Lie, Waka Waka, Whenever, Wherever جانە She Wolf سەكىلدى تانىمال اندەرىن، سونداي-اق جاڭا البومىنداعى تۋىندىلارىن تىڭداي الادى.
ءىرى مۋزىكالىق شاراعا بايلانىستى بىشكەك قالاسىنىڭ پوليتسياسى كۇشەيتىلگەن قىزمەت رەجيمىنە كوشتى.
