گەرات قالاسىندا اۋعانستان بويىنشا قازاقستان پرەزيدەنتىنىڭ ارنايى وكىلى ەركىن تۇقىموۆ باستاعان رەسمي جانە ىسكەرلىك دەلەگاتسيالاردىڭ قاتىسۋىمەن بىرقاتار ءىس-شارا ءوتتى، دەپ حابارلايدى «ادىرنا» ءتىلشىسى.
سىرتقى ىستەر مينيسترلىگىنىڭ مالىمەتىنشە، ساپار اياسىندا ەركىن تۇقىموۆ اۋعانستاننىڭ باتىسىنداعى گەرات پروۆينتسياسىنىڭ گۋبەرناتورى نۋر احماد يسلامجارمەن كەزدەسكەن. تاراپتار ساۋدا-ەكونوميكالىق جانە وڭىرارالىق ىنتىماقتاستىقتىڭ قازىرگى جاعدايى مەن پەرسپەكتيۆالارىن تالقىلاپ، وڭىرلەردىڭ الەۋەتى جانە ىسكەر توپتار اراسىنداعى تىكەلەي ءوزارا ءىس-قيمىلدى كەڭەيتۋ مۇمكىندىكتەرى تۋرالى اقپارات الماسقان.
«قازاقستاننىڭ مەن اۋعانستاننىڭ باتىس وڭىرلەرى اراسىندا ساۋدا، ونەركاسىپتىك كووپەراتسيا، كولىك جانە لوگيستيكا سالالارىندا تىكەلەي بايلانىستار ورناتۋعا باعىتتالعان «West2West» فورماتىن دامىتۋعا ەرەكشە نازار اۋدارىلدى. ساۋدا-ەكونوميكالىق ءىس-شارالارعا قازاقستان رەسپۋبليكاسى ساۋدا جانە ينتەگراتسيا مينيسترلىگى، ماڭعىستاۋ جانە باتىس قازاقستان وبلىستارى اكىمدىكتەرىنىڭ، سونداي-اق ەكى ەلدىڭ ىسكەر توپتارىنىڭ وكىلدەرى قاتىستى»،– دەلىنگەن حابارلامادا.
ساپار اياسىندا «قازاقستان – اۋعانستان: وڭىرارالىق ىنتىماقتاستىق» اتتى بيزنەس-فورۋم وتكەن. فورۋمدا ءوزارا ساۋدانى كەڭەيتۋدىڭ، كاسىپكەرلەر اراسىندا تىكەلەي بايلانىستار ورناتۋدىڭ، ونەركاسىپتىك كووپەراتسيا مەن كولىك-لوگيستيكالىق بايلانىستاردى دامىتۋدىڭ پراكتيكالىق ماسەلەلەرى تالقىلانعان. اۋعانستان تاراپى ونەركاسىپ تاۋارلارىنىڭ، اۋىل شارۋاشىلىعى ونىمدەرى مەن ازىق تۇلىك كورمەسىن ۇسىنعان.
ەسكە سالايىق، 2026 جىلعى قاڭتار-شىلدە ايلارىندا ەكى ەل اراسىنداعى تاۋار اينالىمى 581,1 ملن اقش دوللارىن قۇراپ، 2,4 ەسەگە وسكەن ەدى. قازاقستاننىڭ ەكسپورتى 572,9 ملن دوللاردى قۇراعان، ونىڭ ىشىندە ۇن – 215,6 ملن، بيداي – 122 ملن، وسىمدىك مايى – 51,1 ملن دوللار. اۋعانستاننان يمپورت 8,2 ملن دوللار بولعان. سالىستىرۋ ءۇشىن قازاقستان مەن يران اراسىنداعى ساۋدا اينالىمى 2025 جىلى 430 ملن دوللاردى قۇراعان.
