بۇگىن، 27 قىركۇيەك كۇنى داۋرەن قوسانوۆ قازاقستان رەسپۋبليكاسىنىڭ قورعانىس ءمينيسترى لاۋازىمىنان بوساتىلعانى حابارلانعان. ونىڭ ورنىن ايدوس مىرزاحمەتوۆ باستى، دەپ حابارلايدى "ادىرنا".
"مەملەكەت باسشىسىنىڭ جارلىعىمەن ايدوس ساكەنۇلى مىرزاحمەتوۆ قازاقستان رەسپۋبليكاسىنىڭ قورعانىس ءمينيسترى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى", دەلىنگەن اقوردا حابارلاماسىندا.
ايدوس مىرزاحمەتوۆ – قر قارۋلى كۇشتەرى اسكەري اكادەمياسىنىڭ 2002 جىلعى تۇلەگى. قىزمەت جىلدارى ىشىندە ۆزۆود كومانديرىنەن باستاپ مەملەكەتتىك كۇزەت قىزمەتى دەپارتامەنتىنىڭ باستىعىنا دەيىنگى جولدان ءوتىپ، جوعارى كاسىبيلىگىمەن، مىنەزىنىڭ بەرىكتىگىمەن جانە جاۋاپكەرشىلىگىمەن ەرەكشەلەندى.
2024 جىلعى قاڭتاردا قازاقستان رەسپۋبليكاسى پرەزيدەنتىنىڭ جارلىعىمەن ارنايى وپەراتسيالار كۇشتەرىنىڭ قولباسشىسى بولىپ تاعايىندالدى. ءىى دارەجەلى "ايبىن" وردەنىمەن ناگرادتالعان. 2026 جىلى مامىر ايىندا وعان جوعارى اسكەري شەن – گەنەرال-مايور اسكەري اتاعى بەرىلگەن بولاتىن.
ەسكە سالايىق، 24 قىركۇيەكتە كاسپي تەڭىزىندە اسكەري وقۋ-جاتتىعۋ كەزىندە اۋا رايىنىڭ ناشارلاپ، جەلدىڭ كۇشەيۋى سالدارىنان 17 اسكەري قىزمەتشىنى تەڭىز اعىزىپ اكەتتى. ولاردىڭ 14-ءى قازا تاۋىپ، ۇشەۋى قۇتقارىلدى.
وقيعا بويىنشا ەكى قىلمىستىق ءىس قوزعالدى. ولار قىلمىستىق كودەكستىڭ 453-بابىنىڭ 2-بولىگى ("اۋىر زارداپتارعا اكەپ سوققان قىزمەتكە سالعىرت قاراۋ") جانە 465-بابى ("كەمە جۇرگىزۋ قاعيدالارىن بۇزۋ") بويىنشا تەرگەلىپ جاتىر.
كۇدىكتىلەر انىقتالىپ، قورعانىس مينيسترلىگى جۇيەسىنىڭ بەس لاۋازىمدى تۇلعاسى ۇستالعان بولاتىن.
