مەملەكەت باسشىسى قاسىم-جومارت توقاەۆ ايدا بالاەۆانى جاڭا قىزمەتكە تاعايىندادى، دەپ حابارلايدى “ادىرنا”.
ءتيىستى قۇجاتقا بۇگىن، 31 تامىزدا پرەزيدەنت قول قويدى.
"مەملەكەت باسشىسىنىڭ جارلىعىمەن ايدا عالىمقىزى بالاەۆا قازاقستان رەسپۋبليكاسى قاۋىپسىزدىك كەڭەسى توراعاسىنىڭ ورىنباسارى لاۋازىمىنا تاعايىندالدى", – دەپ جازىلعان دۇيسەنبى كۇنى اقوردانىڭ Telegram-ارناسىندا جاريالانعان رەسمي حابارلامادا.
ايدا بالاەۆا 2000 جىلى اباي اتىنداعى الماتى مەملەكەتتىك ۋنيۆەرسيتەتىن، ال 2007 جىلى قازاق ۇلتتىق اگرارلىق ۋنيۆەرسيتەتىن تامامداعان.
1999-2004 جىلدارى الماتى وبلىستىق اقپارات جانە قوعامدىق كەلىسىم باسقارماسىندا جۇمىس ىستەدى. 2004 جىلى الماتى قالالىق اقپارات باسقارماسىنىڭ تالداۋ جانە بولجاۋ ءبولىمىن باسقاردى. 2006 جىلى الماتى قالاسى ىشكى ساياسات دەپارتامەنتىنىڭ ديرەكتورى بولدى. 2010-2014 جىلدارى استانا قالاسى اكىمىنىڭ ورىنباسارى قىزمەتىن اتقاردى.
2014 جىلى پرەزيدەنت اكىمشىلىگىنە اۋىسىپ، ىشكى ساياسات ءبولىمىنىڭ مەڭگەرۋشىسى قىزمەتىن اتقاردى. 2019 جىلى ايدا بالاەۆا پرەزيدەنتتىڭ كومەكشىسى – پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى بولدى.
2020 جىلى اقپارات جانە قوعامدىق دامۋ ءمينيسترى بولىپ تاعايىندالدى. 2022 جىلى پرەزيدەنت اكىمشىلىگى باسشىسىنىڭ ورىنباسارى قىزمەتىنە كىرىستى.
2023 جىلعى 2 قىركۇيەكتە پرەزيدەنت جارلىعىمەن ايدا بالاەۆا مادەنيەت جانە اقپارات ءمينيسترى بولىپ تاعايىندالدى.
2025 جىلعى 1 جەلتوقساندا ايدا بالاەۆا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى قىزمەتىنە تاعايىندالدى.
