ۇلىتاۋ وبلىسىندا ءبىر كۇندە ءتورت تەمىرجول ۆوكزالى اشىلدى

بۇگىن ۇلىتاۋ وبلىسىندا ءتورت تەمىرجول ۆوكزالى جاڭعىرتىلىپ، جولاۋشىلارعا قايتا پايدالانۋعا بەرىلدى. جاڭارعان نىساندار جەزقازعان، قاراجال قالالارىندا، جاڭاارقا اۋدانىندا جانە قىزىلجار بەكەتىندە ورنالاسقان.

بۇل جۇمىستار مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس، ۇكىمەتتىڭ قولداۋىمەن ەلىمىزدەگى 125 تەمىرجول ۆوكزالىن جاڭعىرتۋ جوباسى اياسىندا، قر كولىك مينيسترىلىگى، «سامۇرىق-قازىنا» اق، «قتج» ۇك» اق، ۇلىتاۋ وبلىسىنىڭ اكىمدىگىمەن بىرلەسكەن جۇمىستاردىڭ ناتيجەسىندە جۇزەگە اسىرىلدى.

جاڭعىرتىلعان ۆوكزالدار زاماناۋي تالاپتارعا ساي جابدىقتالىپ، جولاۋشىلارعا قولايلى جاعداي جاساۋعا باعىتتالعان.

ۇلىتاۋ وبلىسىنىڭ اكىمى ەسەت بايكەن ۆوكزالداردىڭ جاڭارتىلۋى ءوڭىردىڭ كولىك ينفراقۇرىلىمىن دامىتۋداعى ماڭىزدى قادام ەكەنىن اتاپ ءوتتى.

«مەملەكەت باسشىسىنىڭ تاپسىرماسىمەن سالىنىپ جاتقان «قىزىلجار–مويىنتى» تەمىرجول جەلىسى وبلىسىمىزدىڭ دامۋىنا تىڭ سەرپىن بەرىپ قانا قويماي، ەلىمىزدىڭ ترانزيتتىك الەۋەتىن ارتتىراتىنى ءسوزسىز. جالپى، وبلىسىمىزدا كولىك ينفراقۇرىلىمىن دامىتۋ باعىتىندا اۋقىمدى جۇمىستار اتقارىلۋدا. تەمىرجول قاتىناسىن جاقسارتۋمەن قاتار، اۆتوموبيل جولدارىنىڭ ساپاسىن ارتتىرۋعا دا باسىمدىق بەرىلۋدە.

«جەزقازعان–قىزىلوردا» اۆتوجولىنداعى جۇمىستار بۇگىندە 90 پايىزعا ورىندالدى. جاقىن ايلاردا كولىك قوزعالىسىن اشۋ جوسپارلانىپ وتىر. «جەزقازعان–قاراعاندى» باعىتىندا بيىل جەر توسەمىن سالۋ جانە ماتەريالدىق-تەحنيكالىق قامتاماسىز ەتۋ جۇمىستارىن تولىق اياقتاۋ كوزدەلگەن. سونداي-اق «ۇلىتاۋ–ارقالىق» جولىنىڭ 89 شاقىرىمدىق بولىگىن جوندەۋ جۇمىستارى قازان ايىندا اياقتالادى»، – دەدى وبلىس اكىمى.

جەزقازعان تەمىرجول ۆوكزالىنىڭ عيماراتى 1941 جىلى سالىنعان. سودان بەرى العاش رەت كەشەندى جاڭعىرتۋدان ءوتىپ وتىر. جوبا اياسىندا ۆوكزال عيماراتىنىڭ اۋماعى 541 شارشى مەتردەن 2 500 شارشى مەترگە دەيىن ۇلعايتىلدى.

جاڭارتىلعان ۆوكزال ءبىر مەزگىلدە 500-گە جۋىق جولاۋشىنى قابىلداپ، تاۋلىگىنە 2 مىڭعا جۋىق ازاماتقا قىزمەت كورسەتۋگە مۇمكىندىك بەرەدى.

بۇگىندە ۇلىتاۋ وبلىسىن ەلىمىزدىڭ التى وبلىسىمەن بايلانىستىراتىن تەمىرجول باعىتتارى بويىنشا جولاۋشىلار پويىزدارى قاتىنايدى. جاڭعىرتىلعان ۆوكزالدار ءوڭىر تۇرعىندارى مەن قوناقتارىنا جايلى ءارى قاۋىپسىز قىزمەت كورسەتۋگە مۇمكىندىك بەرەدى.