Bügın Ūlytau oblysynda tört temırjol vokzaly jaŋǧyrtylyp, jolauşylarǧa qaita paidalanuǧa berıldı. Jaŋarǧan nysandar Jezqazǧan, Qarajal qalalarynda, Jaŋaarqa audanynda jäne Qyzyljar beketınde ornalasqan.
Būl jūmystar Memleket basşysy Qasym-Jomart Kemelūly Toqaevtyŋ tapsyrmasyna säikes, Ükımettıŋ qoldauymen elımızdegı 125 temırjol vokzalyn jaŋǧyrtu jobasy aiasynda, QR Kölık ministrılıgı, «Samūryq-Qazyna» AQ, «QTJ» ŪK» AQ, Ūlytau oblysynyŋ äkımdıgımen bırlesken jūmystardyŋ nätijesınde jüzege asyryldy.
Jaŋǧyrtylǧan vokzaldar zamanaui talaptarǧa sai jabdyqtalyp, jolauşylarǧa qolaily jaǧdai jasauǧa baǧyttalǧan.
Ūlytau oblysynyŋ äkımı Eset Baiken vokzaldardyŋ jaŋartyluy öŋırdıŋ kölık infraqūrylymyn damytudaǧy maŋyzdy qadam ekenın atap öttı.
«Memleket basşysynyŋ tapsyrmasymen salynyp jatqan «Qyzyljar–Moiynty» temırjol jelısı oblysymyzdyŋ damuyna tyŋ serpın berıp qana qoimai, elımızdıŋ tranzittık äleuetın arttyratyny sözsız. Jalpy, oblysymyzda kölık infraqūrylymyn damytu baǧytynda auqymdy jūmystar atqaryluda. Temırjol qatynasyn jaqsartumen qatar, avtomobil joldarynyŋ sapasyn arttyruǧa da basymdyq berılude.
«Jezqazǧan–Qyzylorda» avtojolyndaǧy jūmystar bügınde 90 paiyzǧa oryndaldy. Jaqyn ailarda kölık qozǧalysyn aşu josparlanyp otyr. «Jezqazǧan–Qaraǧandy» baǧytynda biyl jer tösemın salu jäne materialdyq-tehnikalyq qamtamasyz etu jūmystaryn tolyq aiaqtau közdelgen. Sondai-aq «Ūlytau–Arqalyq» jolynyŋ 89 şaqyrymdyq bölıgın jöndeu jūmystary qazan aiynda aiaqtalady», – dedı oblys äkımı.
Jezqazǧan temırjol vokzalynyŋ ǧimaraty 1941 jyly salynǧan. Sodan berı alǧaş ret keşendı jaŋǧyrtudan ötıp otyr. Joba aiasynda vokzal ǧimaratynyŋ aumaǧy 541 şarşy metrden 2 500 şarşy metrge deiın ūlǧaityldy.
Jaŋartylǧan vokzal bır mezgılde 500-ge juyq jolauşyny qabyldap, täulıgıne 2 myŋǧa juyq azamatqa qyzmet körsetuge mümkındık beredı.
Bügınde Ūlytau oblysyn elımızdıŋ alty oblysymen bailanystyratyn temırjol baǧyttary boiynşa jolauşylar poiyzdary qatynaidy. Jaŋǧyrtylǧan vokzaldar öŋır tūrǧyndary men qonaqtaryna jaily ärı qauıpsız qyzmet körsetuge mümkındık beredı.
