«زاڭ مەن ءتارتىپ» قاعيداتى اياسىندا شىمكەنت قالاسىنىڭ توعىز جوعارى وقۋ ورنىندا ءبىرىنشى كۋرس ستۋدەنتتەرىنە ارنالعان «قارجىلىق قاۋىپسىزدىك» تاقىرىبىندا ءبىر مەزەتتە پروفيلاكتيكالىق كەزدەسۋ ءوتتى.
جاڭا ورتاعا بەيىمدەلىپ، ءوز بەتىنشە قارجىلىق شەشىمدەر قابىلداي باستاعان جاستار ءۇشىن مۇنداي ءتۇسىندىرۋ جۇمىستارىنىڭ ماڭىزى زور. سەبەبى ستۋدەنتتىك كەزەڭدە العاش رەت بانك كارتاسىن پايدالانۋ، ونلاين ساۋدا جاساۋ، جۇمىس ىزدەۋ، اقشا اۋدارۋ نەمەسە ينۆەستيتسياعا قىزىعۋشىلىق تانىتۋ سياقتى قارجىلىق وپەراتسيالار كوبەيەدى.
ءىس-شارانىڭ نەگىزگى ماقساتى – قالاعا جاڭادان كەلگەن ستۋدەنتتەردى قارجىلىق ساۋاتتىلىققا ۇيرەتىپ، ينتەرنەتتەگى الاياقتىق سحەمالاردان، دروپپەرلىك ارەكەتتەن، قارجىلىق پيراميدالاردان جانە زاڭسىز اقشا تابۋ ۇسىنىستارىنان ساقتاندىرۋ. كەزدەسۋدى شىمكەنت قالاسىنىڭ جاستار رەسۋرستىق ورتالىعى مەن شىمكەنت قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ ماماندارى بىرلەسە ۇيىمداستىردى.
كەزدەسۋ بارىسىندا جاستارعا قازىرگى كەزدە كەڭ تاراعان قارجىلىق قىلمىس تۇرلەرى ءتۇسىندىرىلدى. سونىڭ ىشىندە دروپپەرلىككە ەرەكشە نازار اۋدارىلدى. دروپپەر دەپ ءوز بانك شوتىن، كارتاسىن نەمەسە باسقا دا قارجىلىق قۇرالدارىن ءۇشىنشى تۇلعالارعا بەرىپ، ولاردىڭ كومەگىمەن اقشا اۋدارىمدارىن وتكىزۋگە قاتىساتىن ادامداردى اتايدى. سوندىقتان ماماندار جاستارعا بانك كارتاسىن، شوتىن، ينتەرنەت-بانكينگكە كىرۋ دەرەكتەرىن جانە وزگە دە قارجىلىق قۇرالدارىن بوگدە ادامدارعا بەرمەۋ قاجەتتىگىن ەسكەرتتى. كەزدەسۋدە قارجىلىق پيراميدالاردىڭ جۇمىس ىستەۋ تاسىلدەرى دە جان-جاقتى ءتۇسىندىرىلدى. 
ءىس-شارا بارىسىندا ءسوز العان شىمكەنت قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ رەسمي وكىلى ارۋجان ءالجان قارجىلىق قاۋىپسىزدىك ماسەلەسىندە جاستاردىڭ قۇقىقتىق جانە قارجىلىق ساۋاتتىلىعىن ارتتىرۋدىڭ ماڭىزىن اتاپ ءوتتى. ونىڭ ايتۋىنشا، ءتۇسىندىرۋ كەزدەسۋلەرىن ءبىر اپتا بويى وتكىزىپ، شامامەن 18 مىڭ ءبىرىنشى كۋرس ستۋدەنتىن قامتۋ جوسپارلانىپ وتىر.
– جاستار ءوز قۇقىقتارىن ءبىلۋى كەرەك، سونىمەن قاتار، وزگەنىڭ قۇقىعىن قۇرمەتتەۋى قاجەت. قازىرگى زامانعى الاياقتىق تۇرلەرى، دروپپەرلىكتەن، قارجىلىق پيراميدالاردان اۋلاق بولعان ءجون.
ول ءۇشىن جاستار قارجىلىق تۇرعىدان ساۋاتتى ءارى جان-جاقتى بولۋى كەرەك، – دەدى رەسمي وكىل.
كەزدەسۋ بارىسىندا ستۋدەنتتەر ماماندارعا وزدەرىن تولعاندىرعان سۇراقتارىن قويىپ، ناقتى جاۋاپتار الدى. اسىرەسە ينتەرنەت ارقىلى جۇمىسقا ورنالاسۋ، بانك كارتاسىن پايدالانۋ، ينۆەستيتسيالىق ۇسىنىستاردى تەكسەرۋ، الەۋمەتتىك جەلىدەگى جارنامالاردىڭ شىنايىلىعىن انىقتاۋ جانە كۇماندى قارجىلىق وپەراتسيالارعا قاتىستى سۇراقتار تالقىلاندى.
