بۇگىن قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا مادەنيەتتانۋشى-فيلوسوف، PhD دوكتارانت ابىلايحان قالنازاروۆتىڭ «شىمكەنتتىڭ جۇمساق كۇشى. شىمكەنت قالاسىنىڭ برەندىن ءتيىمدى باسقارۋ مەن يميدج-يدەولوگياسىن ىلگەرىلەتۋ بويىنشا كوممۋنيكاتيۆتىك ستراتەگيا (تالداۋلار مەن ۇسىنىستار)» اتتى تۇڭعىش قازاقشا پوليتتەحنولوگيا كىتابىنىڭ تۇساۋكەسەرى ءوتتى.
كىتاپ لەنتاسىن «قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆ پەن بەلگىلى جۋرناليست زەيىن الىپبەك بىرلەسە قيدى.
اتالمىش اناليتيكالىق-ۇسىنىمدىق زەرتتەۋ ەڭبەك مەملەكەت تىزگىنىن ۇستاعان بارلىق دەڭگەيدەگى باسشىلار مەن يدەولوگتارعا نۇسقاۋلىق-قويىن كىتاپشا رەتىندە ازىرلەنگەن.
قازاقستان تاريحىندا وسى تاقىرىپتا العاش رەت قولعا الىنعان كىتاپ – 100 دانا عانا باسىلعان ء(ار داناسى 25 مىڭ تەڭگە), 5 تاراۋ، 432 بەتتەن تۇرادى. تەوريالىق بازاسى ۇلىبريتانيا ۇكىمەتىنىڭ كەڭەسشىسى، ەۋروپا پارلامەنتىنىڭ دەپۋتاتى، اعىلشىن عالىمى سايمون انحولت كونتسەپتسياسىنا نەگىزدەلگەن جانەدەن شىمكەنت قالاسى مىسالىندا قازاقستان قالالارى مەن وڭىرلەرىنىڭ برەندىن ءتيىمدى باسقارۋ مەن يميدج-يدەولوگياسىن تۇجىرىمداپ، ىلگەرىلەتۋ بويىنشا ۇلگىلىك ۇسىنىمدار مەن تالداۋلار جاسالعان.
«قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆ ەل ۇكىمەتىنە، اۋماقتىق اتقارۋشى ورگاندارعا قوعام تاراپىنان وسىنداي كونسۋلتاتيۆتىك ۇسىنىستاردىڭ كوپ بولعانىنىڭ پايداسىن اتاپ ءوتتى.
«ەل يدەولوگتارى ءالى ويعا دا الىپ ۇلگەرمەگەن تىڭ دا اكتۋال جوبا. بۇل ەڭبەك ءوز مازمۇنىندا ءۇش قاباتتى قامتىعان ەكەن: ءبىرىنشىسى، برەندتىك-يميدجدىك، ەكىنشىسى، يدەولوگيالىق جانە ءۇشىنشىسى – ۇلتتىق قۇندىلىقتار ءورىسى. تاپ مۇنداي باسقارۋشىلىققا ارنالعان جۇمىستار ءبىر وڭتۇستىك ءوڭىرى ەمەس، ەلىمىزدىڭ ءار ايماعىنا لايىقتالىپ ىستەلۋگە ءتيىس. ولاردىڭ جالپى جيىنىنان ەلدىك اۋقىمداعى ورتاق يدەولوگيا سومدالىپ شىعادى. ابىلايحان باۋىرىمىز ەندى رەسپۋبليكا ماسشتابىنداعى ساياسي-ەكونوميكالىق تۋىندىسىن دۇنيەگە الىپ كەلسە نۇر ۇستىنە نۇر»،- دەدى ت.مۇقاشەۆ.
بۇل رەتتە زەيىن الىپبەك كىتاپتىڭ باسشىلىق، بيلىك پەن قوعام جانە باق اراقاتىناسىنا ارنالعان تۇستارىنىڭ ەرەكشە ۇتىمدى شىققانىنا توقتالدى.
«كونتەنتتى بەيىمدەۋ جانە وڭىرلىك-قالالىق باق-پەن جۇمىس ىستەۋگە كوپ ورىن بەرىلىپتى. بۇل ايماقتىق مەديا نارىقتى دامىتۋدىڭ جالپى الەمدىك ءۇردىسى. سەبەبى جەرگىلىكتى حالىققا ءتۇيىندى حابارلامالاردى نەعۇرلىم ءتيىمدى جەتكىزۋگە مۇمكىندىك بەرەدى. وندا دا جەرگىلىكتى ەرەكشەلىكتى، حالىقتىڭ قالاۋىن، پروبلەمالار مەن مۇددەلەر، وزگەلىك دارەجەسىن، وڭىرلىك نەمەسە بايتاقتىق ماڭىزى بار جاڭالىقتاردى جاريا ەتۋدىڭ جەدەلدىگىن ەسكەرۋ قاجەت. جۇمساق كۇش – سونىڭ جۇمساق ءادىسنامالارىن بىرتىندەپ تارقاتقان. بۇل «ءبىر» دەسەك، ەكىنشى جاعىنان مۇنى ءتۇسىنىپ وقىعان ادام كەمى ءبىر وبلىس نەمەسە قالانىڭ يدەولوگيا جونىندەگى ورىنباسارى دارەجەسىنە دەيىن وسەتىن ءتارىزدى. مەملەكەتتىك قىزمەتتە ءومىر باقي ءجۇرىپ جينايتىن تاجىريبە مۇندا شەبەر سيپاتتالىپ، وپ-وڭاي جانە تۇسىنىكتى تىلمەن بەرىلە سالعان»، دەپ ويىن تۇجىرىمدادى جۋرناليست.
ا.قالنازاروۆ كىتاپتىڭ شىعۋ تاريحىمەن بولىسە ءوتتى.
«كىتاپ بىلتىرعى جىلدىڭ اقپانىندا باسىلىپ دايىن بولعان ەدى. الايدا بەلگىلى ءبىر سەبەپتەرمەن اراعا 1 جىل سالىپ، ەندى عانا تانىستىرۋدىڭ رەتى كەلىپ وتىر. ونىڭ سۇيەگى «ءۇشىنشى مەگاپوليس» اتانعان شىمكەنت قالاسىنىڭ برەندىن ءتيىمدى باسقارۋ مەن يميدج-يدەولوگياسىن ىلگەرىلەتۋ بويىنشا كوممۋنيكاتيۆتىك ستراتەگيا رەتىندە تىكەلەي تۇزىلگەن. دەسە دە قازاق رەاليلەرىنىڭ جالپىەلدىك اۋقىمدا ۇقساستىعىنا وراي استانا، الماتى مەن تۇركىستان احۋالدارىن سالىستىرۋ ارقىلى بارلىق ايماققا ءتان ىشكى پروبلەمالاردى كوتەرىپ، ءتيىمدى شەشىمدەر ۇسىنىلدى» دەيدى ا.قالنازاروۆ.
سونداي-اق اۆتوردىڭ ايتۋىنشا، كىتاپتىڭ باستى جاڭالىعى – رەسپۋبليكانىڭ جاھاندىق دامۋ كونتەكستى اياسىندا شىمكەنتتىڭ اۋماقتىق برەندينگى، جەرگىلىكتى ەرەكشەلىكتەرى مەن ءيميدجىن، يدەولوگيالىق ءمانىن، تاريحنامالىق داستۇرلەرى مەن سايكەستىلىگىن انىقتاۋ ماسەلەلەرىن تالداي وتىرىپ جالپىقازاقستاندىق وركەنيەتتى ەلقۇرۋ ينجەنەرياسىنا قاتىستى قۇندى ويلار.
پراكتيكالىق جاعى – شىمقالاداعى جاڭا اقپاراتتىق-مەديالىق ءتۇيىن-تۇيتكىلدەرمەن جۇمىستانۋ، ىشكى-سىرتقى داعدارىستارعا قارسى جۇمىس، ناقتى ستراتەگەمالار مەن يدەولوگەمالاردى باسشىلىققا الۋ باعىتتارى العاش رەت زاماناۋي PR, مەنەدجمەنت جانە soft power – ساياسي-يدەولوگيالىق كونتسەپتسيالار اياسىندا قاراستىرىلعانى. ياعني مەملەكەتشىل ويلاۋ مەن ادىستەمە تۇرعىسىنان تارازىلانعان بارلىق اقىل-كەڭەستەر مەن ۇسىنىمدار دەرەۋ قولدانىپ، ىسكە اسىرۋعا جارايدى.
ءىس-شارا ەرەكشە فورماتتا ۇلتتىق اكادەميالىق كىتاپحانانىڭ جاڭادان جابدىقتالعان فاريزا وڭعارسىنوۆا زالىندا زەيىن الىپبەكتىڭ ۇيلەستىرۋىمەن جۇرگىزىلدى.
جيىن سوڭىندا اۆتور پرەزەنتاتسيالانعان كىتاپ دانالارىن قور بازاسىنا ەنگىزۋ ءۇشىن كىتاپحانا ديرەكتورى عازيزا قۇدايبەرگەنگە تابىستادى.
ايتا كەتەيىك، ا.قالنازاروۆتىڭ الدىڭعى جىلى ۇلتتىق مۋزەيدە تاۋەلسىزدىكتىڭ 30 جىلدىعى جانە قاجىمۇقان مۇڭايتپاسۇلىنىڭ 150 جىلدىعىنا ارنالعان «بالۋان تاس. بالۋاندار مەن كۇرەس ونەرىنە بايلانىستى اڭىز-ءافسانالار، قيسسا-داستاندار، ەل اۋزىنداعى اڭگىمەلەر (تاريحي دەرەكتەر)» اتتى ەكى تومدىق كىتابىنىڭ تۇساۋكەسەرى بولىپ وتكەن ەدى. ونىڭ لەنتاسىن بۇگىنگى وقۋ-اعارتۋ ءمينيسترى، سول كەزدەگى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى عاني بەيسەمباەۆ، قازاقستان بارىسى ەرجان شىنكەەۆ جانە بەلگىلى زەرتتەۋشى-ونەرتانۋشى ەرلان تولەۋتاي قيدى.
