شىمكەنتتە اۆتوبۋس پاركىن كەزەڭ-كەزەڭىمەن جاڭارتۋ جۇمىسى جالعاسۋدا. قالاداعى قولدانىستاعى قوعامدىق كولىك باعىتتارى جانە جاسالعان كەلىسىمشارتتارعا سايكەس، جىل سوڭىنا دەيىن قالاعا 192 جاڭا اۆتوبۋس جەتكىزىلەدى.
قالا اكىمى عابيت سىزدىقبەكوۆ جولاۋشىلار تاسىمالداۋشى كومپانيالارعا جەتكىزىلگەن اۆتوبۋستاردى قاراپ شىقتى، تەحنيكالىق سيپاتتامالارىمەن جانە باعىتقا شىعۋعا دايىندىعىمەن تانىستى.
ايتا كەتەيىك، جىل سوڭىنا دەيىن جەتكىزەدى دەپ جوسپارلانعان 192 اۆتوبۋستىڭ 64-ءى «رادۋگا-ترانسپورت» جشس-نە تيەسىلى. بارلىعى – Yutong ماركالى اۆتوبۋس. قازىردىڭ وزىندە قالاعا 21 اۆتوبۋس جەتكىزىلگەن. قازان ايىنىڭ سوڭىنا دەيىن ولار №№126, 104 جانە 60 باعىتتارعا شىعارىلادى. جىل سوڭىنا دەيىن تاعى 25 اۆتوبۋس №№6, 51 جانە 67 باعىتتارعا جىبەرىلمەك.
تاعى 128 اۆتوبۋس «تۇركىستان كولىك كومپانياسى» جشس ءۇشىن قاراستىرىلعان. مۇندا دا Yutong ماركالى اۆتوبۋستار جەتكىزىلۋدە. قازىرگى تاڭدا قالاعا 29 اۆتوبۋس كەلدى. قازان ايىنىڭ سوڭىنا دەيىن ولار №№12, 35, 92, 103 جانە 135 باعىتتاردا قاتىناي باستايدى. قالعان 60 اۆتوبۋس جىل سوڭىنا دەيىن جەتكىزىلىپ، باعىتتارعا بولىنەدى.
وسىلايشا، ەكى تاسىمالداۋشىعا قازىردىڭ وزىندە 50 جاڭا اۆتوبۋس جەتكىزىلدى. اۆتوبۋستاردى ساتىپ الۋدى قارجىلاندىرۋ «ونەركاسىپتى دامىتۋ قورى» اق ارقىلى «Qaz Tehna» جشس-نەن ليزينگتىك قارجىلاندىرۋ نەگىزىندە جۇزەگە اسىرىلۋدا.
اۆتوبۋس پاركىن جاڭارتۋ ەسكىرگەن جىلجىمالى قۇرامدى كەزەڭ-كەزەڭىمەن اۋىستىرۋعا، جولاۋشىلار تاسىمالىنىڭ ساپاسىن ارتتىرۋعا جانە شىمكەنت تۇرعىندارى مەن قوناقتارىنا نەعۇرلىم جايلى ءارى قاۋىپسىز جاعداي جاساۋعا مۇمكىندىك بەرەدى.
