تولەبي اۋدانىنىڭ تۇرعىنى ايدانا قالدىقۇل ءتىلىنىڭ استىنان وسكەن ەتتى بەس مينۋتتىق وپەراتسيادا الدىرىپ تاستاۋ ءۇشىن وبلىستىق بالالار اۋرۋحاناسىنا بارعان. بىراق قاراپايىم وتانى دارىگەرلەر تىم كۇردەلەندىرىپ جىبەرگەنى سونشالىق، ەندى ءجاسوسپىرىم ءومىر بويىنا مۇگەدەك بولىپ قالۋى ابدەن مۇمكىن، دەپ حابارلايدى كتك ارناسى.
دارىگەرلەردىڭ ءبىرى ناركوزدى كوپ بەرىپ قويسا، وتا ۇستىندە اپاراتتارى ءوشىپ قالىپ 15 جاسار ناۋقاستىڭ بىرەر مينۋتقا جۇرەگى توقتاپ قالعان. ءسويتىپ ميى قابىنعان وقۋشى قىز 10 كۇننەن بەرى اۋىر حالدە جاتىر.
تولەبي اۋدانىنىڭ تۇرعىنى پورتال ارقىلى 27 مامىردا شىمكەنتتەگى وبلىستىق بالالار اۋرۋحاناسىنا كەلگەن. بىراق بەس مينۋت جاسالادى دەگەن وتا بىرنەشە ساعاتقا سوزىلىپ، ءتىپتى جۇرەگى بەرەر مينۋتقا توقتاپ قالعان. ونى وتا كەزىندە سالعىرتتىق تانىتقانىن دارىگەرلەردىڭ ءوزى تۋىستارىنا ايتىپ، مويىنداپتى.
ايدانانىڭ اناسى فاريدا وتەگەنوۆا دارىگەرلەردىڭ ناركوز كوپ بەرىپ، سالعىرت قاراعانىن العا تارتادى.
ء"تىپتى، اپاراتتارى ىستەن شىققانىن وزدەرى، باس انەستەزولوگ قانات كەرىمبەكۇلىنىڭ ءوزى مويىندادى. ەندى قولدان كەلەر شارا جوق دەپ وتىر", – دەيدى ايدانانىڭ اناسى.
وتباسىنداعى ءتورت بالانىڭ تۇڭعىشى ايدانا بيىل 9 سىنىپتى بىتىرگەن. ميى قابىنعان قىز 10 كۇننەن بەرى جانساقتاۋ بولىمىندە ەس-ءتۇسسىز جاتىر. وپەراتسياعا ءوز اياعىمەن كىرگەن جەتكىنشەكتىڭ مۇنداي جاعدايدا ەكەنىنە جاقىندارى سەنە الار ەمەس. 15 جاسار ناۋقاستى قالاي بولسا دا اياعىنان تۇرعىزىپ بەرسىن دەپ وتىر.
"بىلىكتى ماماندارىن شاقىرسىن، قىزىمدى اياعىنان تۇرعىزسىن. سول ايتار نارسەم. ورىمدەي قىز ەدى، ءوز اياعىمەن كەلىپ، مىناداي جاعدايعا ءتۇسىپ وتىر. كىنالىلەر جازالانسىن. تيتتەي نارسەگە مەنىڭ قىزىمدى قورلاپ وتىر", – دەيدى ايدانانىڭ اجەسى زيادا مولدىباەۆا.
ايدانانىڭ جاقىندارى وتا جاساعان دارىگەرلەرمەن كەزدەسۋدى تالاپ ەتكەن. بىراق جاۋاپتىلاردىڭ ءبىرى سىرقاتتانعانىن ايتسا، ەكىنشىسى سويلەسۋدەن باس تارتقان. بىراق تەلەفونمەن تىلدەسكەندە بار جاۋاپكەرشىلىكتى ءبىر-بىرىنە سىلتەدى. ال جانساقتاۋ ءبولىمىنىڭ مەڭگەرۋشىسى بەس ساعاتتىق وتادان شىققان ايدانانىڭ بولىمگە تۇسكەندە ميىنىڭ 90 پايىزى قابىنعانىن ايتادى. سوندىقتان اياعىنا تۇرىپ كەتۋى ەكىتالاي دەيدى.
"تەلەمەديتسينا بولاتىن بولسا، تەلەمەديتسينامەن سويلەسەمىز. جوعارى جاقتان كەڭەس بەرسە، ءبارىن ىستەيمىز. ال ەگەر الماتى جاقتان كەلىسىم بولسا ونى دا قاراستىرامىز. بىراق قازىرگى كەزدە بالانىڭ جاعدايى ونداي تاسىمالداۋدى كوتەرە المايدى، جاعدايى اۋىر", – تۇركىستان وبلىسى بالالار اۋرۋحاناسى جانساقتاۋ ءبولىمىنىڭ مەڭگەرۋشىسى گۇلزيرا قۇدايبەرگەنوۆا.
دارىگەرلەر ايدانا اياعىنان تۇرعانىمەن، بۇرىنعى قالپىنا ەندى كەلمەيتىنىن ايتادى. 15 جاسار ورىمدەي قىز امان قالسا دا، مۇگەدەك بولىپ قالۋ قاۋپى بار. سوندىقتان وقۋشى قىزدىڭ جاقىندارى قاراپايىم وتادا قولى قالت كەتكەن دارىگەرلەر جازاسىن السىن دەيدى. قازىر دارىگەرلەر توبىنا قاتىستى ىشكى تەكسەرىس ءجۇرىپ جاتىر.
