قىرعىزستاندا مەكتەپ وقۋلىقتارىنىڭ تاپشىلىعىن تولىق جويۋ ءۇشىن قوسىمشا 7 ملرد سوم بولىنەدى، دەپ حابارلايدى "ادىرنا" ءتىلشىسى فەرعاناعا سىلتەپ.
بۇل تۋرالى 18 قىركۇيەكتە قىرعىزستان پرەزيدەنتىنىڭ ءباسپاسوز حاتشىسى اسقات الاگوزوۆ مالىمدەدى.
قوسىمشا قارجى ءبولۋ تۋرالى شەشىمدى قىرعىزستان پرەزيدەنتى سادىر جاپاروۆ قابىلداعان.
وقۋلىق تاپشىلىعى ماسەلەسى مەكتەپتەردە قاجەتتى كىتاپتاردىڭ جەتىسپەۋى جانە ولاردىڭ بازارلاردا زاڭسىز ساتىلۋىنا بايلانىستى كوتەرىلگەن. 16 قىركۇيەكتە جوعارعى كەڭەس دەپۋتاتى داستان بەكەشەۆ «دوردوي» بازارىنان 3-سىنىپقا ارنالعان ماتەماتيكا وقۋلىعىن 650 سومعا ساتىپ العانىن حابارلادى. كىتاپتىڭ مۇقاباسىندا «ساتۋعا بولمايدى» دەگەن بەلگى بولعان. وقۋلىق مەملەكەتتىك «ۋچكۋن» باسپاحاناسىندا باسىلعان.
قىرعىزستاننىڭ ءبىلىم مينيسترلىگى وقۋلىقتاردىڭ بازارلاردا، دۇكەندەردە جانە ينتەرنەت الاڭدارىندا زاڭسىز ساتىلعانىن راستادى. وسىدان كەيىن «ۋچكۋن» باسپاحاناسىنىڭ جەكە مەكتەپتەر مەن اتا-انالارعا وقۋلىق ساتۋ قۇقىعى توقتاتىلدى.
پرەزيدەنتتىڭ ءباسپاسوز حاتشىسى اسقات الاگوزوۆتىڭ ايتۋىنشا، وقۋلىق تاپشىلىعى ماسەلەسى بىرنەشە جىلدان بەرى بار. بۇعان دەيىن بۇل باعىتقا جىل سايىن ورتا ەسەپپەن 100 ملن سوم بولىنسە، سوڭعى ەكى جىلدا 1,3 ملرد سومنان استام قارجى بولىنگەن. وسى كەزەڭدە 9,6 ملن-نان استام جاڭا وقۋلىق باسىلعانىمەن، مەكتەپتەردىڭ قاجەتتىلىگى تولىق قامتاماسىز ەتىلمەگەن.
ەندى تاپشىلىقتى تولىق جويۋ ءۇشىن قوسىمشا 7 ملرد سوم بولىنەدى. ەگەر «ۋچكۋن» باسپاحاناسىنىڭ وندىرىستىك قۋاتى جەتكىلىكسىز بولسا، وقۋلىقتاردى باسىپ شىعارۋعا ەلدەگى باسقا باسپاحانالار دا تارتىلادى.
سونىمەن قاتار قىرعىزستاننىڭ ءبىلىم مينيسترلىگى سايتىندا ءار مەكتەپ بويىنشا وقۋلىقتار تۋرالى اقپارات اشىق جاريالانباق. وندا ءار ءپان بويىنشا قانشا وقۋلىق بەرىلگەنى، قانشا كىتاپ جەتىسپەيتىنى جانە قاجەتتى وقۋلىقتاردىڭ قاشان باسىلىپ، جەتكىزىلەتىنى كورسەتىلەدى.
