14 تامىزدا ورتالىق ازيانىڭ ەنەرگەتيكالىق جۇيەسىندە بولعان تەحنولوگيالىق اپات سەبەبى انىقتالعان، دەپ حابارلايدى "ادىرنا" ءتىلشىسى.
«KEGOC» اق مالىمەتىنشە، 14 تامىز ساعات 14:37-دە قىرعىزستانداعى توكتوعۇل سۋ ەلەكتر ستانتسياسىندا جالپى قۋاتى 600 مۆت بولاتىن ەكى گيدروگەنەراتور اجىراتىلعان. سونىڭ سالدارىنان «سولتۇستىك – شىعىس – وڭتۇستىك» ترانزيتتىك جەلىسىنە شامادان تىس جۇكتەمە ءتۇسىپ، قازاقستاننىڭ وڭتۇستىك ايماعى ءبىرتۇتاس ەلەكتر ەنەرگەتيكالىق جۇيەدەن جانە ورتالىق ازيانىڭ بىرلەسكەن ەنەرگەتيكالىق جۇيەسىنەن اجىراعان.
وقيعا سالدارىنان الماتى, جامبىل، تۇركىستان، قىزىلوردا جانە جەتىسۋ وبلىستارىنىڭ ءبىر بولىگىندە ەلەكتر قۋاتى ءوشتى. سونىمەن قاتار قاراعاندى، ۇلىتاۋ جانە اباي وبلىستارىندا دا تۇتىنۋشىلار جارىقسىز قالدى.
«KEGOC» مالىمەتىنشە، قاراعاندى، ۇلىتاۋ جانە اباي وبلىستارىنداعى ەلەكترمەن جابدىقتاۋ ساعات 14:47-دە تولىق قالپىنا كەلتىرىلدى. الماتى مەن جەتىسۋ وبلىستارىندا ەلەكتر قۋاتى ساعات 16:26-دا، ال جامبىل، تۇركىستان جانە قىزىلوردا وبلىستارىندا ساعات 16:34-تە قايتا بەرىلگەن.
قازاقستان ەنەرگەتيكا مينيسترلىگىنىڭ حابارلاۋىنشا، ورتالىق ازيا ەنەرگەتيكالىق جۇيەسىنەن كەلەتىن ەلەكتر ەنەرگياسى اعىنىنىڭ كۇرت وزگەرۋى سالدارىنان اپاتقا قارسى اۆتوماتيكا ىسكە قوسىلعان. بۇل بىرقاتار وڭىردەگى تۇتىنۋشىلاردىڭ ەلەكتر جەلىسىنەن اجىراتىلۋىنا سەبەپ بولدى.
اپات سالدارى قازاقستانمەن قاتار ورتالىق ازيانىڭ باسقا دا ەلدەرىندە بايقالدى. وزبەكستاننىڭ سۋرحانداريا وبلىسى مەن كەيبىر وڭىرلەرىندە ەلەكتر ەنەرگياسى ۋاقىتشا وشكەن. قىرعىزستاندا بىشكەكتىڭ بىرقاتار اۋدانىندا ەلەكتر قۋاتى ءۇزىلدى.
تاجىكستاندا دا دۋشانبە، كۋلياب، حۋدجاند، ۆاحدات، نۇرەك، گيسسار، شاحريناۆ جانە روگۋن قالالارىندا ەلەكترمەن جابدىقتاۋدا ۇزىلىستەر تىركەلدى.
الماتىدا ەلەكتر قۋاتىنىڭ وشۋىنە بايلانىستى بىرقاتار كوشەدە باعدارشامدار جۇمىس ىستەمەي، كولىك كەپتەلىسى پايدا بولدى. «الاتاۋ جارىق كومپانياسى» اق مالىمەتىنشە، ل-5400, ل-5300 جانە ل-5320 جەلىلەرىندە اپاتتىق اجىراتۋ بولىپ، اپاتقا قارسى اۆتوماتيكا ىسكە قوسىلعان. اجىراتىلعان جۇكتەمە كولەمى 300 مۆت-تى قۇرادى.
