پارا بەرىپ جۇمىسقا تۇرۋ - وزىڭە قۇلدىقتى ساتىپ الۋ عانا!

- ويباي، نە سۇمدىق؟

- پول جۋاتىن تەحنيچكا بولۋ ءۇشىن دە بىزدە 300 مىڭ بەرىپ كىرەسىڭ.

بۇل - مەنىڭ ون جىلدان بەرى ەستىپ كەلە جاتقان اڭگىمەم. بۇگىن جانە ءبىر رەت ەستىدىم.

جۇرت ءدال وسىنداي پارا بەرىپ كىرەتىندەر ءۇشىن، سول پارانى العاندارعا جىنى كەلەتىن شىعار، ءا؟ مەن كەرىسىنشە وسىنشا پارانى بەرەتىندەرگە جىنىم كەلەدى. "ولاردا باسقا امال جوق" دەپ شۋ ەتەتىن شىعارسىزدار، كەشىرىڭىزدەر. تابىسقا جەتپەيتىن ادام عانا ءار كەز ءوزىن اقتاپ الاتىن سىلتاۋ ىزدەيدى. بۇل - سونىڭ ءبىرى.

قالاي دەيسىز عوي، بىلاي، ءدال قازىر جاڭا كىرگەن مۇعالىم جالاقىسى ەڭ كوپ دەگەندە 70-80 مىڭ، كىتاپحاناشى 50-60 مىڭ، تەحنيچكانىڭ اقشاسى 40-50 مىڭ. ال، وندا جوعارىداعى سۋمما ول - ونىڭ ءبىر جىلدىق جالاقىسى. ول ءبىر جىلدىق جالاقىسىن الدىن الا بەرىپ، ءبىر جىل تەگىن جۇمىس ىستەيدى دەگەن ءسوز. ال، ونى كرەديت الىپ بەرۋ - ەكى جىلدىق تەگىن جۇمىس. ءبىر جىل پارا العان ادامعا، ءبىر جىل بانككە قۇلدىققا ءوزىن ساتۋ.

ءىس تەك بۇنىمەن بىتپەيدى. مۇنداي پارا بەرگەن ادام ءبىر جىلدان كەيىن دە جۇمىستان شىعىپ قالماۋ ءۇشىن باستىعىنىڭ ايتقانىمەن ءجۇرىپ، ايداعانىنا كونەدى. سەبەبى، كەلىسپەسە جۇمىستان شىعىپ كەتۋى عاجاپ ەمەس. ال، جۇمىستان شىعىپ كەتسە اقشا كۇيەدى. وسىلاي "امالسىز" ايلار مەن جىلداردى قۇلدىقپەن وتكىزەدى.

"نە ىستەيدى، ەندى باسقا جۇمىس جوق بولسا" دەپ كىجىنىپ وتىرسىز با؟ توقتاڭىز.

ءبىر ميلليون جارايدى، بەس ءجۇز مىڭ تەڭگەسى بار ادام، وسىنشا اقشانى قينالسا دا تاباتىن ادام قۇلدىقسىز دا ءومىر سۇرە الادى. مۇنداي اقشامەن بيزنەس تە باستاۋعا بولادى، مۇنداي اقشامەن مال الىپ، مال باعۋعا دا بولادى. مۇنداي اقشامەن باقشا ەگۋگە دە بولادى. مۇنداي اقشامەن... ءبىر جاقسى جەرى - ء"وزىڭ بي، ءوزىڭ قوجاسىڭ". قۇل بولمايسىڭ!

وكىنىشكە، بىزدە "ۇكىمەت ولتىرمەيدى" دەگەن سانا باسىم. ۇكىمەت ولتىرەدى، ولتىرگەندە ادەمى ولتىرەدى. سەبەبى، قۇلدىقتاعى ءومىر تىرشىلىك ەمەس.

پارا بەرۋشى باردا، پارا الۋشى قاشان دا تابىلادى. پارانىڭ كولەمىنىڭ سونشالىق جوعارى بولۋى - پارا بەرۋشىنىڭ تىم كوپ ەكەنىنىڭ كەسىرى. سەبەبى، ولار كەزەكتە تۇر. پارا بەرۋشىلەردىڭ قاراسى كوبەيگەن سايىن، پارانىڭ قۇنى جوعارىلايدى. بۇل - قاراپايىم لوگيكا.

پارا بەرۋدى ويلامايتىن، ءوزىن-ءوزى اسىراۋ قابىلەتى جوعارى قاۋىم قالىپتاسقاندا عانا جەمقورلىق جويىلادى.

قانداي ادام پارا بەرەدى؟

وزىنە سەنىمسىز، بىلىكسىز مامان پارا بەرەدى. بىلىكتى، قابىلەتتى قاۋىم قۇلدىقتى ساتىپ المايدى ەشقاشان!

جۇمىس بەرۋشى رەتىندە دە، ءار ءوڭىردى كوپ ارالايتىن ادام رەتىندە دە قازاقستاندا جۇمىسسىزدىق جوق، بىلىكسىزدىك وتە اۋىر ەكەنىن مويىندايمىن.

كاسىپكەرلەرمەن، بيزنەسمەندەرمەن سويلەسە كەتسەڭ ءبارىنىڭ ايتاتىنى "بىلىكتى كادر تابۋ وتە قيىن، مامان تاپشى" دەپ جىلايدى. ال، قوعام جۇمىس تاپپاي جىلايدى. بىراق، قۇلدىقتا ءومىر سۇرۋگە قوعام بەيىل.

ال، ميلليون پارا بەرىپ جۇمىسقا تۇرعان سوڭ "جۇيە - جەمقور، ەشكىمنىڭ مورالدىق قۇقى جوق" دەپ سىناۋعا ءدال سول ادامنىڭ قۇقى جوق.

بەس ءجۇز تەڭگە جەگەن ادام، مۇمكىندىك تۋسا، بەس ءجۇز ميلليوندى دا ويلانباي جەيدى. ءوزى پارا بەرىپ جۇمىسقا كىرگەن ادامنىڭ پارا الماۋى تىپتەن مۇمكىن ەمەس.