قاراعاندىدا اۋىل مەكتەپتەرىنىڭ 700-دەن استام دارىندى وقۋشىسى ءوز بىلىمدەرى مەن قابىلەتتەرىن كورسەتۋ ءۇشىن باس قوستى. مۇندا 9–11 (12) سىنىپ وقۋشىلارى اراسىندا رەسپۋبليكالىق پاندىك وليمپيادانىڭ III (وبلىستىق) كەزەڭى باستالدى.
بۇل ءبىلىم سايىسى وڭىردە ءۇشىنشى جىل قاتارىنان وتكىزىلىپ كەلەدى. وليمپيادا بەس كۇنگە سوزىلىپ، قالاداعى ءتورت مەكتەپتىڭ بازاسىندا 13 جالپى ءبىلىم بەرۋ ءپانى بويىنشا وتۋدە.
بايقاۋدى قاراعاندى وبلىسىنىڭ ءبىلىم باسقارماسى مەن «سارىارقا دارىنى»بالالارعا قوسىمشا ءبىلىم بەرۋدىڭ وڭىرلىك عىلىمي-پراكتيكالىق ورتالىعى ۇيىمداستىردى.
— وليمپياداعا تەك اۋىلدىق مارتەبەسى بار مەكتەپتەردىڭ وقۋشىلارى قاتىسادى. بۇل بالالارعا ءوز دەڭگەيلەس قۇرداستارىمەن تەڭ جاعدايدا باق سىناۋعا مۇمكىندىك بەرەدى. مۇندا ارنايى ليتسەيلەر مەن گيمنازيالار قاتىسپايدى، سوندىقتان باعالاۋ پروتسەسى بارىنشا ءادىل ءارى اشىق وتەدى، — دەدى ورتالىق ديرەكتورى سەرىكجان دامىسحان. — وبلىستىق كەزەڭنىڭ جەڭىمپازدارى رەسپۋبليكالىق وليمپياداعا تىكەلەي جولداما الادى. ال رەسپۋبليكالىق دەڭگەيدىڭ جۇلدەگەرلەرى ۇلتتىق قۇرامانىڭ ساپىنا ەنىپ، حالىقارالىق ءبىلىم دودالارىندا قازاقستاننىڭ اتىنان ونەر كورسەتۋ مۇمكىندىگىنە يە بولادى.
بايقاۋدىڭ باستى ماقساتى — اۋىلدىق مەكتەپتەردىڭ تالانتتى وقۋشىلارىن انىقتاپ، ولاردىڭ بىلىمگە دەگەن قۇشتارلىعىن قولداۋ جانە ءارى قاراي دامۋىنا تەڭ مۇمكىندىك جاساۋ.
