Qyrǧyzstanda mektep oqulyqtarynyŋ tapşylyǧyn tolyq joiu üşın qosymşa 7 mlrd som bölınedı, dep habarlaidy "Adyrna" tılşısı Ferǧanaǧa sıltep.
Būl turaly 18 qyrküiekte Qyrǧyzstan prezidentınıŋ baspasöz hatşysy Asqat Alagözov mälımdedı.
Qosymşa qarjy bölu turaly şeşımdı Qyrǧyzstan prezidentı Sadyr Japarov qabyldaǧan.
Oqulyq tapşylyǧy mäselesı mektepterde qajettı kıtaptardyŋ jetıspeuı jäne olardyŋ bazarlarda zaŋsyz satyluyna bailanysty köterılgen. 16 qyrküiekte Joǧarǧy keŋes deputaty Dastan Bekeşev «Dordoi» bazarynan 3-synypqa arnalǧan matematika oqulyǧyn 650 somǧa satyp alǧanyn habarlady. Kıtaptyŋ mūqabasynda «Satuǧa bolmaidy» degen belgı bolǧan. Oqulyq memlekettık «Uchkun» baspahanasynda basylǧan.
Qyrǧyzstannyŋ bılım ministrlıgı oqulyqtardyŋ bazarlarda, dükenderde jäne internet alaŋdarynda zaŋsyz satylǧanyn rastady. Osydan keiın «Uchkun» baspahanasynyŋ jeke mektepter men ata-analarǧa oqulyq satu qūqyǧy toqtatyldy.
Prezidenttıŋ baspasöz hatşysy Asqat Alagözovtıŋ aituynşa, oqulyq tapşylyǧy mäselesı bırneşe jyldan berı bar. Būǧan deiın būl baǧytqa jyl saiyn orta eseppen 100 mln som bölınse, soŋǧy ekı jylda 1,3 mlrd somnan astam qarjy bölıngen. Osy kezeŋde 9,6 mln-nan astam jaŋa oqulyq basylǧanymen, mektepterdıŋ qajettılıgı tolyq qamtamasyz etılmegen.
Endı tapşylyqty tolyq joiu üşın qosymşa 7 mlrd som bölınedı. Eger «Uchkun» baspahanasynyŋ öndırıstık quaty jetkılıksız bolsa, oqulyqtardy basyp şyǧaruǧa eldegı basqa baspahanalar da tartylady.
Sonymen qatar Qyrǧyzstannyŋ bılım ministrlıgı saitynda är mektep boiynşa oqulyqtar turaly aqparat aşyq jariialanbaq. Onda är pän boiynşa qanşa oqulyq berılgenı, qanşa kıtap jetıspeitını jäne qajettı oqulyqtardyŋ qaşan basylyp, jetkızıletını körsetıledı.
