جەتىسۋ وبلىسىندا ءۇش جاسار قىزىن سوققىعا جىعىپ، ازاپتادى دەپ ايىپتالعان ەر ادام ءتورت جىلعا باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى.
وقيعا 2026 جىلى اقپان ايىندا بولعان. الەۋمەتتىك جەلىلەردە ءبۇلدىرشىننىڭ فوتوسۋرەتتەرى مەن ۆيدەولارى، اناسىنىڭ مالىمدەمەسى جاريالانعاننان كەيىن پوليتسيا جەدەل شارالار قابىلداپ، كۇدىكتىنى ۇستادى.
تەرگەۋ بارىسىندا ونىڭ تالدىقورعان قالاسىنىڭ تۇرعىنى جانە زارداپ شەككەن قىزدىڭ تۋعان اكەسى ەكەنى انىقتالدى. جەتىسۋ وبلىستىق پد مالىمەتىنشە، ءۇش جاسار بالانىڭ دەنەسىنەن زورلىق-زومبىلىق بەلگىلەرى بار جاراقاتتار انىقتالعانى تۋرالى حابار مەديتسينا مەكەمەسىنەن تۇسكەن. وقيعا ورنىنا بارعان پوليتسيا قىزمەتكەرلەرى ماس كۇيدە بولعان كۇدىكتىنى ۇستاپ، ۋاقىتشا ۇستاۋ يزولياتورىنا قاماعان.
العاشىندا قىلمىستىق ءىس قىلمىستىق كودەكستىڭ 106-بابى بويىنشا (دەنساۋلىققا قاساقانا اۋىر زيان كەلتىرۋ) تىركەلگەن. كەيىن ءىس قىلمىستىق كودەكستىڭ 110-بابى بويىنشا (قيناۋ) قايتا سارالانىپ، ازاپتاۋ جانە ۇرىپ-سوعۋ دەرەكتەرى بويىنشا تەرگەلدى. تەرگەۋ ناتيجەسىندە قىلمىستىق ءىس ايىپتاۋ اكتىسىمەن سوتقا جولداندى. تالدىقورعان قالالىق سوتىنىڭ ۇكىمىمەن سوتتالۋشى كىنالى دەپ تانىلىپ، ءتورت جىل مەرزىمگە باس بوستاندىعىنان ايىرىلدى.
بۇعان دەيىن قىز بالانىڭ شەتەلدە باۋىر ترانسپلانتاتسياسى بويىنشا كۇردەلى وتادان وتكەنى دە بەلگىلى بولعان ەدى.
