جەزقازعان قالاسىنىڭ باتىس اۋدانىندا ەكى اۋىسىمدا جالپى سانى 2000 وقۋشىنى قابىلداۋعا قاۋقارلى زاماناۋي «BINOM» مەكتەبىنىڭ قۇرىلىسى باستالدى.
جاڭا مەكتەپتىڭ ىرگەتاسىنا كاپسۋلا سالۋ راسىمىنە ۇلىتاۋ وبلىسىنىڭ اكىمى ەسەت بايكەن، «BI Group» كومپانياسى ديرەكتورلار كەڭەسىنىڭ مۇشەسى باۋىرجان يساباەۆ جانە «BINOM» مەكتەپتەر جەلىسىنىڭ ديرەكتورى شولپان قادىروۆا قاتىستى. جوبانى «BI Group» كومپانياسى جۇزەگە اسىرادى.
قۇرىلىس جۇمىستارىن 2027 جىلى اياقتاپ، نىساندى جاڭا وقۋ جىلىندا پايدالانۋعا بەرۋ جوسپارلانىپ وتىر.
«مەملەكەت باسشىسىنىڭ تاپسىرماسىنا سايكەس وڭىرىمىزدە ءبىلىم ساپاسىن ارتتىرۋ جونىندەگى كەشەندى جوسپار ازىرلەندى. جوسپار اياسىندا دارىندى بالالارعا ارنالعان مامانداندىرىلعان مەكتەپتەر اشۋ، ولاردىڭ وزىق ءبىلىم بەرۋ باعدارلامالارىن قالا جانە اۋىل مەكتەپتەرىنە ەنگىزۋ، پەداگوگتەردىڭ بىلىكتىلىگىن ارتتىرۋ كوزدەلگەن. سونىمەن قاتار وڭىردە پەداگوگيكالىق ماماندار دايارلايتىن جوعارى وقۋ ورنىن اشۋ جوسپارلانىپ وتىر. ءبىلىم ساپاسىن ارتتىرۋعا جانە بالالار ءۇشىن قولايلى ورتا قالىپتاستىرۋعا ەرەكشە ءمان بەرىپ كەلەدى. وسى باعىتتا ۇلىتاۋ وبلىسىندا جاڭا مەكتەپتەر مەن بالاباقشالار سالۋ، قولدانىستاعى ءبىلىم بەرۋ نىساندارىن جاڭعىرتۋ جۇمىستارى جۇيەلى تۇردە جالعاسادى»، – دەدى ۇلىتاۋ وبلىسىنىڭ اكىمى ەسەت بايكەن.
جاڭا ءبىلىم وشاعى وقۋشىلاردىڭ ساپالى ءبىلىم الۋىنا جانە جان-جاقتى دامۋىنا قاجەتتى زاماناۋي ينفراقۇرىلىممەن قامتىلادى. مەكتەپتە فيزيكا، حيميا، بيولوگيا، نانو جانە بيوتەحنولوگيا زەرتحانالارى، مامانداندىرىلعان كابينەتتەر قاراستىرىلعان.
سونداي-اق مۇندا كينوزالدار، مۇعالىمدەر مەن وقۋشىلارعا ارنالعان كوۆوركينگ-ايماقتار، تەلەستۋديالار، ويىن بولمەلەرى مەن سمارت-سىنىپتار جۇمىس ىستەيدى. وقۋشىلاردىڭ شىعارماشىلىق جانە تەحنيكالىق قابىلەتتەرىن دامىتۋ ءۇشىن 3D-پرينتەرلەر، روبوتوتەحنيكا كابينەتتەرى، مەتالل جانە اعاش وڭدەۋ شەبەرحانالارى جابدىقتالادى.
بۇدان بولەك، وقۋشىلاردىڭ كوممۋنيكاتيۆتىك جانە كوشباسشىلىق داعدىلارىن جەتىلدىرۋگە ارنالعان Speaking Club جانە TEDxBINOM الاڭدارى قاراستىرىلعان.
