17-18 جەلتوقسان كۇندەرى "قازاقمىس كورپوراتسياسى" جشس-ءنىڭ "جەزقازعانتۇستىمەت" وندىرىستىك بىرلەستىگىنىڭ بىرنەشە شاحتاسىندا جۇمىسشىلار جالاقىنى كوتەرۋدى تالاپ ەتىپ، جۇمىسىن توقتاتتى. ەرەۋىلگە قاتىسۋشىلار باستاپقىدا جالاقىنى 30%-عا كوتەرۋدى سۇراسا، كەيىن بۇل تالاپتى 100%-عا دەيىن ارتتىرعان. مينيسترلىك جۇمىسشىلاردىڭ بۇل ارەكەتىن "ەڭبەك زاڭناماسىن بۇزۋ" دەپ باعالادى، دەپ حابارلايدى "ادىرنا" ۇلتتىق پورتالى.
"قازاقمىس" باسشىلىعى جۇمىسشىلارعا جالاقىنى كوتەرۋدىڭ ەكى نۇسقاسىن ۇسىنعان.
“جالاقىعا كەلەر بولساق، جۇمىس بەرۋشى 2025 جىلدىڭ 1 قاڭتارىنان باستاپ كوتەرۋدىڭ ەكى نۇسقاسىن ۇسىندى. ءبىرىنشىسى، 8,5%-عا يندەكستەۋ جانە وندىرىستىك جوسپاردى ورىنداعانى ءۇشىن 50 اەك مولشەرىندە قوسىمشا ءتورت توقساندىق سىيلىقاقى (2025 جىلى – توقسان سايىن 196 مىڭ تەڭگە) بەرىلەدى. ەكىنشىسى، جالاقىنى 15,6%-عا يندەكستەۋ”، – دەپ مالىمدەدى “قازاقمىس”.
دەگەنمەن، بۇل ۇسىنىستار ەرەۋىلگە شىققان جۇمىسشىلاردى قاناعاتتاندىرمادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمدەۋىنشە، جۇمىسشىلار تالاپتارىن زاڭدا كورسەتىلگەن تارتىپپەن جۇمىس بەرۋشىگە رەسمي تۇردە ۇسىنباعان جانە ماسەلەنى تاتۋلاستىرۋ كوميسسياسىندا قاراماستان وندىرىستىك پروتسەستى توقتاتقان. مينيسترلىك بۇل جاعداي ەڭبەك زاڭناماسىن بۇزۋ دەپ باعالادى.
"قازاقمىس" كومپانياسى ەرەۋىلگە شىققان جۇمىسشىلاردى جۇمىستى قايتا جالعاستىرۋعا جانە ماسەلەنى قۇقىقتىق تارتىپتە شەشۋگە شاقىردى. سونىمەن قاتار، زاڭنامانى ساقتاماۋ تارتىپتىك جاۋاپكەرشىلىككە اكەپ سوعاتىنىن ەسكەرتتى. جۇمىسشىلار تالاپتارى ورىندالمايىنشا نارازىلىقتارىن جالعاستىراتىنىن مالىمدەدى. ولار جالاقىنى ەكى ەسەگە ارتتىرۋدى تالاپ ەتىپ وتىر.
ەڭبەك جانە حالىقتى الەۋمەتتىك قورعاۋ مينيسترلىگى تاراپتاردى تاتۋلاستىرۋ راسىمدەرىن تەك قۇقىقتىق شەڭبەردە جۇرگىزۋگە شاقىردى. مينيسترلىك جۇمىسشىلارعا تالاپتارىن بەلگىلەنگەن ءتارتىپ بويىنشا تالقىلاۋدى ۇسىندى.
