ۇلىتاۋ وبلىسىنىڭ اكىمدىگى مەن «قازاقمىس» كورپوراتسياسى وڭىردەگى سپورت ينفراقۇرىلىمىن دامىتۋعا باعىتتالعان ىنتىماقتاستىق تۋرالى مەموراندۋمعا قول قويدى.
ماڭىزدى كەلىسىمگە ۇلىتاۋ وبلىسىنىڭ اكىمى ەسەت بايكەن مەن «قازاقمىس كورپوراتسياسى» جشس باسقارما توراعاسى رۋسلان وسكەنالى قول قويدى. مەموراندۋم اياسىندا جەزقازعان قالاسىندا 6 مىڭ كورەرمەنگە ارنالعان جابىق فۋتبول ستاديونى مەن زاماناۋي تەننيس ورتالىعىن سالۋ جوسپارلانۋدا.
ۇلىتاۋ وبلىسىنىڭ اكىمى ەسەت بايكەننىڭ ايتۋىنشا، اتالعان جوبالار قالا تۇرعىندارىنا، اسىرەسە بالالار مەن جاستارعا سپورتپەن تۇراقتى تۇردە اينالىسىپ، ءوز قابىلەتتەرىن دامىتۋعا جاڭا مۇمكىندىكتەر بەرەدى.
«بۇل جوبالار قالا تۇرعىندارىنا، اسىرەسە بالالار مەن جاستارعا سپورتپەن تۇراقتى تۇردە اينالىسىپ، ءوز قابىلەتتەرىن دامىتۋعا جاڭا مۇمكىندىكتەر بەرەدى. جالپى، مەملەكەت باسشىسىنىڭ تاپسىرمالارىنا سايكەس، بيىل جانە 2027 جىلى وڭىرىمىزدە الەۋمەتتىك جانە ينجەنەرلىك ينفراقۇرىلىمنىڭ 25-تەن استام ءىرى نىسانىنىڭ قۇرىلىسى باستالادى. ءبىزدىڭ باستى مىندەتىمىز – وبلىسقا ينۆەستيتسيا تارتۋ قارقىنىن ساقتاپ، جۇزەگە اسىرىلىپ جاتقان جوبالاردىڭ ناتيجەسى حالىق ءۇشىن ناقتى سەزىلۋىن قامتاماسىز ەتۋ»، – دەدى ۇلىتاۋ وبلىسىنىڭ اكىمى ەسەت بايكەن.
6 مىڭ كورەرمەنگە ارنالعان جابىق فۋتبول ستاديونىنىڭ قۇرىلىسىن 2027–2028 جىلدارى جۇزەگە اسىرۋ جوسپارلانىپ وتىر. جاڭا نىسان جەرگىلىكتى فۋتبول كوماندالارى مەن سپورت مەكتەپتەرىنە جىل بويى جاتتىعۋ وتكىزۋگە، سونداي-اق ءتۇرلى جارىستار مەن ويىنداردى ۇيىمداستىرۋعا مۇمكىندىك بەرەدى.
زاماناۋي تەننيس ورتالىعىنىڭ قۇرىلىسى 2026–2028 جىلدارعا جوسپارلانعان. جوبا اياسىندا جابىق جانە اشىق تەننيس كورتتارىن، اكىمشىلىك-تۇرمىستىق كەشەندى، جاتتىعۋ زالدارىن، سونداي-اق سپورتشىلارعا مەديتسينالىق كومەك كورسەتۋ جانە جاتتىعۋدان كەيىن قالپىنا كەلۋىنە ارنالعان بولمەلەردى سالۋ كوزدەلگەن.
سونىمەن قاتار، «قازاقمىس» كورپوراتسياسىنىڭ قولداۋىمەن 2026–2027 جىلدارى جەزقازعان قالاسىندا مەشىت پەن كونگرەسس-ورتالىق سالۋ، قوعامدىق كەڭىستىكتەردى اباتتاندىرۋ، مادەنيەت نىساندارىن جوندەۋ، كەڭگىر سۋ قويماسىنىڭ جاعالاۋىن اباتتاندىرۋ جانە باسقا دا بىرقاتار جوبالاردى ىسكە اسىرۋ جوسپارلانۋدا.
اتالعان باستامالاردى جۇزەگە اسىرۋ جەزقازعان قالاسىندا سپورتپەن شۇعىلدانۋعا جانە بەلسەندى دەمالىسقا جاڭا مۇمكىندىكتەر اشىپ، الەۋمەتتىك جانە قالالىق ينفراقۇرىلىمنىڭ دامۋىنا قوسىمشا سەرپىن بەرەدى.
