قازاقمىس بايىتۋ فابريكالارىنداعى ۇساقتاۋ جابدىقتارىنا تسيفرلىق مونيتورينگ جۇيەسىن ەنگىزۋدە

«قازاقمىس» توبى جەزقازعان جانە بالقاش بايىتۋ فابريكالارىنداعى ۇساقتاۋ جابدىعىن باقىلاۋ جۇيەسىن جاڭعىرتۋ جوباسىن جۇزەگە اسىرۋدا. جاڭا تسيفرلىق شەشىم جابدىقتىڭ جاعدايىن ناقتى ۋاقىت رەجيمىندە باقىلاۋعا، ىقتيمال اقاۋدى دەر كەزىندە انىقتاۋعا جانە وندىرىستىك ۇدەرىستىڭ سەنىمدىلىگىن ارتتىرۋعا مۇمكىندىك بەرەدى.

جوبا كومپانيا كاسىپورىندارىن تەحنولوگيالىق جاڭعىرتۋ باعدارلاماسىنىڭ ءبىر بولىگى بولىپ تابىلادى جانە جابدىقتى پايدالانۋ تيىمدىلىگىن ارتتىرۋعا، جوسپاردان تىس توقتاپ قالۋ تاۋەكەلىن ازايتۋعا ءارى بولجامدى قىزمەت كورسەتۋ قۇرالدارىن دامىتۋعا باعىتتالعان.

جەزقازعان بايىتۋ فابريكاسىندا جاڭعىرتۋ جۇمىسى تولىق اياقتالدى. ورتاشا جانە ۇساق بولشەكتەۋ بولىمدەرىندەگى جابدىقتاردىڭ جۇمىسى تۋرالى دەرەك ناقتى ۋاقىت رەجيمىندە بىرىڭعاي ديسپەتچەرلىك مونيتورينگ جۇيەسىنە ءتۇسىپ وتىرادى. بۇل جابدىقتىڭ تەحنيكالىق جاعدايىن جەدەل باقىلاۋعا جانە ولارعا قىزمەت كورسەتۋ بويىنشا شەشىمدى دەر كەزىندە قابىلداۋعا مۇمكىندىك بەرەدى.

بالقاش بايىتۋ فابريكاسىندا جوبا قارقىندى ىسكە اسىرىلۋدا. قازىرگى ۋاقىتتا باسقارۋ شكافتارى قۇراستىرىلىپ جاتىر. ودان كەيىن جابدىقتى مونتاجداۋ، باعدارلامالىق جابدىقتامانى باپتاۋ، سونداي-اق ەلەكتر قوزعالتقىشتارىنىڭ تەمپەراتۋراسى، ءدىرىلى مەن جۇكتەمەسىن باقىلايتىن زاماناۋي باقىلاۋ قۇرالى ورناتىلادى. جوبانى اياقتاۋ 2026 جىلدىڭ ءتورتىنشى توقسانىنا جوسپارلانعان.

جوبا اياقتالعاننان كەيىن ەكى فابريكادا دا ۇساقتاۋ جابدىعىنىڭ جۇمىسىنا ۇزدىكسىز تسيفرلىق مونيتورينگ جۇرگىزىلەدى. جۇيە مەحانيزمدەردىڭ جۇمىسىنداعى اۋىتقۋدى ەرتە كەزەڭدە انىقتاۋعا، اقاۋدىڭ دامۋىنا جول بەرمەۋگە، اپاتتىق جوندەۋ كولەمىن ازايتۋعا جانە جابدىقتىڭ قىزمەت ەتۋ مەرزىمىن ۇزارتۋعا ىقپال ەتەدى.

جوبا بايىتۋ فابريكالارىنىڭ وندىرىستىك تۇراقتىلىعىن قامتاماسىز ەتۋ تۇرعىسىنان ەرەكشە ماڭىزعا يە. سەبەبى ۇساقتاۋ جابدىعىنىڭ سەنىمدى جۇمىسى وندىرىستىك ۇدەرىستىڭ ۇزدىكسىزدىگى مەن جوسپارلى كورسەتكىشتەردىڭ ورىندالۋىنا تىكەلەي اسەر ەتەدى.

زاماناۋي تسيفرلىق شەشىمدەردى ەنگىزۋ وندىرىستىك اكتيۆتەردى جاڭعىرتۋ باعدارلاماسىنىڭ ماڭىزدى باعىتى بولىپ تابىلادى. قازاقمىس جابدىقتىڭ سەنىمدىلىگىن، وندىرىستىك قاۋىپسىزدىكتى جانە كاسىپورىن جۇمىسىنىڭ تيىمدىلىگىن ارتتىرۋعا باعىتتالعان وندىرىستىك مونيتورينگ پەن اۆتوماتتاندىرۋ تەحنولوگيالارىن كەزەڭ-كەزەڭىمەن ەنگىزىپ جاتىر.