كاسىپكەر قولداۋىمەن جاڭعىرتىلىپ جاتقان جەزقازعان قالاسىنداعى توقىما فابريكاسىنىڭ عيماراتى مەملەكەت مەنشىگىندە قالادى. بۇل تۋرالى ۇلىتاۋ وبلىسى اكىمىنىڭ ورىنباسارى نۇرتاس كارىپباەۆ وڭىرلىك كوممۋنيكاتسيالار الاڭىندا وتكەن ءباسپاسوز بريفينگىندە مالىمدەدى.
ۇزاق جىلدار بويى بوس تۇرعان نىساندى قايتا جاڭعىرتۋ ماقساتىندا 2025 جىلعى 21 شىلدەدە جەلىلەردە رەسمي حابارلاندىرۋ جاريالانىپ، جەرگىلىكتى كاسىپكەرلەرمەن كەلىسسوزدەر جۇرگىزىلگەن. الايدا العاشقى ەكى اپتا ىشىندە جوباعا قىزىعۋشىلىق تانىتقان ينۆەستور بولماعان.
تەك 2025 جىلعى 8 تامىزدا «SRT Construction» جشس تاراپىنان جوباعا قاتىسۋ نيەتى تۋرالى رەسمي حات كەلىپ تۇسكەننەن كەيىن ناقتى ۇيىمداستىرۋ جانە دايىندىق جۇمىستارى باستالدى.
ناتيجەسىندە «ۇلىتاۋ» اكك» اق مەن «SRT Construction» جشس اراسىندا بىرلەسكەن قىزمەت تۋرالى شارت جاسالدى. كەلىسىمگە سايكەس، جوبا قۇنىنىڭ 15 پايىزىن ينۆەستور، ال 85 پايىزىن «ۇلىتاۋ» اكك» اق قارجىلاندىرادى. سونىمەن قاتار، ينۆەستورعا 1 ميلليارد تەڭگە كولەمىندە ينۆەستيتسيا تارتۋ مىندەتى جۇكتەلگەن.
شارت تالاپتارىنا ساي، ينۆەستور مەن «ۇلىتاۋ» اكك» اق نىساندى 2030 جىلعا دەيىن بىرلەسىپ باسقارىپ، قىزمەت كورسەتەدى. بۇل كەزەڭدە عيمارات تولىقتاي «ۇلىتاۋ» اكك» اق بالانسىندا ساقتالادى.
ال بەس جىلدىق مەرزىم اياقتالعان سوڭ ينۆەستور جوبا اياسىنداعى قىزمەتىن توقتاتادى. نىسانعا مەنشىك قۇقىعى وزگەرىسسىز مەملەكەت بالانسىندا قالادى.
