كوكشەتاۋداعى ماعجان جۇماباەۆ اتىنداعى وبلىستىق امبەباپ عىلىمي كىتاپحانادا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ءار جىلدارى ساياسات ساحناسىندا قازاق جانە ورىس تىلدەرىندە ايتقان تاڭداۋلى سوزدەرى مەن وي-تۇجىرىمدارى توپتاستىرىلعان «ادىلەتتى قوعامعا – شىنشىل ءسوز» اتتى جاڭا جيناقتىڭ تۇساۋكەسەرى ءوتتى.
جيىنعا اقمولا وبلىسىنىڭ مەملەكەتتىك ورگاندارىنىڭ وكىلدەرى، قوعام بەلسەندىلەرى، ەڭبەك ارداگەرلەرى، جازۋشىلار مەن جاستار قاتىستى.
كەزدەسۋدى اشقان اقمولا وبلىسى اكىمىنىڭ ورىنباسارى دوسۇلان ايتباەۆ وڭىرگە كىتاپتىڭ العاشقى پارتياسى جەتكىزىلگەنىن اتاپ ءوتتى. جاڭا باسىلىمدار قالا جانە اۋدان كىتاپحانالارىنا، سونداي-اق جاستار ۇيىمدارىنا جولدانادى.
«مەملەكەت باسشىسى ۇلتىمىزدىڭ كوبىرەك كىتاپ وقۋ قاجەتتىگىن بىرنەشە رەت اتاپ ءوتتى. بۇل كىتاپ – جاي عانا وي-تولعامدار جيناعى ەمەس، ارقايسىمىز ءۇشىن ماڭىزدى باعدار. ونىڭ ءوز وقىرمانىن تاۋىپ، جاستارعا پايدالى بولىپ، ورتاق بولاشاعىمىز تۋرالى ويلانۋعا ىقپال ەتۋى ماڭىزدى»، – دەدى دوسۇلان ايتباەۆ.
جيناققا مەملەكەت باسشىسىنىڭ ءار جىلدارى بۇقارالىق اقپارات قۇرالدارىندا جارىق كورگەن ماقالالارى، ءتۇرلى جيىندار مەن كەزدەسۋلەردە ايتقان سوزدەرى، ءىس-شارالاردا جاساعان باياندامالارى، سونداي-اق ءوزى جازعان «سۆەت ي تەن»، «پرەودولەنيە»، «كاك ەتو بىلو... حرونيكا ۆولنەني ۆ پەكينە» (1989 جىلعى ءساۋىر–ماۋسىم) كىتاپتارىنداعى ويلارى ەنگىزىلگەن.
كەزدەسۋدە ۇرپاقتار ساباقتاستىعى جانە قازىرگى جاستار ءۇشىن ماڭىزدى قۇندىلىقتار تاقىرىبىنا دا ەرەكشە ءمان بەرىلدى. تالقىلاۋعا قاتىسۋشىلار جىلدام وزگەرىستەر، تسيفرلىق تەحنولوگيالاردىڭ دامۋى جانە جاڭا سىن-قاتەرلەر كەزەڭىندە ءوز ەلىنىڭ تاريحى مەن اتا-بابا مۇراسىن ەستە ساقتاۋدىڭ ماڭىزى زور ەكەنىن اتاپ ءوتتى.
«بۇل كىتاپتى وقي وتىرىپ، پرەزيدەنتتىڭ قوعام الدىنا قويىپ وتىرعان مىندەتتەرىن تەرەڭىرەك تۇسىنەسىڭ. ونىڭ ءار سوزىنەن ەلىمىزدىڭ بولاشاعى مەن قاۋىپسىزدىگىنە دەگەن قامقورلىقتى سەزىنۋگە بولادى. بۇل ويلاردى وسكەلەڭ ۇرپاققا جەتكىزۋ ءبىز ءۇشىن ماڭىزدى»، – دەدى جابال ەرعاليەۆ.
تۇساۋكەسەرگە اقمولالىقتاردىڭ ءار بۋىنى ۇلكەن قىزىعۋشىلىق تانىتتى. اعا بۋىن ءۇشىن بۇل ەلدىڭ ءجۇرىپ وتكەن جولىن تاعى ءبىر ەسكە الۋعا مۇمكىندىك بولسا، جاستار ءۇشىن وزدەرىنىڭ ەل بولاشاعىنداعى ءرولىن تەرەڭىرەك تۇسىنۋگە جول اشادى.
الداعى ۋاقىتتا وڭىرلىك كىتاپحانالار بازاسىندا كىتاپقا ارنالعان تاقىرىپتىق كەزدەسۋلەر مەن پىكىرتالاستار وتكىزۋ جوسپارلانىپ وتىر.
