استاناداعى پرەزيدەنتتىك ورتالىقتا قر مادەنيەت جانە اقپارات مينيسترلىگىنىڭ ۇيىمداستىرۋىمەن «ۇلتتىق كىتاپ» رەسپۋبليكالىق بايقاۋى جەڭىمپازدارىن ماراپاتتاۋ ءراسىمى ءوتتى. ءىس-شارا مەملەكەت باسشىسى قاسىم-جومارت توقاەۆتىڭ باستاماسىمەن بەكىتىلگەن ۇلتتىق كىتاپ كۇنى اياسىندا ۇيىمداستىرىلدى.
سالتاناتتى جيىن قازاقستان رەسپۋبليكاسى پرەزيدەنتىنىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى ارمان قىرىقباەۆتىڭ قۇتتىقتاۋ سوزىمەن اشىلدى.
«مەملەكەت باسشىسى ءاردايىم قوعامدا كىتاپ وقۋ مادەنيەتىن دامىتۋعا ەرەكشە ءمان بەرەدى. 2024 جىلى ۇلتتىق قۇرىلتايدىڭ ءۇشىنشى وتىرىسىندا پرەزيدەنت «كىتاپ وقيتىن ۇلت» تۇجىرىمداماسىن ۇسىنعان ەدى. اتالعان تۇجىرىمداما نەگىزىندە بىلتىردان باستاپ 23 ءساۋىر ۇلتتىق كىتاپ كۇنى بولىپ بەلگىلەندى»، – دەدى ارمان قىرىقباەۆ.
سونداي-اق، پرەزيدەنت كومەكشىسى الداعى ەكى اپتادا مەملەكەت باسشىسى كىتاپ وقۋ مادەنيەتىن كەڭىنەن ناسيحاتتاۋعا جانە زياتكەر ۇلت قالىپتاستىرۋعا باعىتتالعان ارنايى جارلىققا قول قوياتىنىن جەتكىزدى.
ءىس-شاراعا پارلامەنت دەپۋتاتتارى، بەلگىلى اقىن-جازۋشىلار، مەملەكەت جانە قوعام قايراتكەرلەرى، سونداي-اق كىتاپحانا باسشىلارى قاتىستى.
«ۇلتتىق كىتاپ» رەسپۋبليكالىق بايقاۋى وتاندىق اۆتورلاردى قولداۋعا، باسپا ءىسىن دامىتۋعا جانە قازاق ادەبيەتىنىڭ، رۋحانياتىنىڭ دامۋىنا باعىتتالعان. بيىل بايقاۋعا 32 باسپادان 155 ءوتىنىم ءتۇستى. قاتىسۋشىلار سوڭعى ەكى جىلدا جارىق كورگەن وتاندىق اۆتورلاردىڭ شىعارمالارىن ۇسىندى.
جەڭىمپازدار توعىز نوميناتسيا بويىنشا انىقتالدى. ولاردىڭ قاتارىندا «بالالارعا ارنالعان ۇزدىك كىتاپ»، «ۇزدىك كوميكس»، «نون-فيكشن باعىتىنداعى ۇزدىك كىتاپ»، «دەتەكتيۆ جانرىنداعى ۇزدىك كىتاپ»، «ساتيرا جانرىنداعى ۇزدىك كىتاپ»، «ۇزدىك يلليۋستراتسيالىق كىتاپ»، «ۇزدىك اۋدارما كىتاپ»، «فانتاستيكا جانرىنداعى ۇزدىك كىتاپ» جانە «ۇزدىك باسپا» بار. سونىمەن قاتار «جىل كىتابى» اتالىمى بويىنشا جەڭىمپاز ەسىمى بەلگىلى بولدى. بۇل ماراپات اباي قۇنانبايۇلىنىڭ قارا سوزدەرى نەگىزىندە جازىلعان «ۇرپاققا وسيەت» كىتابى ءۇشىن گۇلميرا اماندىقوۆاعا تابىستالدى. بارلىق جەڭىمپازعا اقشالاي سىيلىقتار بەرىلدى.
«ۇلتتىق كىتاپ» بايقاۋى وتاندىق قالامگەرلەر مەن باسپاگەرلەردىڭ ەڭبەگىن دارىپتەيتىن ماڭىزدى الاڭ رەتىندە قالىپتاسىپ، كىتاپ وقۋ مادەنيەتىن نىعايتۋعا جانە قوعامنىڭ قازاق ادەبيەتىنە دەگەن قىزىعۋشىلىعىن ارتتىرۋعا ىقپال ەتىپ كەلەدى.
سالتاناتتى ءراسىم اياسىندا ەلىمىزدىڭ تۇكپىر-تۇكپىرىنەن كەلگەن كىتاپحاناشىلار مەن باسپا سالاسىنىڭ وكىلدەرى «مادەنيەت سالاسىنىڭ ۇزدىگى» توسبەلگىسىمەن جانە «قۇرمەت» گراموتاسىمەن ماراپاتتالدى.
ۇلتتىق كىتاپ كۇنىنە ارنالعان كىتاپ اپتالىعى اياسىندا بۇگىن ەل كولەمىندە سوڭعى كۇن «كىتاپ – دوستىق امباسسادورى» اتاۋىمەن ءوتتى. بۇل كۇن وتاندىق ادەبيەتتى شەتەل وقىرمانى اراسىندا ناسيحاتتاۋعا باعىتتالدى.
كىتاپ اپتالىعىنىڭ سوڭعى كۇنىندە رەسپۋبليكا بويىنشا كىتاپحانالاردا، مادەنيەت جانە ءبىلىم بەرۋ ۇيىمدارىندا شىعارمالارى شەت تىلدەرگە اۋدارىلعان قازاقستاندىق اۆتورلاردىڭ، سونداي-اق كاسىبي اۋدارماشىلار مەن باسپاگەرلەردىڭ قاتىسۋىمەن كەزدەسۋلەر ۇيىمداستىرىلدى.
اتاپ ايتقاندا، استانادا IX «Astana Eurasian Book Fair – 2026» حالىقارالىق كىتاپ كورمە-جارمەڭكەسى اياسىندا كىتاپ تانىستىرىلىمدارى ءوتىپ، حالىق جازۋشىسى، اقىن مۇحتار شاحانوۆتىڭ شىعارماشىلىعىنا ارنالعان «عاسىردىڭ عالامات اقىنى» كورمەسى ۇسىنىلدى. الماتى قالاسىندا «الەمدى بىرىكتىرگەن – قازاق كىتابى» اتتى ادەبي كۆەست وتكىزىلىپ، بەردىبەك سوقپاقباەۆتىڭ «مەنىڭ اتىم قوجا» پوۆەسىنىڭ شەت تىلدەردەگى اۋدارمالارى تانىستىرىلدى. سونداي-اق «قازاق ادەبيەتى – الەم تىلدەرىندە» اتتى كىتاپ كورمەسى ۇيىمداستىرىلدى.
جالپى، كىتاپ اپتالىعى اياسىندا ەل كولەمىندە وتكەن ءىس-شارالارعا 200 مىڭعا جۋىق ادام قاتىستى.
ايتا كەتەيىك، ەرتەڭ، 23 ءساۋىر كۇنى قازاقستاندا مەملەكەت باسشىسىنىڭ باستاماسىمەن بەكىتىلگەن ۇلتتىق كىتاپ كۇنى اتاپ وتىلەدى. اتاۋلى كۇن حالىقتىڭ كىتاپ وقۋعا دەگەن قىزىعۋشىلىعىن ارتتىرۋعا، وقۋ مادەنيەتىن جاڭعىرتۋعا جانە زياتكەرلىك الەۋەتتى دامىتۋعا باعىتتالعان.
