Kökşetaudaǧy Maǧjan Jūmabaev atyndaǧy oblystyq ämbebap ǧylymi kıtaphanada Qazaqstan Respublikasynyŋ Prezidentı Qasym-Jomart Toqaevtyŋ är jyldary saiasat sahnasynda qazaq jäne orys tılderınde aitqan taŋdauly sözderı men oi-tūjyrymdary toptastyrylǧan «Ädılettı qoǧamǧa – şynşyl söz» atty jaŋa jinaqtyŋ tūsaukeserı öttı.
Jiynǧa Aqmola oblysynyŋ memlekettık organdarynyŋ ökılderı, qoǧam belsendılerı, eŋbek ardagerlerı, jazuşylar men jastar qatysty.
Kezdesudı aşqan Aqmola oblysy äkımınıŋ orynbasary Dosūlan Aitbaev öŋırge kıtaptyŋ alǧaşqy partiiasy jetkızılgenın atap öttı. Jaŋa basylymdar qala jäne audan kıtaphanalaryna, sondai-aq jastar ūiymdaryna joldanady.
«Memleket basşysy ūltymyzdyŋ köbırek kıtap oqu qajettıgın bırneşe ret atap öttı. Būl kıtap – jai ǧana oi-tolǧamdar jinaǧy emes, ärqaisymyz üşın maŋyzdy baǧdar. Onyŋ öz oqyrmanyn tauyp, jastarǧa paidaly bolyp, ortaq bolaşaǧymyz turaly oilanuǧa yqpal etuı maŋyzdy», – dedı Dosūlan Aitbaev.
Jinaqqa Memleket basşysynyŋ är jyldary būqaralyq aqparat qūraldarynda jaryq körgen maqalalary, türlı jiyndar men kezdesulerde aitqan sözderı, ıs-şaralarda jasaǧan baiandamalary, sondai-aq özı jazǧan «Svet i ten», «Preodolenie», «Kak eto bylo... Hronika volnenii v Pekine» (1989 jylǧy säuır–mausym) kıtaptaryndaǧy oilary engızılgen.
Kezdesude ūrpaqtar sabaqtastyǧy jäne qazırgı jastar üşın maŋyzdy qūndylyqtar taqyrybyna da erekşe män berıldı. Talqylauǧa qatysuşylar jyldam özgerıster, sifrlyq tehnologiialardyŋ damuy jäne jaŋa syn-qaterler kezeŋınde öz elınıŋ tarihy men ata-baba mūrasyn este saqtaudyŋ maŋyzy zor ekenın atap öttı.
«Būl kıtapty oqi otyryp, Prezidenttıŋ qoǧam aldyna qoiyp otyrǧan mındetterın tereŋırek tüsınesıŋ. Onyŋ är sözınen elımızdıŋ bolaşaǧy men qauıpsızdıgıne degen qamqorlyqty sezınuge bolady. Būl oilardy öskeleŋ ūrpaqqa jetkızu bız üşın maŋyzdy», – dedı Jabal Erǧaliev.
Tūsaukeserge aqmolalyqtardyŋ är buyny ülken qyzyǧuşylyq tanytty. Aǧa buyn üşın būl eldıŋ jürıp ötken jolyn taǧy bır eske aluǧa mümkındık bolsa, jastar üşın özderınıŋ el bolaşaǧyndaǧy rölın tereŋırek tüsınuge jol aşady.
Aldaǧy uaqytta öŋırlık kıtaphanalar bazasynda kıtapqa arnalǧan taqyryptyq kezdesuler men pıkırtalastar ötkızu josparlanyp otyr.
