قازاقستان مەن ازەربايجان كاسپي تەڭىزى ارقىلى جولاۋشىلار تاسىمالىن قايتا جانداندىرادى. بۇل تۋرالى قازاقستاننىڭ ازەربايجانداعى ەلشىسى ءالىم بايەل ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، قۇرىق – باكۋ – قۇرىق باعىتى بويىنشا پاروم جەلىسى ارقىلى جولاۋشىلار تاسىمالىن قايتا ىسكە قوسۋ ۇسىنىلعان.
ەلشى ازەربايجان تاراپى قازاقستاننىڭ بۇل باستاماسىن قولداعانىن جەتكىزدى. قازىر ەكى ەلدىڭ كولىك ۆەدومستۆولارى جولاۋشىلار قاتىناسىن مۇمكىندىگىنشە تەزىرەك قالپىنا كەلتىرۋ باعىتىندا جۇمىس جۇرگىزىپ جاتىر.
ءالىم بايەلدىڭ ايتۋىنشا، بۇل باعىتتاعى تاسىمالدار 2020 جىلعا دەيىن جۇزەگە اسىرىلىپ كەلگەن، الايدا پاندەمياعا بايلانىستى توقتاتىلعان. اتالعان مارشرۋتپەن جىل سايىن شامامەن 1,5 مىڭ جولاۋشى قاتىناعان. ەلشى الداعى ۋاقىتتا بۇل باعىتپەن ساياحاتتاعىسى كەلەتىندەردىڭ سانى بۇدان دا ارتا تۇسەتىنىنە سەنىم ءبىلدىردى.
